Like

24 Kâ mu tilumbu tia ntete tia lumingu, bayenda mu nkatika pari ku mpiema, bu banata mananazi ma bakubika. 2 Kâ bamona ti tari dieri kangaka mpiema dia bavindumuna, 3 mpe bu bakota, ka bamona mvumbi ya Mfumu Yezu ko. 4 Bu balembo zaba nti baketi sa mu musamu wo, tala! babakala bole babâ na binkuti bieri hezimaka batelama pene-pene na bawu. 5 Bakento bâna bunkuta bwababaka, mpe batatamana mu kondamasa bidiri biawu, buna babakala bo babatêla: “Mu bungu dia nti luta dingila muntu wa moyo kwe ba fwa? 6 Kena kû ko, kâ vumbukiri kwe ba fwa. Bambukileno misamu mi kalutêla bu kabâ ku Galile, 7 bu katâ ti Mwana muntu bafweti mu teka ha moko ma bisumuki, mbo bamukanga ha poto mpe tilumbu tia bitatu mbo kavumbuka kwe ba fwa.” 8 Buna babambukila misamu mio, 9 bakatuka ku mpiema, mpe baye tâ misamu mio miamiansoni kwe ba 11 na kwe babansoni bakaka. 10 Mu bakento bo mweri Maria Magdala, Yoana na Maria nguri ya Zaki. Bakento bakaka mpe babâ na bawu misamu ni mio kwa beri tâka kwe bantumwa. 11 Kâ kwe bawu misamu mio mieri ntiana tâ-buna, mpe ka bazolo’â ko mu kwikila bakento.

12 Kâ Piere watelama mpe wadioka ntinu ku mpiema, bu kakondama wamona kwa binkuti bia line. Buna wakâla bu keri tiyulaka ntia misamu miatula.

13 Kâ tala! mu tilumbu tio kwa, milongoki miole mieri kwendaka ku hata di batâka Emayuse, dieri ha titini kampe tia kilometre* 11 na Yerusaleme, 14 mpe misamu mio miamiansoni miatula beri kwe zonzele bawu na bawu.

15 Bu beri zonzaka na bu beri yindulaka misamu mio, Yezu yandi beni wapusana mpe wabatika mu kwe yende na bawu, 16 kâ ka babâ na lenda ko dia mu zaba. 17 Wabatêla: “Ntia musamu luta kwe zonzele bu luta kwe yende?” Batelama na bidiri bia tiari. 18 Wumosi mu bawu wu beri tâka Kleopase wamutêla: “Ngano nge nzenza yena yibâka ha yandi kaka ku Yerusaleme, yilembolo zaba misamu mituriri bilumbu bi?” 19 Wabayula: “Ntia misamu?” Bawu bamutêla: “Misamu mia Yezu Musi-Nazarete, wasongele ha matu ma Nzambi na ma bantu babansoni ti mbikuri ya ngolo yabêle mu misamu mi kayirika na mu nzonzolo’andi; 20 mpe bwe mfumu zeto za banganga-nzambi na bamfumu bamuteka ngatu bamuzengela lufwa, mpe bamukoma ha poto. 21 Kâ lukwikulu lwabêle neto ti bakala di ni yandi waketi kwiza mu kûla Israele. Mpe musamu wakaka, ti ni tilumbu tia bitatu tûka bwa yilamane misamu mi. 22 Bakento bakaka mpe ha kati dieto batomono tu yitukusu, mu bungu ti ku mpiema beleke mu nkatika pari, 23 mpe bu balembolo mona mvumbi’andi, batêleke ti tima tia nzitukulu bamweni, mbazi zibatêleleke ti wa moyo wena. 24 Buna bakaka ha kati dieto beleke ku mpiema mpe bamweni misamu ntiana bu têleke mio bakento, kâ bawu ka bamumweni’â ko.”

