Bisalu bia Bantumwa
1 Tinsamu tia ntete ti natsoneka, ô Teofile, ni misamu miamiansoni mia sa Yezu na mi kalongesa tûka ku mbatukulu 2 tii mu tilumbu ti kanaka ku zulu, bu kamana hana ntumunu mu nzila ya mpeve santu kwe bantumwa ba kasôla. 3 Bu kamana mona mpasi, wabamonekena mbala zazingi ngatu bakwikila ti wa moyo weri. Bamumona bilumbu 40 bia mukaka, mpe Timfumu tia Nzambi keri ba zonzelaka. 4 Bu kakutakana na bawu, wabahana ntumunu eyi: “Ka lukatukandi ku Yerusaleme, kâ tatamaneno mu kêla tio ti lu kanisini Tata, ti lwawâ kwe meno; 5 mu bungu ti Za, wabatisa mu mamba, kâ beno mbo balubatisa mu mpeve santu ha manima ma mwa bilumbu.”
6 Buna bu bakutakana, bamuyula: “Mfumu, ngano ni mu ntangu yi ta karisa timfumu tia Israele?” 7 Wabatêla: “Ka wufwanane’â ko kwe beno mu zaba bilumbu Tata bi kasiri mu lutumu lwandi . 8 Kâ mbo lubaka ngolo mu ntangu mpeve santu yilukôkela, mpe mbo lubâ mbangi zani ku Yerusaleme, ku Yude yayansoni, ku Samaria, na tii ku titini tia nguria mala tia mutoto.” 9 Bu kamana tâ misamu mio, bu beri talaka ku zulu, wananguka mpe tuti diamuyabama ha meso mawu. 10 Mpe mu bungu ti zulu beri tatamanaka mu tala bu keri kwendaka, mbala mosi babakala bole balwata binkuti bia mpembe batelama ha lweka lwawu. 11 Mpe batâ: “Babakala ba ku Galile, mu bungu dia nti lutelamane hâ mu tala zulu? Yezu dio di bakaturi ha kati dieno mpe wele ku zulu, mpila mosi yi lumumweni yi kendele ku zulu ni bo mpe kakârila .”
12 Ha manima bakâla ku Yerusaleme bu batûka ku mongo wu batâka Mongo wa miti mia Olive, wê pene-pene na Yerusaleme ha titini kampe tia kilometre yimosi. 13 Bu batula, banaka ku shambre ya ku zulu ku beri bêlaka. Kûna, kweri na Piere, Za, Zaki na Andre, Filipe na Toma, Baretelemi na Matie, Zaki mwana wa Alefe, Simo wê na luhemo, na Yuda mwana wa Zaki. 14 Mu bumosi, ni beri tatamanaka mu sambila, tintwari na bakento bakaka na Maria nguri ya Yezu na mpangi za Yezu za zibakala.
15 Mu bilumbu bîna, Piere watelama ha kati dia bampangi (bantu kampe 120 bakutakana) mpe watâ: 16 “Babakala, bampangi, wafwanane ti matsonoko malungana, musamu mpeve santu wu kabikula mu nzila ya Davide mu bungu dia Yuda, yandi wayizi bâ ntwarisi ya bô bakanga Yezu. 17 Mu bungu ti bamukonta ha kati dieto mpe bamusôla mu sala tisalu ti. 18 (Ntiangu bakala dio kasumbiri musitu mu mfutulu yakondo buderede, wabwiri tia mutu, nitu’andi yatsalangane* mpe midia miandi miamiansoni miamwangane. 19 Musamu wo wayizi zabakana kwe bantu babansoni babâka ku Yerusaleme, ntiangu musitu wango batêle wo mu zu diawu, Akeldama wuzololo tâ, “Musitu wa menga.”) 20 Mu bungu ti watsonama mu buku dia Mikunga, ‘Bîka ti nzo’andi bayambirika yo, mpe ka mu bêlandi muntu,’ mpe ‘Bîka ti tisalu tiandi tia munkengi muntu wakaka kabonga tio.’ 21 Buna wufwanane ti ha kati dia babakala beri kwe yende na Mfumu Yezu ntangu zazansoni zi keri salaka bisalu biandi ha kati dieto, 22 batikila bateme’andi kwe Za tii mu tilumbu ti bamukatula ha kati dieto, wumosi mu babakala bo fweti kwizi bâ mbangi ya mvumbukulu’andi kwe ba fwa tintwari na beto.”
23 Buna bahana nkumbu zole, Yozefe wu beri tâka Baresabase, wu beri tâka mpe Yustuse, na Matiase. 24 Ha manima basambila ebu: “Ô Yehova* nge zebi mitima mia bantu babansoni, songela nani sôlele mu babakala eba ba bole 25 mu sala tisalu ti na mu bâ ntumwa ha tibuka tia yambirikiri Yuda mu kwenda ha tibuka tiandi.” 26 Buna bababurila madzeke, mpe basôla Matiase mpe bamuyika* mu mulonga wa ntumwa za 11.