Like

7 Bu kamanisa mu tâ misamu mi kawaya mu tâ kwe bantu, wakota ku Kafarnawome. 2 Kûna mfumu yimosi ya binwani yeri na tisari ti keri tomo zoloko. Kâ tisari tio timbevo tieri nandi tiaketi mu nata ku lufwa. 3 Bu kawâ nsangu za Yezu, watambika bakuluntu ba Bayuda bakaka mu mu lomba mu kwizi wasisa tisari tiandi. 4 Bapusana he Yezu mpe babatika mu tomo mu lemberela, batâ: “Wa lunga wena ngatu wamuyirikila misamu mi kata ku lomba, 5 mu bungu ti kanda dieto dia kazololo mpe ni yandi watunga sinagoge’eto.” 6 Buna Yezu wabalanda. Kâ bu katula pene-pene na nzo’andi, mfumu ya binwani yatambika ndiku zandi mu mu têla: “Mfumu, kumonandi mutima lwaka mu bungu ti ka ndiena wa fwanana ko mu ku bwana ku nzo’ani. 7 Ntiangu mweni ti ka ndiena wa fwanana ko mu kwiza kwe nge. Kâ tâ kwa musamu mpe tisari tiani mbo tiwasa. 8 Mu bungu ti me beni mpe mfumu zê nani zi nitumamanaka, mpe binwani bie nani bi nitumaka. Bu nitâka kwe wumosi, ‘Yenda!’ mbo kakwendaka, kwe wakaka, ‘Yiza!’ mbo kakwizaka, mpe bu nitâka kwe ngamba’ani, ‘Sa ebu,’ ni bo kasilaka.” 9 Yezu bu kawâ misamu mio, wayituku mu yandi, wabaluka kwe pôka dia bantu dieri mu landaka mpe watâ: “Wa nita lu têla, ni bu wubâ ku Israele ka kwena muntu ko wê na timinu tia tinene tia mpila yi.” 10 Bô ba batambika bu bakâla ku nzo, bamona tisari tio tia wasa.

11 Ntangu fioti ha manima, wayenda ku mumvuka wumosi wu batâka nkumbu Nayine, mpe milongoki miandi na pôka dia bantu na yandi beri kwendaka. 12 Bu katula pene-pene na mwelo wa mumvuka, tala! Bakala dimosi diafwa beri kwe zikaka, mwana wa wumosi wa nguri’andi. Mukento wo mufwiri wabâ. Yungi dia bantu mpe diatûka ku mumvuka beri na yandi. 13 Mfumu bu kamumona, tiari tiamubaka mu bungu dia yandi, mpe wamutêla: “Kuvutuandi dila.” 14 Buna wapusana mpe wasimba mfulu* yi banatinaka mvumbi, mpe bantu beri nataka mfulu yo bakangama. Ha manima watâ: “Mwana bakala, nikutêlele, telama!” 15 Mpe bakala diafwa diavumbuka, diabatika mu zonza mpe Yezu wamuhana kwe nguri’andi. 16 Bunkuta bwababaka babansoni, mpe babatika mu kembela Nzambi bu batâ: “Mbikuri ya yinene yidukiri ha kati dieto,” mpe “Nzambi kipiri kanda diandi.” 17 Mpe nsangu zandi zamwangana ku Yude yayansoni na ku bizunga biabiansoni bieri pene-pene.

18 Milongoki mia Za miamutêla misamu mio miamiansoni. 19 Buna Za watâ mbila milongoki miandi miole mpe wabatambika kwe Mfumu mu mu yula: “Ngano muntu waketi kwiza ni nge, peleko tufweti kêla muntu wakaka?” 20 Bu batula kwe Yezu, babakala bo bamutêla: “Za Tibatisi tu tambikiri kwe nge mu ku yula, ‘Ngano muntu waketi kwiza ni nge, peleko tufweti kêla muntu wakaka?’” 21 Mu ntangu yîna Yezu wawasisa bantu babingi beri na bimbevo, beri na mpasi za ngolo, wakuma mpeve za mbi, mpe wasa ti bantu babîngi bafwa meso bavutu mona. 22 Yezu wabatêla ti: “Yendeno, mpe haneno nsangu za misamu mi lumweni na mi luwîri kwe Za: Bwawu bu bafwa meso bamweni, bafwa malu beka kwe yende, bankwa-bwazi batsemene, bafwa makutu bawîri, bantu ba fwa bavumbukiri, mpe nsangu za mbote basamuni zo kwe bamputu. 23 Nsayi kwe muntu wulembolo baka musamu wu katêla kuba mu bungu dia meno.”

