Kwe Bisi-Rome

8 Buna, bô bê mu bumosi na Kristo Yezu ka babazengela mambu ko. 2 Mu bungu ti musiku wa mpeve wuhanaka luzingu mu bumosi na Kristo Yezu wakukûriri mu musiku wa masumu na wa lufwa. 3 Musiku wa Mose ka wabâ na lenda ko dia lu kûla mu bungu ti bantu ka bena na ngolo ko mpe ba sumuka bena. Nzambi walenda mu lu kûla bu katambika Mwana’andi mu tifwani tia bantu ba masumu, ngatu kakatula masumu. Buna, Nzambi wazengela masumu ma bantu mambu. 4 Ntumunu ya sungama ya Musiku yilendi lungana mu beto tutumamanaka mpeve kani tatumamana nitu ya masumu. 5 Mu bungu ti bô badiatilaka mu tinsuni mabanza mawu batûlaka mu bima bia tinsuni, kâ bô badiatilaka mu timpeve mabanza mawu batûlaka mu bima bia timpeve. 6 Wa matieleka, tûla mabanza mu tinsuni ku lufwa kunataka, kâ tûla mabanza mu timpeve ku luzingu na ku tidzunu kunataka. 7 Tûla mabanza mu tinsuni ku titantu na Nzambi kunataka, mu bungu ti tinsuni ka titumamanaka musiku wa Nzambi ko mpe ka tilendi’â tiasila bo ko. 8 Buna, bô badiatilaka mu tinsuni ka balendi’â batâ Nzambi nsayi ko.

9 Wa matieleka, tala ti mpeve ya Nzambi mu beno yena, mu timpeve luta diatila, kâ ka mu tinsuni’â ko. Tala ti muntu kena na mpeve ya Kristo ko, muntu wo kena muntu wa Kristo ko. 10 Kâ tala ti Kristo mu bumosi kena na beno, nitu ya fwa yena mu bungu dia masumu, kâ mpeve ya moyo yena mu bungu dia buderede. 11 Tala ti mpeve ya Wô wavumbula Yezu kwe ba fwa mu beno yena, Wô wavumbula Kristo Yezu kwe ba fwa mbo kasa mpe ti nitu zeno zifwaka zazinga mu nzila ya mpeve’andi ye mu beno.

12 Buna bampangi, ka tufweti’â tatumamana nitu ya masumu ko. 13 Mu bungu ti lwamana diatila mu tinsuni, ntembe kâni ti mbo lufwa. Kâ tala ti lubîkiri ngolo za mpeve zalubakisa mu honda nsalulu za nitu, mbo lubâ ba moyo. 14 Wa matieleka, bô babansoni bê mu lutwalusu lwa mpeve ya Nzambi, nkatika bala ba Nzambi bena. 15 Mu bungu ti ka lwabakiri’â mpeve ya bungamba ko yeri saka ti lwavutu bâ mu bunkuta. Kâ lwabakiri mpeve yisaka ti lwabâ bala ba Nzambi, mu nzila ya mpeve yo mbo tukawulaka: “Abba,* Tata!” 16 Mpeve yawu beni timbangi yitâka na mpeve ya beto ti beto bala ba Nzambi twena. 17 Buna, tala ti bala twena, beto mpe bantu babiarila fwa twena (Yee, bô babiarila fwa dia Nzambi, kâ mpe bô babiarila fwa tintwari na Kristo), tala ti tumweni mpasi tintwari na Yezu ngatu tabaka mpe mukembo tintwari na yandi.

