Bisalu bia Bantumwa
5 Bakala dimosi diabâ na nkumbu Ananiase na mukento’andi Safira, bateka mutoto’awu. 2 Kâ bakala dio mu mansweki, (mukento’andi wa kazaba) wasweka ndambu mbongo, mpe waye tûla zo zasâla ha malu ma bantumwa. 3 Kâ Piere wamutêla: “Ananiase, mu bungu dia nti bîkiri Satana kakutuma mu huna mpeve santu na mu lunda ndambu mbongo za musitu mu mansweki? 4 Ntete wateka musitu wo, ngano ka wabêle’â kwa wa nge ko? Mpe bu tekele wo, ngano kubêle’â na timpwanza ko tia sa mio mi zololo na mbongo zi bakiri? Mu bungu dia nti kubikiri musamu wa mpila yi mu mutima’aku? Ka bantu’â ko hunini, kâ Nzambi.” 5 Bu kawâ musamu wo, Ananiase wabwa mpe wafwa. Mpe bantu babansoni bawâ musamu wo bayizi bâ na bunkuta bwabwingi. 6 Bantwenia batelama, bazinga mvumbi milele, banata yo, mpe bazika yo.
7 Kampe 3 heure ha manima, mukento’andi wakota, ka zaba misamu miayôka ko. 8 Piere wamutêla: “Kuntêla, ngano mbongo ni zo kwa lutekelele musitu?” Yandi watâ: “Yee, ntalu ni yo.” 9 Buna Piere wamutêla: “Mu bungu dia nti luwisane beno bole mu tonta mpeve ya Yehova?* Tala! Malu ma bô bazikiri bakala diaku ha mwelo mena, mpe mbo bakunata ku mbazi.” 10 Hô nkatika bendo, wabwa ha malu mandi mpe wafwa. Bantwenia bu bakota, bamumona wa fwa, bamunata ku mbazi mpe bamuzika ha lweka lwa bakala diandi. 11 Buna, timvuka tiatiansoni na bô babansoni bayizi wâ misamu mio bayizi bâ na bunkuta bwabwingi.
12 Musamu wakaka, bantumwa bidimbu na bimangu biabingi batatamana mu sa ha kati dia bantu; mpe babansoni ha Veranda ya Salomo beri kutakanaka. 13 Wa matieleka, ni bu sa ti ka kwabâ muntu ko wabâ na butindi bwa bâ tintwari na bawu, bantu bubote bwawu beri zonzelaka. 14 Musamu wuyôkele, bantu beri kwikilaka mu Mfumu batatamana mu yikama, lutangu lwa babakala na lwa bakento lwayizi bâ lwalwingi. 15 Mbevo mpe beri nataka mu nzila za zinene, ni hô beri za tûlaka mu mfulu za fioti na mu bipoyi, ngatu Piere bu kayôka, na kani titîni tiandi tiabaka bantu bakaka. 16 Mpe pôka dia bantu dieri tûkaka mu mimvuka mie pene-pene na Yerusaleme diatatamana mu kwiza, mbevo beri nataka na bantu ba beri kwamisaka kwe mpeve za mbi, mpe babansoni bawu beri wasisaka.
17 Kâ mfumu-nganga-nzambi watelama na bô babansoni babâ na yandi, bô beri mu dibundu dia Basaduseye, mpe ba fuluka babâ mu timbanda. 18 Babwila* bantumwa, mpe babatûla mu boloko dia bantu babansoni. 19 Kâ mu mpimpa, mbazi ya Yehova yazibula mielo mia boloko, yabanata ku mbazi, mpe yatâ: 20 “Yendeno mpe telameno mu tempelo, mpe tatamaneno mu zonzela misamu miamiansoni mitariri luzingu lu kwe bantu.” 21 Bu bawâ musamu wo, bakota mu tempelo mu nkatika pari mpe babatika mu longesa.
