Matie

10 Buna watikisa milongoki miandi mia 12, wabahana lenda dia kuma mpeve za mbi na dia wasisa bimbevo na bifuma bia mpila na mpila.

2 Nkumbu za ntumwa za 12 ni ezi: Wa ntete, Simo, wu batâka Piere, na mpangi’andi Andre; Zaki mwana Zebede na mpangi’andi Za; 3 Filipe na Baretelemi, Toma na Matie totaka mpaku; Zaki mwana Alefe na Tade; 4 Simo Musi-Kana* na Yuda Iskariote wamuteka ha manima.

5 Yezu watambika ba 12, mpe wabahana ntumunu ezi: “Ka lwendandi kwe bantu ba makanda makaka, mpe ka lukotandi ku mimvuka mia Samaria; 6 Kâ, tatamaneno mu kwenda kwe bimeme biawumuka bia kanda dia Israele. 7 Bu lukwe yende, yendeno samuni ebu: ‘Timfumu tia mazulu tieka pene-pene.’ 8 Wasiseno bambevo, vumbuleno bantu ba fwa, tsemeseno bankwa-bwazi, kumeno bademo, bia mpamba lwabaka haneno bia mpamba. 9 Ka lunatandi ore peleko arza na kwivre mu bimpokoti* bieno, 10 peleko nkutu ya bidia mu bungu dia nzietolo, binkuti biole,* mapapa peleko mbangala, mu bungu ti tisari fweti baka bidia biandi.

11 “Mumvuka ni mumvuka peleko hata ni hata di lukota, dingeno wô fwanane, mpe tatamaneno mu bâ kô tii bu lukwenda. 12 Bu lukota mu nzo, haneno bankwa nzo mbote. 13 Tala ti bantu ba nzo yo bafwanane, bîka ti tidzunu ti luta ba kekolo tiabâ nawu, kâ tala ti ka bafwanane’â ko, bîka ti tidzunu tieno tialukârila. 14 Kwakwansoni ku balembo lu bwana peleko ku balembo wirikila nsangu zeno, bu luduka mu nzo yo peleko ku mumvuka wo, kubuleno mfumfuta za malu meno. 15 Wa matieleka nita lu têla, mu tilumbu tia mfundusu, nsembolo ya mumvuka wo mbo yiyôka ya Sodome na Gomore.

16 “Tala! beno nita tambika ntiana bimeme ha kati dia bambulu;* seno keba ntiana nioka, mpe bêno bantu balembolo zaba misamu ntiana mabembe. 17 Seno keba mu bantu, mu bungu ti mbo balunata ku tribinale za fioti mpe mbo baluzwanda bisikoti mu sinagoge zawu. 18 Mbo balunata ha matu ma baguvernere na mitinu mu bungu dia meno, ngatu tiabâ timbangi kwe bawu na kwe makanda. 19 Kâ, bu balufundisa ka lubândi na lwaka mu bungu dia misamu mi lutâ na mu mpila yi lutêla mio, mu bungu ti misamu mi lutâ mbo baluhana mio mu ntangu yo; 20 mu bungu ti ka beno’â ko kwa luzonza, kâ ni mpeve ya Tata’eno yizonza mu nzila ya beno. 21 Musamu wakaka, muntu mbo kahondesa mpangi’andi peleko yaya’andi, tata mbo kahondesa mwana’andi, bala mbo batelamana bibuti biawu mpe mbo babahondesa. 22 Mpe bantu babansoni mbo baluyina mu bungu dia nkumbu’ani, kâ wô korela tii ku nsuka mbo kavûka. 23 Bu balukwamisa ku mumvuka wumosi, diokeno ku mumvuka wakaka, mu bungu ti wa matieleka nita lu têla, kani kabwe ka lumanisa mu zungana mimvuka miamiansoni mia Israele ko tii Mwana muntu bu kakwiza.

24 “Mulongoki ka wuyôkele’â mulongi’andi ko, mpe ngamba ka yiyôkele’â mfumu’andi ko. 25 Wufwanane kwa mulongoki kabâ ntiana mulongi’andi, mpe ngamba ntiana mfumu’andi, tala ti batêle mfumu ya nzo Belzebube,* ngano bantu ba mu nzo bwe babatâ? 26 Dieka bo, ka lubatînandi mu bungu ti ka kwena tima tia yabama ko ti balembo kwizi dzukula, mpe ka kwena tima tia swekama ko ti lembo kwizi zabakana. 27 Mio mi nita lu têla ku mpimpa, têno mio mu mutsamina, mpe mio mi luta wâ mu mansweki, samuneno mio ku zulu miluri. 28 Mpe ka lutînandi bô balendi honda nitu, kâ balendi lembo honda tilundi;* kâ tîneno wô lendi honda tilundi na nitu ha timosi ku Zehene.* 29 Ngano ka batekaka bindia-makonko biole ko mu mupata wulembolo na ntalu yayingi?* Kâ, na kani timosi mu bawu tibwa ha mutoto tala ti Tata’eno ka zebi’â wo ko. 30 Nsuki zazansoni za mutu’eno mpe za kazebi lutangu. 31 Buna, ka lubândi na bunkuta, bindia-makonko biabingi luyôkele mu ntalu.

32 “Buna wô singasa ha matu ma bantu ti mulongoki’ani wena, meno mpe mbo nisingasa ha matu ma Tata’ani die ku mazulu ti mulongoki’ani wena. 33 Kâ wô kunkala ha matu ma bantu, meno mpe mbo nimukala ha matu ma Tata’ani die ku mazulu. 34 Ka lubanzandi ti tidzunu neti ha mutoto, ka neti’â tidzunu ko, kâ mbele. 35 Mu bungu ti ndiziri mu tûla tihambula ha kati dia mwana wa bakala na tata’andi, mwana wa wukento na nguri’andi, mukento wa kwela na buko bwandi. 36 Diangana, mbeni za muntu mbo zibâ bantu ba kanda dia yandi beni. 37 Wô tomono zolo tata’andi peleko nguri’andi yôka meno, ka kumfwanane’â ko, mpe wô tomono zolo mwana’andi wa bakala peleko wa wukento yôka meno, ka kumfwanane’â ko. 38 Wô lembo tambula poto diandi dia matimuna* mpe lembo kundanda, ka kumfwanane’â ko. 39 Wô dinga mu vûkisa tilundi* tiandi, mbo kahombesa tio, mpe wô hombesa tilundi tiandi mu bungu dia meno, mbo kavûkisa tio.

40 “Wô lu bwana, kumbweni mpe, mpe wô kumbwana, bweni mpe wô wakuntambikiri. 41 Wô bwana mbikuri mu bungu ti mbikuri yena, mbo kabaka musendo wa mbikuri; mpe wô bwana muntu wa sungama mu bungu ti wa sungama wena, mbo kabaka musendo wa muntu wa sungama. 42 Wa matieleka nita lu têla, wô hana kopa dia mamba ma tiozi kwe wumosi mu bantu eba ba kuluka,* mu bungu ti mulongoki’ani wena ka hombesa musendo’andi ko.”