Marke
6 Wakatuka kûna mpe watula ku tizunga tiandi; milongoki miandi miamulanda. 2 Tilumbu tia Sabala bu tiatula, wabatika mu longesa mu sinagoge, mpe bantu babîngi beri mu wâka bayituku mpe batâ: “Bakala di kwe kabakiriri misamu mi? Mu bungu dia nti bamuhanini ndwenga za mpila yi? Mpe mu bungu dia nti bimangu bi, bita salama mu moko mandi? 3 Ka yandi’â ko tisari tia mabaya, mwana Maria mpe yaya dia Zaki, Yozefe, Yuda na Simo? Mpe bibusi biandi ka biena ha kati dieto ko?” Buna babatika mu tâ makuba mu bungu dia yandi. 4 Kâ Yezu wabatêla: “Mbikuri kwakwansoni bamuzitisaka, kâ ka ku tizunga tiandi’â ko, kwe kanda diandi na ku nzo’andi.” 5 Buna ka lenda ko mu sa bimangu kûna, diambu’eti ndambu mbevo zi kawasisa bu kabatenseka moko. 6 Diangana, watomo yituku mu kondo kwa timinu tiawu. Mpe wazungana mu mahata meri pene-pene mu longesa.
7 Watikisa bantumwa ba 12 mpe wabatika mu ba tambika bole-bole; wabahana lenda dia kuma mpeve za mbi. 8 Mpe wabalomba mu lembo nata tima mu bungu dia nzietolo, diambu’eti mbangala—ka banatandi dimpa, nkutu ya bidia na mbongo* mu bimpokoti biawu— 9 kâ balwata mapapa, mpe ka balwatandi binkuti* biole. 10 Yandi wavutu ba têla: “Kwakwansoni ku lukota mu nzo yimosi, bêno mûna tii bu lukatuka mbuka yo. 11 Kwakwansoni ku balembo lu bwana peleko ku balembo lu wirikila, bu luduka kûna kubuleno mfumfuta za malu meno ngatu tiabâ timbangi kwe bawu.” 12 Buna bayenda mpe basamuna ti bantu bafweti soba mabanza, 13 bakuma demo zazingi, bavinza mafuta kwe bantu babingi beri na bimbevo mpe babawasisa.
14 Mutinu Erode wawâ nsangu zo, mu bungu ti nkumbu ya Yezu yayizi zabakana, mpe bantu ebu beri tâka: “Za Tibatisi vumbukiri kwe ba fwa, ntiangu kê na ngolo za sa bimangu.” 15 Kâ bakaka ebu beri tâka: “Ni Eliya.” Mboko bakaka: “Mbikuri yena ntiana bambikuri ba ntama.” 16 Kâ Erode bu kawâ bo, watâ: “Za wu nazengese mutu, ni yandi vumbukiri kwe bafwa.” 17 Diangana ni Erode yandi beni watuma ti bakanga Za, mpe wamukanga misinga ku boloko mu bungu dia Erodiade mukento wa yaya’andi Filipe wukakwela. 18 Mu bungu ti Za ebu katâ kwe Erode: “Ka wena na nswa ko wa bonga mukento wa mpangi’aku.” 19 Buna Erodiade wamukangila diki mpe wadinga mu mu honda, kâ keri’â lendaka ko. 20 Mu bungu ti Erode Za keri tînaka, wazaba ti muntu wa sungama weri na wa santu, mpe yandi keri kengerelaka. Bu kamana mu wâ, ka zaba ko nti kafweti sa, kâ watatamana mu mu wirikila na nsayi.
21 Kâ Erodiade wabaka bweso bwa lungisa kani diandi mu ntangu Erode yi kasa salaka mu bungu dia tilumbu tiandi tia mbutukulu mpe watumisa mfumu za luyâlu, mfumu za binwani na bantu ba nsangu ba Galile. 22 Mpe mwana wa wukento wa Erodiade wakota, watina mpe watâ Erode nsayi na bô beri diaka* na yandi. Mutinu watâ kwe mwana wa wukento: “Kudomba bio biabiansoni bi zololo mpe mbo nikuhana bio.” 23 Yee, wamudîla mpe ndefi: “Biabiansoni bi kundomba, mbo nikuhana bio, tii kati-kati dia timfumu tiani.” 24 Buna waduka mpe watâ kwe nguri’andi: “Nti mfweti lomba?” Watâ: “Mutu wa Za Tibatisi.” 25 Hô nkatika bendo wayenda mu ntinu kwe mutinu mpe wasa ndombolo’andi bu katâ: “Nzololo wakungana bwawu bu mutu wa Za Tibatisi mu ndonga ya pesakana.” 26 Ni bu sa ti tiari tiatomo mu baka, mutinu ka zolo’â ko kamuyimina ndombolo’andi mu bungu dia ndefi zandi na mu bungu dia bantu ba katumisa. 27 Hô nkatika bendo, mutinu watambika wumosi wa bantu beri mu kêlaka mpe wamulomba mu nata mutu wa Za. Buna wayenda, wazenga mutu wa Za ku boloko 28 mpe wanata mutu’andi mu ndonga ya pesakana. Wahana wo kwe mwana mukento mpe mwana mukento wahana wo kwe nguri’andi. 29 Milongoki miandi bu miawâ bo, miaye bonga mvumbi’andi mpe batûla yo mu mpiema.
