Like

6 Tilumbu timosi tia Sabala, Yezu ku musitu wa ble keri yôkaka, mpe milongoki miandi mbutu za ble beri tiaka mpe beri diaka bu beri toko za zokozonaka mu moko mawu. 2 Buna Bafarize bakaka bamutêla: “Mu bungu dia nti luta yirikila misamu mi bayimina mu tilumbu tia Sabala?” 3 Kâ Yezu wabavuturila: “Ngano ka lwatanga misamu mia yirika Davide ko, mu ntangu yandi na bantu bandi yi babâ na nsatu? 4 Wakota mu nzo ya Nzambi mpe bamuhana mampa ma mukayulu. Wadia mpe wahana mo kwe bantu babâ nandi. Tima ti balembo hanina nswa kwe muntu ni muntu mu dia kâ kwe banganga-nzambi kwa.” 5 Buna wabatêla: “Mwana muntu ni Mfumu ya Sabala.”

6 Tilumbu tiakaka tia Sabala, wakota mu sinagoge mpe wabatika mu longesa. Mpe bakala dimosi diabâ mô dieri na koko kwa lubakala kwa yuma.* 7 Buna bitsoniki na Bafarize Yezu beri tomo sungamanaka mu mona tala ti mbo kaketi mu wasisa mu tilumbu tia Sabala, mu baka mpila yi baketi mu fundila. 8 Kâ Yezu mabanza mawu ma kazaba, buna watâ kwe bakala dieri na koko kwa yuma:* “Telama mpe yiza ha kati. Yandi watelama mpe wabâ ha kati.” 9 Ha manima Yezu wabatêla: “Beno nita yula: Ngano nswa wê neto mu tilumbu tia Sabala wa yirika musamu wa mbi peleko wa mbote, wa vûkisa luzingu* peleko wa fukisa lo?” 10 Buna Yezu bu kamana ba tala babansoni, watâ kwe bakala dio: “Lambula koko kwaku.” Yandi walambula ko mpe koko kwayizi wasa. 11 Kâ nkesi zatomo ba baka mpe babatika mu zonza bawu na bawu mu mio mi baketi yirika kwe Yezu.

12 Tilumbu timosi mu ntangu yîna, wayenda ku mongo mu kwe sambila, mpe wayôkesa mpimpa ya mukaka mu sambila Nzambi. 13 Mpe bwisi bu bwatia, watâ mbila milongoki miandi mpe wasôla bantu 12 ha kati diawu ba katâ bantumwa: 14 Simo wu katâ mpe Piere, Andre mpangi’andi, Zaki, Za, Filipe, Baretelemi, 15 Matie, Toma, Zaki mwana wa Alefe, Simo wu batâka mpe “munkwa-luhemo,” 16 Yuda mwana wa Zaki, na Yuda Iskariote wayizi mu teka ha manima.

17 Wakôka na bawu mpe watelama ha mbuka ya pesakana. Milongoki miandi miamingi na pôka dia bantu diatûka ku Yude yayansoni, ku Yerusaleme, na ku tizunga tia Tire na tia Sido tieri pene-pene na mubu, bayiza mu kwizi wâ Yezu mpe ngatu kabawasisa mu bimbevo biawu. 18 Ni bu wubâ bô beri na mpeve za mbi bawasa. 19 Mpe yungi diadiansoni dia bantu diadinga mu mu simba mu bungu ti ngolo zeri dukaka mu yandi mpe babansoni keri wasisaka.

20 Watala milongoki miandi mpe wabatika mu tâ:

“Nsayi kwe beno bamputu, mu bungu ti Timfumu tia Nzambi tia beno tiena.

21 “Nsayi kwe beno lwe na nsatu bwawu bu, mu bungu ti mbo luyukuta.

“Nsayi kwe beno luta dila bwawu bu, mu bungu ti mbo luseha.

22 “Nsayi kwe beno, bantu bu baluyinaka, bu balukumaka, bu balufingaka na bu bavwezaka nkumbu’eno mu bungu dia Mwana muntu. 23 Yangalaleno mu tilumbu tio mpe dumuzukeno mu nsayi, mu bungu ti musendo’eno wa wunene wena ku zulu. Diangana nkaka zawu ni bo kwa mpe zeri saka kwe bambikuri.

24 “Kâ tiari kwe beno bamvwama, mu bungu ti mbombolo’eno ya lunga ya lwatibakiriri.

25 “Tiari kwe beno lwe ba yukuta bwawu bu, mu bungu ti mbo lubâ na nsatu.

“Tiari kwe beno luta seha bwawu bu, mu bungu ti mbo lubâ mu tiari mpe mbo ludila.

26 “Tiari kwe beno, bantu babansoni bu batâka bubote mu beno, mu bungu ti nkaka zawu ni bo kwa mpe zeri saka kwe mbikuri za bungungu.