25 Buna wabatêla: “Ô beno lukondolo ndwenga mpe lwe na mitima mie na mande mu kwikila misamu miamiansoni mia tâ bambikuri! 26 Ngano ka wafwanana ko ti Kristo kamona mpasi zo mu kota mu mukembo’andi?” 27 Mpe tûka Mose tii mbikuri zazansoni, wababangurila misamu mieri mu tarilaka mu Matsonoko mamansoni.

28 Ha manima, batula pene-pene na hata di beri kwendaka mpe wasa ntiana yandi weri kwendaka nguria mala. 29 Kâ bamusa tiya bu batâ: “Bâ na beto, mu bungu ti nkokela ntamana mbo yifwana mpe bwisi bweka yila.” Buna wakota mu nzo mu bâ na bawu. 30 Mpe bu keri diaka na bawu, wabonga dimpa, wasakumuna dio, wabukuna dio mpe wabahana dio. 31 Buna meso mawu matomo zibuka mpe bamuzaba, kâ wazimbakana ha matu mawu. 32 Mpe batâ bawu na bawu: “Ngano mitima mieto ka mibele’â lemaka ko mu tiya bu kabele tu zonzelaka mu nzila na bu kabele tomo tu bangurilaka Matsonoko?” 33 Mpe mu ntangu yo kwa batelama mpe bakâla ku Yerusaleme; mpe babwana ba 11 bavukana na bakaka, 34 beri tâka: “Diangana Mfumu wavumbukiri kwe ba fwa mpe wamonekene kwe Simo!” 35 Dieka bo bawu beni batâ misamu miayôka mu nzila, mpe bwe bayizi mu zabila bu kabukuna dimpa.

36 Bu beri tâka misamu mio, Yezu yandi beni waduka ha kati mpe wabatêla: “Bêno na tidzunu.” 37 Kâ mu bungu ti bunkuta bwabâ nawu mpe teketa beri teketaka, babanza ti mpeve bamona. 38 Buna wabatêla: “Mu bungu dia nti lwe na bunkuta, mpe mu bungu dia nti lwe na ntembe mu mitima mieno? 39 Taleno moko mani na malu mani, ni meno wena; kunsimbeno mpe moneno, mu bungu ti mpeve ka yena na musunia mpe na bihisi ko, ntiana kwa bu ndie na bio.” 40 Mpe bu keri tâka bo, wabasongela moko mandi na malu mandi. 41 Kâ mu bungu ti nkatika nsayi yabâ nawu mpe bayituku, ka beri’â lendaka ko mu kwikila misamu mio. Buna wabatêla: “Ngano tima tia dia tie neno kwawu kû?” 42 Buna bamuhana tibuku tia mbizi ya yoko. 43 Wabonga mpe wadia yo ha meso mawu.

44 Ha manima wabatêla: “Mi ni misamu mi nalutêla bu nabâ na beno ti misamu miamiansoni mi batsoneka mu meno mu Musiku wa Mose, mu Bambikuri na mu Mikunga mifweti lungana.” 45 Buna wababakisa mu tomo bakula nsasa ya Matsonoko, 46 mpe wabatêla, “Mi ni misamu mi batsoneka: Kristo wafweti mona mpasi mpe wafweti vumbuka kwe ba fwa mu tilumbu tia bitatu, 47 mpe mu nzila ya nkumbu’andi mbo baketi samuna nsobolo ya mabanza mu bungu dia mulemvo wa masumu kwe makanda mamansoni—batikila ku Yerusaleme. 48 Lufweti bâ mbangi za misamu mio. 49 Mpe tala! Tima tia kunkanisina Tata’ani nita lu tambikila. Kâ beno, bêno ku mumvuka tii bu lubaka ngolo zitûka ku zulu.”

50 Ha manima wabadukisa ku mumvuka mpe wabanata tii ku Betani, wananguna moko mandi mpe wabasakumuna. 51 Mpe bu keri ba sakumunaka, wayizi hambana na bawu mpe wananguka ku zulu. 52 Bakondama ha matu mandi mpe bakâla ku Yerusaleme, ba fuluka mu nsayi. 53 Mpe ntangu zazansoni mu tempelo beri, mu kembela Nzambi.