30 Bantumwa bavukana pene-pene na Yezu mpe bamutêla misamu miamiansoni mi basa na mi balongesa. 31 Mpe wabatêla: “Yizeno mu mbuka ya hengama ngatu lwahuma fioti.” Mu bungu ti bantu babingi beri kwizaka na beri kwendaka, ka babâ na ntangu ko ya dia. 32 Buna bayenda mu bato ha mbuka ya hengama ngatu babâ ha bawu kaka. 33 Kâ bantu babamona bu beri kwendaka mpe bantu babingi bayizi wa zaba. Buna mu mimvuka miamiansoni bantu badioka tii kûna mpe batula ntete bawu. 34 Bu kakôka mu bato, wamona yungi dia bantu mpe tiari tiamubaka mu bungu dia bawu, mu bungu ti beri ntiana bimeme bilembolo na muvungi. Buna wabatika mu ba longesa misamu miamingi.
35 Bwisi bu bwayila, milongoki miandi miapusana he yandi mpe miamutêla: “Ku mbuka ya hengama twena mpe bwisi buyiriri. 36 Ba karisa ngatu benda ku mahata ma manene na ma fioti mpe basumba bima bia dia.” 37 Wabavuturila: “Beno beni ba haneno bima bia dia.” Bawu bamutêla: “Ngano tufweti kwe sumba mampa ma denie* 200 mpe tabahana ngatu badia?” 38 Wabatêla: “Mampa ma kwa me neno? Yendeno lwatala!” Bu baye tala, bamutêla: “Mampa matanu na mbizi zole.” 39 Mpe walomba kwe bantu mu zakala ha matîti mu bikunku. 40 Buna bazakala mu bikunku bia bantu 100 na bia bantu 50. 41 Wabonga mampa matanu na mbizi zole, watala ku zulu mpe wasa lusambulu mu sakumuna bio. Ha manima wabukuna mampa, wahana mo kwe milongoki miandi ngatu bawu bakaba mo kwe bantu, mpe wakaba mbizi za zole kwe bantu babansoni. 42 Buna babansoni badia mpe bayukuta, 43 mpe bafulusa bitunga 12 bia bibuku bia mampa biasâla na mbizi. 44 Lutangu lwa bô badia mampa, beri babakala 5 000.
45 Ntangu fioti kwa ha manima, watâ kwe milongoki miandi mu naka mu bato ngatu batekela ku simu diakaka, mu nzila ya Betisayida, mu ntangu yandi beni yi keri karisaka pôka dia bantu. 46 Bu kamana hambana na bawu, wayenda ku mongo mu kwe sambila. 47 Bwisi bu bwayila, bato ha kati-kati dia mubu yeri; kâ yandi, yandi kaka wasâla ha mutoto. 48 Wamona ti mpasi beri monaka mu nata bato, mu bungu ti titembo mu mbuka yi beri kwendaka tieri tûkaka. Ntete bwisi bwatia,* ha mukanda mubu keri kwe yende mu kwenda kwe bawu, kâ waketi ba yôka. 49 Bu bamona ti ha mukanda mubu keri kwe yendele, babanza ti: “Timona-meso tiena!” Mpe bakawula mu ngolo. 50 Mu bungu ti babansoni yandi beri monaka, mpe bayituku. Kâ, hô nkatika bendo wabatêla: “Bêno na butindi! Meno wena; ka lubândi na bunkuta.” 51 Ha manima wanaka mu bato na bawu mpe titembo tialembama. Buna batomo yituku, 52 mu bungu ti ka babakula nsasa ya timangu tia mampa ko. Kâ mande mabâ nawu mu bakula.
53 Bu bamana sabuka, batula ku hata dia Genezarete mpe bakangamasa bato’awu pene-pene na mbuka yo. 54 Kâ buna kwa bu bakôka mu bato, bantu bazaba Yezu. 55 Badioka mu kwe hana nsangu ku tizunga tiatiansoni. Mpe bô babansoni bawâ nsangu zo, banata bantu beri ha zulu mfulu beri monaka mpasi. 56 Kwakwansoni ku keri kwe kote, ku mahata, ku mimvuka peleko ku mahata ma fioti, bantu beri na bimbevo beri nataka ha zandu, mpe yandi beri lemberelaka mu simba kwa nsongi ya tinkuti tiandi tia zulu, mpe bô babansoni basimba tio bawasa.