Wa ntete kwe Bisi-Korente
10 Bampangi, nzololo lwazaba ti, nkaka zeto zazansoni zabâ ku nsi’a tuti mpe babansoni bayôka ha kati dia mubu, 2 babansoni bababatisa mu Mose mu nzila ya tuti na ya mubu, 3 babansoni badia bidia bimosi bia timpeve 4 mpe babansoni banwa mamba mamosi ma timpeve. Mu bungu ti mu tari dia timpeve dieri kwe yende na bawu banwina mamba, mpe tari diango Kristo dieri monekesaka.* 5 Kâ, Nzambi ka yangalala ko mu babîngi ha kati diawu, ntiangu kabahonda ku sese.*
6 Tulendi baka malongi mu misamu mio, ngatu talembo bâ na nsatu ya bima bia mbi, ntiana bu basa bawu. 7 Ka tufweti’â tasambilaka biteki ko, ntiana bwa sa bakaka ha kati diawu; ntiana bu watsonama: “Bantu bazakala mu dia na mu nwa. Ha manima batelama mu yangalala.” 8 Ka tufweti’â tasa bunsuza* ko, ntiana bakaka bu basa bunsuza* ha kati diawu. Musamu wo wasa ti bantu 23 000 ha kati diawu bafwa mu tilumbu timosi. 9 Ka tufweti’â tatonta Yehova* ko, ntiana bwa sa bakaka ha kati diawu, mpe nioka zabahonda. 10 Ka tufweti’â taniunguta ko, ntiana bwa sa bakaka ha kati diawu, mpe bafwa mu bungu ti mbazi ya Nzambi* yabahonda. 11 Tulendi baka malongi mu misamu mio miatsonama mu tu lwengesa, beto tuta zinga mu ntangu zi za mansukina.
12 Buna bîka ti wô ta banza ti wa telama wena kasa keba mu lembo bwa. 13 Ka kwena ntontolo ko yiluturilaka, yilembo turilaka bantu babansoni. Kâ Nzambi wa kwikama wena mpe ka bîka ko ti lwabwabana na ntontolo yi lulendi lembo korela, mpe ntontolo bu yikwiza, mbo kakubika nzila ngatu lwakorela yo.
14 Ntiangu, beno ba ntomono zolo, diokeno nsambululu ya biteki. 15 Kwe beno nita zonzela ntiana kwe bantu bê na lenda dia swasikisa; beno beni tomoeno sungamana misamu mi ntêle. 16 Mbungu* ya lusakumunu yi tusakumunaka, ngano ka yena tintwari ko na menga ma Kristo? Dimpa di tubukunaka, ngano ka diena tintwari ko na nitu ya Kristo? 17 Mu bungu ti dimpa dimosi kwa diena, beto, ni bu sa ti babingi twena, nitu yimosi kwa twena, mu bungu ti beto bansoni dimpa dimosi kwa tukabanaka.
18 Taleno misamu mi yirikaka Israele ya tinsuni: Ngano bô badiaka mikayulu, ka bena tintwari ko na ziku?* 19 Buna, bwe nita tâ? Ngano tio ti baheni mu mukayulu kwe titeki ka tiena mfunu ko, peleko titeki ka tiena mfunu ko? 20 Kâni, kâ ebu nita tâ ti, bio bi hanaka makanda mu mukayulu, kwe bademo bahanaka bio, ka kwe Nzambi’â ko; mpe ka nita zolo ko ti lwabâ tintwari na bademo. 21 Ka lulendi’â lwanwa mbungu* ya Yehova* ko na mbungu ya bademo; ka lulendi’â lwabâ tintwari ko “ha meza ma Yehova”* na ha meza ma bademo. 22 Peleko ‘wê neto tatulumuna timbanda tia Yehova’?* Ka tumuyôkele’â ko mu ngolo, ka buna ko?
23 Nswa wê neto wa yirika misamu miamiansoni, kâ bima biabiansoni ka biena ndandu ko. Nswa wê neto wa yirika misamu miamiansoni, kâ misamu miamiansoni ka mitungaka ko. 24 Bîka ti muna muntu katatamana mu dinga, ka ndandu ya yandi beni’â ko, kâ ndandu ya muntu wakaka.
25 Dieno musunia ni musunia wu batekaka ku zandu, bu lulembo tiyula tiyuvu mu bungu dia ngindu’eno, 26 mu bungu ti ni “Yehova* vwiri mutoto na bima biabiansoni bie mû.” 27 Tala ti muntu wulembo kwikilaka lu tikisi mpe luzololo lwenda, dieno bima biabiansoni bi batûla ha matu meno bu lulembo tiyula tiyuvu mu bungu dia ngindu’eno. 28 Kâ tala ti muntu lu têlele, “Tima tiena ti baheni mu mukayulu,” ka ludiandi mu bungu dia muntu wulutêlele wo na mu bungu dia ngindu. 29 Ka nita zonzela ngindu’eno ko, kâ ya muntu wakaka. Diangana, mu bungu dia nti bafundisila timpwanza tiani mu ngindu ya muntu wakaka? 30 Tala ti mvuturiri Nzambi matondo, mu bungu dia nti bakunzonzela bubi mu bungu dia bidia bi nita mu vuturila matondo?
31 Dieka bo, tala ti dia luta dia peleko nwa luta nwa peleko tima tiakaka luta sa, seno miamiansoni mu bungu dia mukembo wa Nzambi. 32 Seno keba mu lembo kwizi bâ bima bitêsaka kuba kwe Bayuda, kwe Bagreke na kwe timvuka tia Nzambi, 33 ntiana kwa bu nita dinga mu tâ bantu babansoni nsayi mu misamu miamiansoni, bu nita lembo dinga ndandu ya me beni, kâ ya bantu babingi, ngatu bavûka.