27 “Kâ meno nilutêlele, beno luta wâ: Tatamaneno mu zolo mbeni zeno, mu sa bubote kwe bô baluyinaka, 28 mu sakumuna bô balulokaka, mu sambila mu bungu dia bô balufingaka. 29 Tala ti muntu ku kamuni mbata ku bundi dimosi, mu hana mpe bundi diakaka; mpe tala ti muntu bongele tinkuti tiaku tia zulu, kumuyiminandi tinkuti tiaku tia ku nsi. 30 Hana kwe muntu ni muntu wukulomba tima, mpe tala ti muntu bongele bima biaku, kumulombandi kakarisa.

31 “Mpe mio mi luzolo ti bantu bayirika mu beno, yirikeno mio mpe mu bungu dia bawu.

32 “Tala ti bô kwa baluzololo luzoloko, ngano ntia ndandu lubaka? Mu bungu ti bisumuki mpe bô kwa babazololo bazoloko. 33 Mpe tala ti mbote lusaka kwe bô balusaka mbote, ngano ntia ndandu lubaka? Bisumuki mpe ni bo bisaka. 34 Musamu wakaka, tala ti kwe bô balendi lu futa ludefesaka,* ntia ndandu lubaka? Bisumuki mpe kwe bisumuki bilendi ba futa badefesaka. 35 Kâ tatamaneno mu zolo mbeni zeno, mu sa mbote, mu defesa bu lulembo kêla ti balufuta; buna musendo’eno mbo wubâ wa wunene mpe mbo lubâ bala ba Wô Watomo Zangama, mu bungu ti wa mbote wena kwe bantu balembo tondaka na kwe bantu ba mbi. 36 Tatamaneno mu fwila tiari, ntiana Tata’eno bu kafwilaka tiari.

37 “Musamu wakaka, bîkeno mu fundisa, mpe ka balufundisa ko; bîkeno mu zengela mambu mpe ka baluzengela mambu ko. Tatamaneno mu lemvokela,* mpe mbo balulemvokela.* 38 Bêno na tifu tia hana, mpe bantu mbo baluhana. Mbo balutsamunina tikunku tia fwanana, tia komo, ti baningase na tia sampa mu tinkuti tieno. Mu bungu ti tidezolo ti lusarilaka mu deza bampwana’eno, ni tio kwa mpe baludezela.”

39 Ha manima wabahana tifwani: “Ngano timfwa-meso tilendi twarisa timfwa-meso? Ba bole mbo babwa mu bulu, ka buna ko? 40 Mulongoki ka wuyôkele’â mulongi’andi ko, kâ muntu ni muntu wu batomo longesaka mbo kabâ ntiana mulongi’andi. 41 Buna, mu bungu dia nti ta tarila kwa titîti tie mu disu dia mpangi’aku, kâ kuta mona titungu tie mu disu diaku ko? 42 Bwe lendi têla kwe mpangi’aku: ‘Mpangi’ani bîka nakatula titîti tie mu disu diaku,’ kâ nge beni kuta mona titungu tie naku mu disu ko? Ngungu! Toko katula titungu tie mu disu diaku, mpe buna mbo tomo mona bwe katurila titîti tie mu disu dia mpangi’aku.

43 “Mu bungu ti ka kwena muti wa mbote ko wubutaka mbutu za bola, mpe ka kwena muti wa bola ko wubutaka mbutu za mbote. 44 Muti ni muti mu mbutu zandi bazabilaka wo. Mu tifwani, ka batiaka fige ko mu muti wa nsende, mpe ka batiaka mbutu za vinu ko mu munsende-mpangala. 45 Muntu wa mbote misamu mia mbote kadukisaka mu timvwama tia mbote tia mutima’andi, kâ muntu wa mbi misamu mia mbi kadukisaka mu timvwama tiandi tia mbi, mu bungu ti mio mifulukaka mu mutima munwa ni mio kadukisaka.

46 “Buna, mu bungu dia nti lukuntâka ‘Mfumu! Mfumu!,’ kâ ka luyirikaka misamu mi nitâka ko? 47 Muntu ni muntu wukwiza kwe meno, wuwâ misamu miani mpe wusarila mio, mbo nilusongela na nani kafwanakane: 48 Fwanakane na muntu, mu tunga nzo timini bulu dia dila mpe tungiri bandu ha zulu tari. Mvula ya ngolo bu yibwiri, mamba ma nzari mizi botasa nzo yo, kâ ka bibêle’â ngolo ko mu ningasa nzo yo, mu bungu ti mu mpila ya mbote batungila yo. 49 Ku lweka lwakaka, wô wâ misamu miani mpe lembo mia sarila, fwanakane na muntu wutungiri nzo’andi ha zulu dielo, yilembolo na bandu. Mamba ma nzari mizi botasa nzo yo, mpe mbala mosi yibwiri mpe nzo yo yitomono beba.”