Matie

7 “Bîkeno mu fundisa ngatu balembo lu fundisa; 2 mu bungu ti mpila yi lufundisilaka bampwana’eno, ni yo kwa mpe balufundisila, mpe tidezolo ti lusarilaka mu deza bampwana’eno ni tio kwa mpe baludezela. 3 Buna, mu bungu dia nti ta tarila kwa titîti tie mu disu dia mpangi’aku, kâ kuta mona titungu tie mu disu diaku ko? 4 Peleko bwe lendi têla kwe mpangi’aku: ‘Bîka nakatula titîti tie mu disu diaku,’ kâ nge beni titungu tie naku mu disu? 5 Ngungu! Toko katula titungu tie mu disu diaku, mpe buna mbo tomo mona bwe katurila titîti tie mu disu dia mpangi’aku.

6 “Ka luhanandi bima bia santu kwe bambwa, mpe ka lulosandi milunga mieno kwe bangulu, tala ti kâni mbo badiata mio mpe mbo balubalukila mu lu lwekesa.

7 “Tatamaneno mu lomba mpe mbo baluhana, tatamaneno mu dinga mpe mbo lubaka, tatamaneno mu konkota mpe mbo baluziburila; 8 mu bungu ti, wô lomba mbo bamuhana, wô dinga mbo kabaka mpe wô konkota mbo bamuziburila. 9 Diangana, nani ha kati dieno hana mwana’andi tari tala ti mu lombele dimpa? 10 Peleko tala ti mu lombele mbizi, ngano mbo kamuhana nioka? 11 Buna, tala ti beno lwe bankwa-mbi luzebi hana makabu ma mbote kwe bala beno, ngano Tata’eno die ku mazulu ka hana bima biyôkele bubote ko kwe bô bamulombaka bio?

12 “Dieka bo, miamiansoni mi luzololo bantu bayirika mu beno, beno mpe lufweti mia yirika mu bungu dia bawu. Diangana yo ni ndongosolo yayansoni ya Musiku na Bambikuri.

13 “Koteleno mu mwelo wa fioti, mu bungu ti nzila yinataka ku mfukulu ya sârila yena, mwelo’andi wa wunene wena, mpe babingi bakotelaka yo; 14 kâ nzila ya mfilangani,* mwelo’andi wa fioti wena, ku luzingu yinataka mpe bantu ka babingi’â ko babakaka yo.

15 “Seno keba mu mbikuri za bungungu zilukwizilaka mu tifwani tia bimeme, kâ ku kati mbulu* zena, zê na luwu lwa dia. 16 Mu mbutu zawu lubazabila. Ka batiaka mbutu za vinu ko mu munsende-mpangala, peleko fige mu muti wa nsende, ka buna ko? 17 Mpila mosi mpe muti ni muti wa mbote, mbutu ya mbote wubutaka, kâ muti ni muti wa bola, mbutu ya mbi wubutaka. 18 Muti wa mbote ka wulendi’â wabuta mbutu ya mbi ko, mpe muti wa bola ka wulendi’â wabuta mbutu ya mbote ko. 19 Muti ni muti wulembo butaka mbutu za mbote mbo bakwanga wo, mpe mbo batuba wo ku tiya. 20 Wa matieleka, mu mbutu zawu luzabila bantu bo.

21 “Ka bô babansoni’â ko bakuntâka ‘Mfumu, Mfumu,’ bakota mu Timfumu tia mazulu, kâ bô kwa basarilaka luzolo lwa Tata’ani die ku mazulu. 22 Muna tilumbu tîna babingi bakuntêla: ‘Mfumu, Mfumu ka mu nkumbu ya nge’â ko tabikuriri, ka mu nkumbu ya nge’â ko takumini bademo mpe ka mu nkumbu ya nge’â ko tasiri bimangu biabingi?’ 23 Mpe buna mbo nibatêla: ‘Kani kabwe ka niluzebi’â ko! Yendeno mala na meno, beno luvwezaka misiku!’

24 “Dieka bo, wô wâ misamu mi ntêle mpe sarila mio, mbo kabâ ntiana muntu wa ndwenga, wutungiri nzo’andi ha zulu tari. 25 Mvula ya ngolo yibwiri, niamba yiziri, mpe bitembo bia ngolo bipûpiri, kâ nzo yo ka yibwiri’â ko, mu bungu ti bandu diandi ha zulu tari disikamane. 26 Kâ, wô lembo wâ misamu mi ntêle mpe lembo mia sarila, mbo kabâ ntiana tizoba titungiri nzo’andi ha zulu dielo. 27 Mvula ya ngolo yibwiri, niamba yiziri, bitembo bia ngolo bipûpiri, mpe nzo yibwiri, yitomono mwangana.”

28 Yezu bu kamanisa mu tâ misamu mio, pôka dia bantu diayituku mu mpila’andi ya longesela, 29 mu bungu ti ntiana muntu wê na lutumu keri ba longeselaka, kâ ka ntiana bitsoniki biawu’â ko.