18 Mbenzi ti mpasi zazansoni zi tuta mona bwawu bu ka zena tima ko bu tufwanakasa zo na mukembo wumoneka mu nzila ya beto. 19 Mu bungu ti bima bia sala Nzambi na timina diadiansoni bita kêla nzabukusu ya bala ba Nzambi. 20 Bima bia sala Nzambi biayizi bâ bima bia mpamba-mpamba, ka mu luzolo lwawu’â ko, kâ mu nzila ya muntu wo wasa ti biabâ buna mu bungu dia tivuvu eti: 21 bima bia sala Nzambi mbo bikûluka mpe mu bungamba bwa nitu yibolaka na bwa lufwa, mpe mbo bibaka timpwanza tia mukembo wa bala ba Nzambi. 22 Mu bungu ti tuzebi ti tii bwawu bu bima biabiansoni bia sala Nzambi tintwari bita dila mpe tintwari bita mona mpasi. 23 Ka bima bio’â ko kwa, kâ na beto mpe twe na mbutu za ntete, wuzololo tâ mpeve. Yee, dila tuta dila mu mitima mieto bu tuta kwe kêle na timina diadiansoni ti Nzambi katubongela ntiana bala bandi, katukûla mu nitu zeto mu nzila ya nkûlulu. 24 Mu bungu ti batuvûkisi bu tabakiri tivuvu; kâ tivuvu timonekaka ka tiena tivuvu ko. Ngano muntu bu wumonaka tima, lendi vutu bâ na tivuvu mu tima tio? 25 Kâ tala ti tivuvu tie neto mu bima bi tulembo monaka, mbo tutatamana mu kêla bio na timina diadiansoni na luvivululu.

26 Musamu wakaka, mpeve santu yilendi tu bakisa bu tulembo bâka na ngolo. Tulendi zaba ti nsatu ye neto ya sambila, kâ ka tuzebi’â ko nti tulomba mu lusambulu. Bu tumonaka mpasi ku mutima mpe bu tulembo bâka na ntêlo za delakana mu yawula, mpeve yilendi yawula mu bungu dia beto. 27 Kâ Wô taluzulaka mitima zebi mbanzulu za mpeve, mu bungu ti mpeve bantu ba santu yiyawurilaka tintwari na luzolo lwa Nzambi.

28 Tuzebi ti Nzambi mbo kasaka ti bima biabiansoni bi kasala biasala tintwari mu bungu dia mbote ya bô bamuzoloko, bô ba batâ mbila tintwari na kani diandi; 29 mu bungu ti tûka ntama, bantu Nzambi ba katambula ba ntete, wabasôla mpe ngatu babâ mu tifwani tia Mwana’andi, ngatu Mwana’andi wabâ mwana wa ntete ha kati dia mpangi zazingi. 30 Ha manima, watâ mbila mpe bô ba kasôla; Yandi watâ mpe ba sungama bô ba katâ mbila. Ku nsuka, wahana mukembo kwe bô ba katâ ba sungama.

31 Buna, bwe tutâ mu misamu mio? Tala ti Nzambi na beto kena, ngano nani lendi tu telamana? 32 Yandi ka kengerela na kani fioti Mwana’andi mu mpasi ko, kâ wamuhana mu bungu dia beto. Ngano na luzolo lwalwansoni, ka tu hana bima biabiansoni ko tintwari na Mwana’andi? 33 Nani lendi funda bantu Nzambi ba kasôla? Nzambi yandi beni batâka bantu ba sungama. 34 Nani bazengela mambu? Na kani muntu. Kristo Yezu ni yandi wafwa mpe wu bavumbula kwe ba fwa. Bwawu bu, ha lweka lwa lubakala lwa Nzambi kena mpe mu bungu dia beto kata zonzela.

35 Ngano nti bilendi sa ti Kristo kalembo tu zolo? Mpasi, lwaka, nkwamusu, nsatu, mpene, bima bilendi nata lufwa peleko mbele ya muzingu? 36 Ntiana bu watsonama: “Mu bungu ti nge tuta sarila, beto bata honda tilumbu tia mukaka; beto bata bongela ntiana bimeme bi bafweti honda.” 37 Kâ mu misamu mio miamiansoni, nunga tuta tomo nunga mu nzila ya wô watuzolo. 38 Mu bungu ti lukwikulu lwe nani ti ni bu lubâ lufwa, ni bu lubâ luzingu, ni bu babâ bambazi, ni bu yibâ guvernema, ni bu bibâ bima bia bwawu bu peleko bima bikwiza, ni bu bibâ bimfumu, 39 ni bu bibâ bima bie ku zulu peleko bima bie ha nsi, ni bu tibâ tima tiakaka tia sala Nzambi, ka tilendi’â tiatuhambasa ko na luzolo lwe na Nzambi mu beto lwe mpe mu Kristo Yezu Mfumu’eto.