24 Bantu ba tambika Za bu bayenda, Yezu wabatika mu zonzela Za kwe pôka dia bantu: “Ngano nti lwe talaka ku sese?* Titîti tia rozo tita ninganaka mu titembo? 25 Ngano nti lwe talaka? Bakala dilweti binkuti bia toma? Diangana bantu balwataka binkuti bia toma mpe babêlaka mu nienze mu nzo za mitinu babêlaka. 26 Buna nti lwe talaka? Ngano mbikuri? Wa matieleka nita lu têla, yandi tomono yôka mbikuri. 27 Ni mu bungu dia yandi batsoneka ti: ‘Tala! Ntambikiri tinati-nsangu tiani ku matu maku* mu kubika nzila’aku!’ 28 Wa nita lu têla, mu bantu babutuka mu bakento, ka kwena muntu ko wuyôkele Za mu bunene, kâ muntu wa fioti mu Timfumu tia Nzambi mu yôkele.” 29 (Bantu babansoni na bantu batotaka mpaku bu bawâ bo, batâ ti Nzambi wa sungama wena mu bungu ti bateme ya Za babaka. 30 Kâ Bafarize na bô batomo zaba Musiku ka balanda malongi* ma Nzambi ko mu bungu ti ka babaka bateme ya Za ko.)

31 “Buna na nani mfweti fwanakasa bantu ba mbandu yi, mpe na nani badelakane? 32 Bafwanakane na bala ba fioti bazakale ku zandu, bata têsasana: ‘Talusikiriri flûte, kâ ka lwatinini’â ko; tatengi mikunga mia tiari, kâ ka lwadiriri’â ko.’ 33 Mpila mosi mpe Za Tibatisi wayiziri, mu bungu ti ka diaka dimpa ko mpe ka nwaka vinu ko, beno lutêle ti: ‘Demo ye nandi.’ 34 Mwana muntu wayiziri, yandi dia kadiaka mpe nwa kanwaka, kâ beno lutêle ti: ‘Mpula dia ye nandi, mpe vinu yayingi kanwaka, ndiku yena ya bantu batotaka mpaku na ya bisumuki.’ 35 Kâ, ndwenga* mu mbutu* zandi zizabakanaka.”

36 Farize yimosi yeri mu lombaka mu dia na yandi. Buna wakota mu nzo ya Farize yo mpe bazakala mu dia.* 37 Mpe tala! Mukento wumosi wazabakana mu mumvuka ti musumuki weri, wawâ ti Yezu ku nzo ya Farize yo keri dîlaka.* Wanata mbwata ya albatre yeri na mafuta ma nsunga ya mbote. 38 Wayenda ku manima ma Yezu, ha malu mandi, mpe wabatika mu dila. Malu ma Yezu keri bolesaka mu mansangaza mandi mpe mu nsuki zandi keri ma kusuninaka. Musamu wakaka, bize za lembama keri hanaka mu malu mandi mpe mafuta ma nsunga ya mbote keri ma tsamunaka. 39 Bu kamona bo, Farize yamutikisa watâ mu mutima’andi: “Tala ti bakala di nkatika mbikuri yena, mbo kaketi zaba mukento wuta mu simba ntia mpila muntu wena. Mbo kaketi zaba ti musumuki wena.” 40 Kâ Yezu wamuvuturila: “Simo, nzololo nakutêla musamu.” Yandi watâ: “Mulongi, zonza!”

41 “Babakala bole beri defaka mbongo kwe muntu wudefesaka mbongo; wumosi denie* 500 keri defaka, kâ wakaka 50. 42 Mu bungu ti ka babâ na mbongo ko za mu futa, wabayamburila mfuka’awu. Buna mu ba bole nani tomo mu zolo?” 43 Simo wamuvuturila: “Mbenzi ti ni yandi wu bayamburiri mbongo zazingi.” Yandi wamutêla: “Mvutu ya mbote heni.” 44 Buna wabaluka kwe mukento mpe watâ kwe Simo: “Ngano mukento wu wa ta mona? Bu nkotele mu nzo’aku kungeni’â mamba ko ma nisukurila malu. Kâ mukento wu bolese malu mani mu mansangaza mandi mpe kusuni mo mu nsuki zandi. 45 Kungeni’â bize ko, kâ mukento wu, tûka ntangu yi nturiri ka bikiri’â ko mu hana bize za lembama mu malu mani. 46 Kutsamuni’â mafuta ko ku mutu’ani, kâ mukento wu tsamuni mafuta ma nsunga ya mbote mu malu mani. 47 Mu bungu dia musamu wo nikutêlele, ni bu sa ti masumu mandi mamingi* mena ma balemvokele, mu bungu ti yandi bwabwingi kazololo. Kâ wô wu balemvokelaka fioti, fioti kazoloko.” 48 Buna watâ kwe mukento wo: “Masumu maku balemvokele mo.” 49 Bô beri diaka* nandi ha meza babatika mu tâ bawu na bawu: “Muntu wu nani wena ta lemvokela mpe masumu?” 50 Kâ watâ kwe mukento: “Timinu tiaku tikuvûkisi; yenda mu tidzunu.”