Wa ntete kwe Bisi-Korente
12 Bwawu bu bampangi, nzololo lwatomo zaba musamu wutariri makabu ma timpeve. 2 Luzebi ti bu lweri bantu ba makanda,* ni biteki bilembo zonzaka bieri lu twarisaka mpe bieri lu hunaka, bu lweri bia landaka kwakwansoni ku bieri lu nataka. 3 Bwawu bu nzololo lwazaba ti, ka kwena muntu ko bu kazonzaka mu nzila ya mpeve ya Nzambi tâka: “Yezu wa loko wena!” mpe ka kwena muntu ko wulendi tâ ti: “Yezu ni Mfumu!” tala ti ka mu nzila ya mpeve santu’â ko.
4 Makabu ma swaswana mena, kâ mpeve yimosi kwa yena; 5 bisalu bia Nzambi bia swaswana biena, kâ Mfumu yimosi kwa yena; 6 bisalu bia swaswana biena, kâ Nzambi yimosi kwa yena yihanaka lenda kwe muna muntu mu lungisa bisalu biango biabiansoni. 7 Kâ mpeve santu kwe muna muntu yisalaka mu bungu dia mbote ya bantu babansoni. 8 Buna mpeve lenda dia zonza na ndwenga yihanaka kwe muntu wumosi, mpe mpeve yo kwa lenda dia zonza na luzabu yihanaka kwe muntu wakaka, 9 mpeve yo kwa timinu yihanaka kwe muntu, mpe kwe muntu wakaka kabu dia wasisa, 10 kwe wakaka lenda dia sa bimangu, kwe wakaka lenda dia bikula, kwe wakaka lenda dia swasikisa nsangu zitûkiri kwe Nzambi, kwe wakaka lenda dia zonza mazu ma swaswana, mpe kwe wakaka lenda dia bangula mazu. 11 Kâ bisalu bio biabiansoni mu nzila ya mpeve yimosi kwa bisalamanaka, bu yihanaka kabu kwe muna muntu buna bu yizololo.
12 Nitu ya muntu yimosi kwa yibâka kâ na binama biabingi, mpe binama biabiansoni bia nitu yo, ni bu sa ti biabingi biena, mu nitu yimosi kwa bibâka, Kristo mpe ni bo kwa. 13 Mu bungu ti ni mu mpeve yimosi kwa batubatisa beto bansoni mu nitu yimosi, ni bu tubâ Bayuda peleko Bagreke, ni bu tubâ bangamba peleko bantu bê na timpwanza, mpe beto bansoni mpeve yimosi kwa tabaka.*
14 Diangana, nitu ka yena kwa na tinama timosi ko, kâ biabingi. 15 Tala ti kulu kutêle, “Mu bungu ti ka ndiena koko ko, ka ndiena lweka lwa nitu ko,” ka wuzololo’â tâ ko ti ka kwena lweka lwa nitu ko. 16 Tala ti kutu ditêle, “Mu bungu ti ka ndiena disu ko, ka ndiena lweka lwa nitu ko,” ka wuzololo’â tâ ko ti ka diena lweka lwa nitu ko. 17 Tala ti nitu yayansoni disu diena, ngano lenda dia wirikila kwe diaketi bâ? Tala ti nitu yayansoni kutu diena, ngano lenda dia wâ nsunga kwe diaketi bâ? 18 Kâ Nzambi watûla muna tinama buna bu kazolo.
19 Tala ti binama biabiansoni mpila yimosi bieri, ngano nitu kwe yaketi bâ? 20 Binama biabingi biena, kâ nitu yimosi kwa. 21 Disu ka dilendi’â diatâ kwe koko ko, “Ka ndiena naku nsatu ko,” peleko mutu ka wulendi’â watâ kwe malu ko, “Ka ndiena neno nsatu ko.” 22 Kâ, binama bia nitu bimonekaka ntiana’eti ka biena ngolo ko, salu biena, 23 mpe mbuka za nitu zi tubanzaka ti ka zena nguria mfunu ko, nguria zitisa tuzitisaka zo, buna mbuka zifweti lembo moneka nguria zangula tuzangulaka zo, 24 mbuka za toma za nitu’eto ka zena na nsatu tima ko. Kâ, Nzambi wayirika nitu mpe wahana mukembo wawingi ku lweka lwa nitu lweri kondoko mukembo, 25 ngatu ka kubândi tihambula mu nitu, kâ binama biandi biatibelokelaka lwaka. 26 Tala ti tinama timosi mpasi tita mona, binama biabiansoni biakaka mpasi bimonaka na yandi; peleko tala ti tinama timosi bazanguri tio, binama biabiansoni biakaka na yandi biyangalalaka.
27 Beno ni nitu ya Kristo, mpe mosi na mosi mu beno tinama tiena. 28 Mpe Nzambi wahana tisalu kwe muna muntu mu timvuka: tia ntete, bantumwa; tia nzole, bambikuri; tia ntatu, milongi; ha manima, bimangu; ha manima, makabu ma wasisa; bantu babakisaka bantu bakaka; lenda dia twarisa; lenda dia zonza mazu ma swaswana. 29 Babansoni ka bena bantumwa ko, ka buna ko? Babansoni ka bena bambikuri ko, ka buna ko? Babansoni ka bena milongi ko, ka buna ko? Babansoni ka basaka bimangu ko, ka buna ko? 30 Babansoni ka bena na makabu ma wasisa ko, ka buna ko? Babansoni ka bazonzaka mazu ma banzenza ko, ka buna ko? Babansoni ka babangulaka mazu ko, ka buna ko? 31 Kâ tatamaneno mu dinga makabu mayôkele bunene na luhemo. Ni bu sa ti ni bo, mbo nilusongela nzila yiyôkele bubote.