Kwe Bisi-Rome

11 Buna, yula nita yula: Ngano Nzambi wakariri kanda diandi? Diangana kâni! Meno mpe mwana* wa Israele ndiena, mutekolo wa Abrahame, wa kanda dia Benyamine. 2 Nzambi ka losa kanda diandi ko di katambula dia ntete. Ngano ka luzebi’â ko mio mitâka matsonoko mu bungu dia Eliya mu mpila yi kaniongena kanda dia Israele ha matu ma Nzambi? 3 “Yehova,* bahondele mbikuri zaku, bamwangase maziku maku, mpe meno kaka kwa nsîri. Bwawu bu dinga bata dinga mu kungonda.” 4 Kâ Nzambi ntia mvutu kamuhana? “Bantu 7 000 bê nani balembolo fukama ha matu ma Bale.” 5 Ni bo mpe wena bwawu bu. Tikunku tie kô tia fioti tia bantu ba basôla ha kati dia Bayuda mu bungu dia bweso bwa nzitukulu bwa Nzambi. 6 Kâ tala ti nsololo yo mu nzila ya bweso bwa nzitukulu yena, ka yilendi’â yavutu bâ mu nzila ya nsalulu ko; tala ti ka buna ko, bweso bwa nzitukulu ka busiri’â bweso bwa nzitukulu ko.

7 Buna bwe tutâ? Tima tieri tomo dingaka Israele ka baka tio ko, kâ bô ba basôla babaka tio. Mitima mia bô basâla miayizi bâ ngolo. 8 Ntiana bu watsonama: “Tii lumbu ti, Nzambi wabahana mpeve ya tolo twa ngolo, meso malembo monaka na makutu malembo wâka.” 9 Mpe Davide têle: “Bîka meza mawu mabâ mutambu, file,* tima tisaka ti bantu batâ makuba, na nsembolo mu bungu dia bawu. 10 Bîka ti meso mawu mabâ mpimpa ngatu balembo vutu mona, mpe ntangu zazansoni nima zawu zakondama.”

11 Buna yula nita yula: Ngano bu babwa mu ntangu yi batâ kuba, ka bavutu’â bâ na lenda ko dia telama? Diangana kâni! Kâ mu nzila ya kuba di batâ, bantu ba makanda makaka babakiri mvukulu, mpe mbo wusaka ti Bayuda babâ na timbanda. 12 Kuba diawu dianata bimvwama mu nza, mpe betoka kwawu kwanata bimvwama biabingi kwe bantu ba makanda makaka. Buna, lusakumunu mbo lutomo bâ lwa lunene mu ntangu lutangu lwa Bayuda na lwa makanda makaka yi lulunga!

13 Bwawu bu kwe beno nita zonza, bantu ba makanda. Mu bungu ti meno ntumwa yena ya makanda, tisalu tiani nita zangula* 14 mu mona tala ti ndendi tulumuna timbanda mu mpila ni mpila kwe bantu ba kanda diani,* mpe ndendi vûkisa bantu bakaka ha kati diawu. 15 Bu babalosa, musamu wo wasa ti bantu bakaka mu nza babâ na tindiku na Nzambi. Kamana tambula Bayuda bakaka lumbu ti, mbo wubâ ntiana bawu bafwa mpe babakârisi ku luzingu. 16 Tala ti lweka lwa pate lu babongele ntiana mbutu za ntete lwa santu lwena, pate yayansoni ya santu mpe yena; mpe tala ti mudza wa muti wa santu wena, bintala mpe bia santu biena.

17 Kâ bintala biakaka bia muti bazenga bio. Ha manima, bakunamatasa mu bintala biakaka, ni bu sa ti nge muti wa olive wa sangi wena. Bwawu bu, bidia bimosi luta dia bita tûka mu mudza wa muti wa olive. 18 Kâ kubanzandi ti yôkele* bintala biakaka. Tala ti benzi ti nge yôkele,* bambuka ti ka nge’â ko sikamasaka mudza, kâ ni mudza wukusikamasaka. 19 Buna, nge mbo tâ: “Bazengele bintala biakaka ngatu bakunamatasa.” 20 Wa matieleka wena! Bazengele bio mu bungu ti biakondolo timinu, kâ nge wa telama wena mu bungu dia timinu. Kubândi na lulendo, kâ bâ na bunkuta. 21 Tala ti Nzambi wazenga bintala bia muti wo, lendi ku zenga mpe. 22 Buna, dimbitila mu mpila Nzambi yi kasongelaka mbote na nkesi zandi. Nkesi zandi kasongelaka kwe bô babwaka, kâ mbote’andi kasongelaka kwe nge ntangu yayansoni yi tatamana mu bâ mu mbote’andi; tala ti kâni, nge mpe mbo bakuzenga. 23 Bawu mpe, bamana lembo tatamana mu kondo kwa timinu kwawu, mbo babanamatasa mu bungu ti Nzambi lenda die nandi dia vutu ba namatasa. 24 Tala ti nge bakuzenga mu muti wa olive wa sangi mpe bakunamatasa mu muti wa olive wa ku musitu, ntembe kâni balendi vutu namatasa mu muti wa olive wa ku musitu bintala biandi bi batoko zenga.

25 Bampangi, nzololo lwazaba mansweki mo ma santu, ngatu lwalembo banza ti ndwenga zê neno: Lweka lwakaka lwa Israele lwatatamana mu bâ na tungu tii mu ntangu ya kota lutangu lwa lunga lwa bantu ba makanda. 26 Buna mpe mu mpila yo Israele yayansoni mbo yivûka. Ntiana bu watsonama: “Muvukisi mbo wutûka ku Siyone, mpe mbo wukatula kwe Yakobe nsalulu zilembo zitisaka Nzambi. 27 Mpe lo ni luwawanu lwani na bawu, mu ntangu yi nikatula masumu mawu.” 28 Wa matieleka, mu wo wutariri nsangu za mbote, mbeni zena mu bungu dia beno; kâ mu wo wutariri nsololo ya Nzambi, bawu bantu bena ba bazololo mu bungu dia nkaka zawu. 29 Mu bungu ti Nzambi ka nionga ko mu bungu dia makabu na mbila’andi. 30 Mu bungu ti ntiana kwa bu lweri lembo tumamanaka Nzambi mu ntama, kâ bwawu bu balusongele tiari mu bungu dia bukolo bwa Bayuda, 31 mpila mosi mpe, bwawu bu ni bawu bakolamane, mpe Nzambi wasongele tiari kwe beno. Kâ balendi mpe ba fwila tiari ntiana bu balufwiriri tiari. 32 Mu bungu ti Nzambi wabakanga babansoni mu bukolo ngatu kasongela tiari kwe babansoni.

33 Diangana bimvwama, ndwenga na luzabu lwa Nzambi ndilu biena! Mfundusu zandi mpasi zena mu bakula, mpe nzila zandi ka zilendi’â zazabakana ko! 34 “Ngano nani zebi mabanza ma Yehova,* mpe nani lendi mu hana malongi?” 35 Peleko, “ngano nani wa ntete wamukabila ngatu yandi kamuvuturila?” 36 Mu bungu ti bima biabiansoni kwe Nzambi bitûkaka, mu nzila ya yandi mpe mu bungu dia yandi. Bîka kabaka mukembo ntangu zazansoni. Amen.