Matie

22 Yezu wavutu sarila bifwani mu ba zonzela, watâ: 2 “Timfumu tia mazulu balendi tia fwanakasa na mutinu wasa malaki ma makwela ma mwana’andi wa bakala. 3 Mpe watambika bisari biandi mu tâ mbila bô ba batikisa ku malaki ma makwela, kâ bakala mu kwiza. 4 Watambika bisari biakaka bu katâ, ‘Têleno bantu ba batikisi: Taleno! Bidia nkubikiri, ngondele ngombe zani na bibulu biani bie na mafuta, mpe biabiansoni bia kubama biena. Yizeno ku malaki ma makwela.”’ 5 Kâ ka bakipa wo ko, wumosi wayenda ku musitu’andi, mboko wakaka ku nkari’andi; 6 kâ bakaka babwila bisari biandi, babamwisa mpasi mpe babahonda.

7 “Mutinu nkesi zamubaka. Watambika binwani biandi, bahonda bantu bâna mpe bayoka mumvuka’awu. 8 Ha manima watâ kwe bisari biandi: ‘Malaki ma makwela ma kubama mena, kâ bantu ba batikisi ka bafwanane’â ko mu bâ ku malaki. 9 Buna, yendeno mu nzila zidukisaka mu mumvuka, mpe tikiseno bantu babansoni ba lumona ku malaki ma makwela.’ 10 Bisari biayenda mu nzila mpe biakutakasa bô babansoni ba bamona, ba mbote na ba mbi; mpe nzo yi beri silaka malaki yafuluka mu bantu beri diaka.*

11 “Mutinu bu kakota mu taluzula bantu ba batikisa, wamona bakala dimosi dialwata binkuti bialembo delakana na makwela. 12 Buna yandi wamutêla: ‘Mpwana’ani, bwe siri mu kota kû na binkuti bilembolo delekana na makwela?’ Yandi ka tâ musamu ko. 13 Buna mutinu watâ kwe bisari biandi: ‘Mu kangeno moko na malu mpe mu tubeno ku mbazi kwe mpimpa ya ngolo. Ni kô kadirila mpe kakwetesela mêno mandi.’

14 “Mu bungu ti babingi batikisi, kâ bake basôlele.”

15 Buna Bafarize bayenda mpe batâ mfundu ngatu bamutambakasa mu nzonzolo’andi. 16 Buna batambika milongoki miawu, tintwari na bantu ba Erode, batâ: “Mulongi, tuzebi ti matieleka tâka, mpe nzila ya Nzambi longesaka na matieleka, kudingaka ko ti bantu bakutambula, mu bungu ti kutalaka kwa mpila yi monekenaka bantu ko. 17 Tu têla’eti, bwe ta banza? Ngano wa delakana wena mu futa mpaku kwe Sezare peleko kâni?” 18 Kâ Yezu mu bungu ti wabakula mbi’awu, watâ: “Mu bungu dia nti luta kuntontela, bangungu? 19 Kunsongeleno mupata wu bafutilaka mpaku.” Bamunatina denie yimosi. 20 Wabayula: “Tidiri ti na bitsono bi bia nani biena?” 21 Bavutula: “Bia Sezare.” Buna wabatêla: “Dieka bo, kariseno bima bia Sezare kwe Sezare, kâ bima bia Nzambi kwe Nzambi.” 22 Bu bawâ bo bayituku, bamusisa mpe bayenda.

23 Tilumbu tîna, Basaduseye batâka ti ka kwena mvumbukulu ya ba fwa ko, bayiza mpe bamuyula: 24 “Mulongi, Mose watâ: ‘Tala ti muntu wufwiri mpe ka sisiri’â bala ko, mpangi’andi fweti kwela mukento’andi ngatu kabutila yaya’andi bala.’ 25 Kweri na mpangi 7 za bakala ha kati dieto. Wa ntete wakwela mpe wafwa, kâ mu bungu ti ka sa buta ko, wasisa mukento’andi na mpangi’andi. 26 Misamu ni bo kwa mpe miayôkela mu bungu dia mpangi ya nzole, ya ntatu, tii kwe ba 7 babansoni. 27 Ku nsuka mukento wayizi fwa. 28 Buna ku mvumbukulu ya ba fwa, mu ba 7, mukento wa nani wubâ? Mu bungu ti babansoni bamukwela.”

29 Yezu wabavuturila: “Wubakana luta wubakana, mu bungu ti ka luzebi’â Matsonoko na ngolo za Nzambi ko; 30 mu bungu ti ku mvumbukulu ya ba fwa babakala ka bakwela ko mpe bakento ka babahana mu makwela ko, kâ mbo babâ ntiana bambazi ku zulu. 31 Mu musamu wutariri mvumbukulu ya ba fwa, ngano ka lwatanga misamu mia lu têla Nzambi ko, bu katâ: 32 ‘Meno ni Nzambi ya Abrahame, Nzambi ya Izake, na Nzambi ya Yakobe’? Kena Nzambi ya bantu ba fwa ko, kâ ya bantu ba moyo.” 33 Bu diawâ misamu mio, pôka dia bantu diayituku mu ndongosolo’andi.

34 Bafarize bu bawâ ti wakangisa Basaduseye minwa, babansoni bayiza ha timosi kwe yandi. 35 Mosi mu bawu, watomo zaba Musiku, wamuyula mu mu tonta: 36 “Mulongi, ntia ntumunu yiyôkele mu Musiku?” 37 Wamutêla: “‘Fweti zolo Yehova Nzambi’aku mu mutima’aku wawansoni, mu tilundi* tiaku tiatiansoni na mu mabanza maku mamansoni.’ 38 Yo ni ntumunu ya ntete na yiyôkele. 39 Ya nzole yimudelakane ni eyi: ‘Fweti zolo mpwana’aku ntiana nge beni.’ 40 Musiku na Bambikuri ni mu ntumunu zo za zole bisikamane.”

41 Mu bungu ti Bafarize tintwari beri, Yezu wabayula: 42 “Ntia mabanza me neno mu Kristo? Ngano mwana wa nani wena?” Bamutêla: “Wa Davide.” 43 Wabayula: “Buna mu bungu dia nti, mu lutumu lwa mpeve santu, Davide kamutâ Mfumu, bu katâ: 44 ‘Yehova têle kwe Mfumu’ani: “Zakala ku lubakala lwani tii bu nitûla mbeni zaku ku nsi’a malu maku”’? 45 Dieka bo, tala ti Davide Mfumu kata mu tâ, bwe kalendi vutu bêla mwana’andi?” 46 Na kani muntu wabâ na lenda dia mu karisila mvutu, mpe tûka tilumbu tîna, muntu kâni wavutu dinga mu mu yula tiyuvu.