Kwe Bisi-Filipe

2 Seno miamiansoni mi lulenda mu tindisa bantu bakaka mu Kristo, mu ba bomba mu luzolo, mu kabana nawu mabanza ma timpeve, luzolo na tiari tia mutima. 2 Lwamana sila bo mbo lutomo kuntâ nsayi, bêno mu bumosi, bêno na luzolo beno na beno, mpe bêno tintwari mu nsalulu na mu mabanza. 3 Ka lusandi na kani tima na mabanza ma bakana* peleko ma bwimi, kâ na kuluka kwakwansoni moneno ti bantu bakaka baluyôkele. 4 Ka ludingandi kwa ndandu za beno beni, kâ dingeno mpe ndandu za bantu bakaka.

5 Lundeno mabanza ma mu mutu mabâ mpe na Kristo Yezu, 6 ni bu sa ti ntiana Nzambi kabâ, kani kabwe ka banza ko mu bonga tibuka tia Nzambi, peleko mu bâ nsinsa na Nzambi. 7 Kâni, kâ wabîka bima biabiansoni, watambula mu bâ ngamba mpe wayizi bâ muntu. 8 Musamu wakaka, bu kayizi bâ muntu, wakuluka mpe watumama tii ku lufwa, yee, lufwa ha poto* dia matimuna.* 9 Ntiangu Nzambi kamuzangula ha mbuka yiyôkele, mpe wamuhana nkumbu yiyôkele nkumbu zazansoni, 10 ngatu mu nkumbu ya Yezu makoto mamansoni mafukama—ma bô bê ku zulu, ma bô bê ha mutoto, na ma bô bê ku nsi’a mutoto— 11 ngatu minwa* miamiansoni miatomo tambula ti Yezu Kristo ni Mfumu mu bungu dia mukembo wa Nzambi Tata’eto.

12 Buna, mpangi zani zi ntomono zolo, ntiana kwa bu lwatatamane mu tumama bu nabêle na beno, kâ mpe bu luta tatamana mu tumama bu ndembolo na beno, tatamaneno mu sala mu bungu dia mvukulu’eno mu bunkuta na mu tintekoto. 13 Mu bungu ti ni Nzambi, mu luzolo lwandi, lu yikaka ngolo, lu hanaka ha timosi nsatu na lenda dia sarila. 14 Mu miamiansoni mi lusa ka lwendandi niunguti, mpe ka lwendandi disikiti, 15 ngatu lwabâ bantu ba balembo semba, mpe balembolo zaba misamu, bala ba Nzambi bê ba tsema ha kati dia mbandu ya mbi na ya tengama, mu luta kenga ntiana minda mu nza, 16 bu lutomo simbirila Zu dia luzingu. Buna mbo nibâ na diambu di niyangalala mu tilumbu tia Kristo, bu nzebi ti ntinu zi nadiokele ka za mpamba ko, peleko tisalu tia ngolo ti nasariri ka tia mpamba ko. 17 Kâ ni bu sa ti bakuntsamuni ntiana mukayulu wa malavu, koko nita yika mu mukayulu wu luta hana, na mu tisalu tieno tia santu. Buna nsayi ye nani, mpe na beno bansoni nita yangalala. 18 Mpila mosi mpe lufweti bâ mu nsayi mpe lufweti yangalala na meno.

19 Tala ti Mfumu Yezu zololo, ntamana mbo nilutambikila Timote, ngatu nabaka lutindusu bu nibaka nsangu zeno. 20 Mu bungu ti ka ndiena na muntu wakaka ko wê na mabanza mamosi na yandi, tomo lu belokelaka lwaka. 21 Mu bungu ti bantu bakaka nsatu zawu kwa babelokelaka lwaka, ka nsatu za Yezu Kristo’â ko. 22 Kâ luzebi tidimbu ti kasongela mu bungu dia yandi beni, mu bungu ti ntiana mwana na tata’andi, wasala tisalu tia ngolo na meno ngatu nsangu za mbote zenda ku matu. 23 Buna, ni yandi nita zolo tambika buna kwa bu nimona mpila yi yôkela misamu mu bungu dia meno. 24 Diangana lukwikulu lwe nani mu Mfumu ti, ntamana me beni mpe mbo nikwiza.

25 Kâ, mweni ti mfunu wena mu lu tambikila Epafrodite mpangi’ani, mpe ndiku’ani ya tisalu, wu tunwanaka tintwari na wu lwakuntambikila ngatu kakipa nsatu zani, 26 mu bungu ti, nsatu yayingi ye nandi mu vutu lu mona beno bansoni, mpe tiari tie nandi bu lwawîri ti timbevo tiabêle nandi. 27 Diangana timbevo tia ngolo tiabêle nandi tiaketi mu nata ku lufwa, kâ Nzambi wamufwiriri tiari na meno mpe ngatu tiari tiani tialembo yikama. 28 Ntiangu nita kulu mu tambika ngatu bu lumumona lwavutu yangalala, mpe nalembo bâ na lwaka lwalwingi. 29 Dieka bo mu bwaneno na nsayi yayansoni ntiana bu lubwaninaka milongoki mia Mfumu, mpe tatamaneno mu yengeza bantu bê ntiana yandi; 30 mu bungu ti waketi fwa mu tisalu tia Kristo* bu katûriri luzingu lwandi mu mpasi* mu kungana lubakusu lu lwalembolo bâ na lenda mu kungana.