Marke
7 Bafarize na bitsoniki biakaka biatûka ku Yerusaleme bavukana he yandi. 2 Mpe bamona milongoki mia Yezu mieri diaka na moko ma mvindu, wuzololo tâ, moko ma balembo sukula.* 3 (Mu bungu ti Bafarize na Bayuda ka beri’â diaka ko, tala ti ka basukuri’â moko mawu ko tii mu makoto ma moko, mu tomo landa tikulu tia nkaka zawu, 4 mpe bu batûkaka ku zandu, ka balendi’â badia ko tala ti ka bayebele’â ko. Bikulu biabingi bie kô biakaka babaka mpe batomo landaka, ntiana bateme ya mbungu, ya mayuki na ya ndonga za kwivre.) 5 Buna Bafarize na bitsoniki bo bamuyula: “Mu bungu dia nti milongoki miaku milembo landilaka tikulu tia nkaka zeto, kâ badîlaka na moko ma mvindu?” 6 Wabatêla: “Bangungu, Izayi mpemba’andi bu kabikula mu beno, bu katsoneka: ‘Kanda di mu bikoba kwa dikunzangurilaka, kâ mitima miawu mala miena na meno. 7 Mpamba kwa bata tatamana mu kunsambila, mu bungu ti ntumunu za bantu kwa balongesaka.’ 8 Ntumunu ya Nzambi luyambirikaka mpe tikulu tia bantu lulandaka.”
9 Ha manima wavutu ba têla: “Na mayela mamansoni lukalaka ntumunu ya Nzambi mu landa tikulu tieno. 10 Mu tifwani Mose watâ: ‘Zitisa* tata’aku na nguri’aku,’ mpe ‘Wô zonzela tata’andi na nguri’andi mu mpila ya mbi* mbo bamuhonda.’ 11 Kâ beno ebu lutâka: ‘Tala ti muntu têle kwe tata’andi peleko kwe nguri’andi: “Bima biabiansoni bie nani na bilendi bâ mfunu kwe beno, bieka Korbane (wuzololo tâ, kabu diena di nkanisini kwe Nzambi),”’ 12 buna ka luta bîka ko ti kasa tima mu bungu dia tata’andi peleko nguri’andi. 13 Mu mpila yo lusiri ti Zu dia Nzambi dialembo vutu bâ mfunu mu bungu dia tikulu tieno ti lulongesaka kwe bantu. Mpe misamu miamingi mia mpila yo lusaka.” 14 Buna wavutu tâ mbila pôka dia bantu he yandi, mpe wabatêla: “Kungwirikileno beno bansoni mpe bakuleno nsasa ya misamu miani. 15 Ka kwena tima ko tie ku mbazi tikota mu muntu tilendi sa ti kabâ mvindu; kâ ni bima bidukaka mu muntu bisaka ti kabâ mvindu.” 16* ——
17 Bu bamana kota mu nzo mala na pôka dia bantu, milongoki miandi miamuyula biyuvu mu bungu dia tifwani tio. 18 Buna wabatêla: “Beno mpe ka lwena na mayela ko ntiana bawu? Ngano ka luzebi’â ko ti ka kwena tima ko ku mbazi tikotaka mu muntu tilendi sa ti kabâ mvindu, 19 mu bungu ti ka bikotaka mu mutima’andi ko, kâ mu moyo’andi, mpe ku kabine bikwendaka?” Mu mpila yo, wasongela ti bidia biabiansoni bia verela biena. 20 Wavutu tâ: “Ni bio bidukaka mu muntu bisaka ti kabâ mvindu. 21 Mu bungu ti ni mu kati dia mutima wa muntu mu dukaka mbanzulu za mbi: vukasa kwa nitu kulembolo delakana,* bwivi, tifu tia honda bantu, 22 bunsuza, tifu tia dienokena, nsalulu za miangu, bumbaki, ndiatulu ya nsoni na ya nko,* suka, bifingu kwe Nzambi, lulendo, na buzoba. 23 Bima biabiansoni ku kati bitûkaka mpe mbo bisaka ti muntu kabâ mvindu.”
24 Wakatuka kûna mpe wayenda ku tizunga tia Tire na tia Sido. Wakota mu nzo yimosi mpe ka zolo’â ko ti na kani muntu kazaba wo, kâ ka lenda ko mu swama. 25 Mbala mosi, mukento wumosi wabâ na mwana weri na mpeve ya mbi wayiza mpe wafukama ha malu mandi. 26 Mukento wo weri Greke, Musi-Siri wa ku Fenisi;* mpe watatamana mu mu lomba mu dukisa demo mu mwana’andi wa wukento. 27 Kâ Yezu wamutêla: “Ntete bîka bala bayukuta, mu bungu ti, ka bwena bubote ko mu bonga dimpa dia bala na mu tuba dio kwe bala ba mbwa.” 28 Kâ yandi wamuvuturila: “Yee, mfumu, kâ bala ba mbwa, mfumfula za mampa zibwisaka bala ku nsi’a meza badiaka.” 29 Buna wamutêla: “Mu bungu ti ni bo têle, yenda; demo yidukiri mu mwana’aku wa wukento.” 30 Dieka bo wayenda ku nzo’andi mpe wamona mwana wa fioti waseka ku mfulu, mpe demo yaduka.
31 Yezu bu kakâla ku tizunga tia Tire, wasabuka Sido tii ku mubu wa Galile, bu kayôkela ku tizunga tia Dekapole.* 32 Bamunatina bakala dimosi diafwa makutu, mpe dieri lembo zonzaka bubote. Bamulemberela mu mu tenseka moko. 33 Wamunata ha ndeko ha bawu kaka, mala na pôka dia bantu. Ha manima watûla milembo miandi mu makutu ma bakala dio, mpe bu kamana lobola mante, wamusimba ludimi. 34 Mpe wananguna meso ku zulu, wahumuna mu ngolo mpe wamutêla: “Efata,” wuzololo tâ, “Zibuka.” 35 Buna, makutu mandi mazibuka, ludimi lwandi ka lwasâla dema ko, mpe wabatika mu zonza bubote. 36 Dieka bo wabalomba mu lembo wa zonzela na kani kwe muntu, kâ bu keri ba yiminaka, bawu tatamana beri tatamanaka mu zonzela wo. 37 Diangana batomo yituku, mpe batâ: “Miamiansoni mi kasaka mia mbote miena. Siri ti bantu ba fwa makutu bawâ, mpe mababa mazonza.”