Bisalu bia Bantumwa
14 Ku Ikoniume, bakota tintwari mu sinagoge ya Bayuda, mpe bazonza mu mpila yasa ti nzanda bantu ha kati dia Bayuda na Bagreke bizi bakwikila. 2 Kâ Bayuda beri lembo kwikilaka, batuma bantu ba makanda mu telamana bampangi, mpe basa ti babayina. 3 Buna Paulo na Barnabase bayôkesa ntangu yayingi kûna, mu zonza na butindi mu lutumu lwa Yehova.* Lutumu lwango lwasingasa zu ditariri bweso bwandi bwa nzitukulu, bu kabahana nzila ya sa bidimbu na bimangu. 4 Kâ bantu ba mumvuka ka beri’â vutu wisanaka ko; bakaka ku lweka lwa Bayuda babâ, kâ bakaka ku lweka lwa bantumwa. 5 Bantu ba makanda, Bayuda na mfumu zawu bu badinga mu ba fwisa nsoni na mu ba winda matari, 6 bahana nsangu zo kwe Paulo na Barnabase, badioka ku mumvuka wa Likaoni, wa Listre, wa Derbe na ku mahata meri pene-pene. 7 Kûna batatamana mu samuna nsangu za mbote.
8 Ku Listre, bakala dimosi diabâ na malu ma fwa diazakala hâna. Malu ma fwa mabâ nandi tûka mbutukulu’andi, mpe kani kabwe keri’â kwe yende ko. 9 Bakala dio Paulo keri wirikilaka bu keri zonzaka. Paulo wamusungamana mpe wamona ti timinu tiabâ nandi mu wasa. 10 Watâ mu zu dia ngolo: “Telama.” Buna bakala dio diadumuka, mpe diabatika mu kwe yende. 11 Pôka dia bantu bu diamona misamu mia yirika Paulo, diakawula mu zu dia Likaoni: “Nzambi zeka ntiana bantu, mpe zikôkele kwe beto!” 12 Babatika mu tâ Barnabase mu nkumbu ya Zese, kâ Paulo mu Ermese, mu bungu ti ni yandi weri zonzaka wa ntete. 13 Nganga-nzambi ya Zese, yabâ na tempelo ha nkotolo ya mumvuka, wanata ngombe na mpu za bifulu ha mielo, mpe wadinga mu hana mikayulu tintwari na pôka dia bantu.
14 Bantumwa Barnabase na Paulo bu bawâ bo, batenda binkuti biawu, badumuka ha kati dia pôka dia bantu, mpe bakawula: 15 “Babakala, mu bungu dia nti luta sila bo? Beto mpe bantu kwa twena, bê na mpasi zimosi na beno. Nsangu za mbote tuta lu samunina ngatu lwabîka bima bi bilembolo salu, mpe lwabaluka kwe Nzambi ya moyo, Yandi wasala zulu, mutoto, mubu na bima biabiansoni bie mô. 16 Mu mbandu zayôka, wabîka makanda madiatila buna bu mazololo, 17 ni bu sa ti ni bo, ka tiyimini’â ko mu tâ timbangi mu yandi beni bu kasongela mbote. Waluheni mvula za ku zulu, ntangu zibutaka mbutu zazingi, waluyukutisi mu bidia mpe wafulusi mitima mieno mu nsayi.” 18 Ntono misamu mi batâ, ka balenda ko mu kabakasa pôka dia bantu mu ba hana mikayulu.
19 Kâ Bayuda batûka ku Antioshe na ku Ikoniume batula mpe bawisa pôka dia bantu. Bawinda Paulo matari mpe bamukoka ku mbazi ya mumvuka bu babanza ti wafwa. 20 Kâ milongoki bu miamuzungirila, watelama mpe wakota mu mumvuka. Tilumbu tialanda wayenda na Barnabase ku Derbe. 21 Bu bamana samuna nsangu za mbote ku mumvuka wo, mpe bu bakubika milongoki miamingi, bakâla ku Listre, ku Ikoniume na ku Antioshe. 22 Kûna, bayika ngolo milongoki bu babatindisa mu tatamana mu bâ mu timinu, bu batâ: “Mpasi zazingi tumona mu kota mu Timfumu tia Nzambi.” 23 Musamu wakaka, babanomena bakuluntu mu muna timvuka, basambila mpe basa diêna, mpe babahana ha moko ma Yehova,* Yandi wu babatika mu kwikila.
24 Buna basabuka Pisidi, mpe bayenda ku Pamfili, 25 mpe bu bamana samuna zu ku Perige, bakôka ku Atalia. 26 Kûna, bayenda ku Antioshe mu bato, ku babahanina bweso bwa nzitukulu bwa Nzambi mu bungu dia tisalu ti bayizi lungisa.
27 Bu batula, mpe bu bakutakasa timvuka, babatêla misamu miamingi mia yirika Nzambi mu nzila ya bawu, mpe bwe Nzambi kaziburila mwelo wa timinu kwe makanda. 28 Buna bayôkesa ntangu yayingi na milongoki.