Mfumu-nganga-nzambi na bô babâ nandi bu batula, batikisa tintwari Sanedre na timvuka tiatiansoni tia bakuluntu tia bala ba Israele mpe batambika bantu mu kwe bonga bantumwa ku boloko. 22 Kâ bapolisie bu batula, ka babamona mu boloko ko. Buna bakâla mpe bahana nsangu, 23 bu batâ: “Boloko dia kangama dibêle, mpe minkengi ha mielo mibêle, kâ bu tuziburi dio ka tumweni’â muntu mu kati ko.” 24 Kapitene ya tempelo na mfumu za banganga-nzambi bu bawâ misamu mio bayizi bâ na mabanza yeko-yeko, yula beri tiyulaka bwe musamu wo waketi sukisina. 25 Kâ muntu wayiza, mpe wabatêla: “Tala! Bantu ba lwatûriri mu boloko ku tempelo bena, mpe bantu bata longesa.” 26 Buna kapitene na bapolisie bandi banata bantumwa, kâ ka mu miangu’â ko, mu bungu ti bantu beri tînaka ntia babawinda matari.
27 Buna babanata, mpe babatelamasa ha matu ma Sanedre, mpe mfumu-nganga-nzambi wabayula biyuvu. 28 Watâ: “Tatomono lu yimina mu tatamana mu longesa mu nkumbu yo, mpe taleno! lufulusi Yerusaleme mu ndongosolo’eno, mpe nzengolo lubongele ya tûla menga ma bakala dio ha mutu’eto.” 29 Piere na ntumwa zakaka batâ: “Tufweti tumamana Nzambi bu ke mfumu kani tatumamana bantu. 30 Nzambi ya nkaka zeto wavumbula Yezu wu lwahonda bu lwamutûla ha poto.* 31 Nzambi wamuzangula ku koko kwandi kwa lubakala ngatu kabâ Ntwarisi na Muvukisi, mu hana nzila ku Israele mu soba mabanza na mu baka mulemvo wa masumu. 32 Mpe beto mbangi zena za misamu mio, kâ mpe na mpeve santu, Nzambi yi kaheni kwe bô bamutumamanaka bu kena mfumu.”
33 Bu bawâ bo, nkesi zababaka, mpe badinga mu ba honda. 34 Kâ Farize yimosi yeri na nkumbu Gamaliele yatelama mu Sanedre; mulongi wa Musiku wabâ wu beri tomo zitisaka kwe bantu babansoni, mpe walomba batoko dukisa bantu bo ku mbazi. 35 Ha manima wabatêla: “Babakala ba Israele, seno keba mu misamu mi luta zolo yirika kwe bantu bo. 36 Mu tifwani, Tedase watelama, mpe watâ ti yandi muntu wa mfunu weri, mpe bantu kampe 400 bayizi kota mu timvuka tiandi, kâ bamuhonda mpe bantu babansoni beri mu landaka bamwangana, mpe bayizi kuta. 37 Ha manima ma yandi, Yuda Musi-Galile watelama mu bilumbu bi beri tsonekesaka nkumbu, mpe bantu babingi beri kwe mu landi. Bakala dio mpe diayizi fwa, mpe bô babansoni beri kwe mu landi bamwangana. 38 Buna, mu misamu mita yôka lumbu ti nilutêlele: ka lukotandi misamu mia babakala bo, kâ ba bîkeno. Mu bungu ti tala ti tisalu tio tia bantu tiena mbo tibwa; 39 kâ tala ti tia Nzambi tiena, ka lulenda ko mu ba bwisa. Tala ti kâni, lulendi kwizi moneka ntiana’eti Nzambi Yandi beni luta nwanisa.” 40 Buna balanda malongi mo, batâ mbila bantumwa, babawinda bisikoti, babatuma mu lembo vutu zonzela nkumbu ya Yezu, mpe babayambula.
41 Buna bantumwa bakatuka ha matu ma Sanedre, mpe nsayi yabâ nawu mu bungu ti bababongela ntiana bantu bafwanana ti babavweza mu bungu dia nkumbu yo. 42 Mpe bilumbu biabiansoni mu tempelo na mu nzo na nzo, ka babîka ko, batatamana mu longesa na mu samuna nsangu za mbote zitariri Kristo, Yezu.