Matie

23 Ha manima, Yezu wazonza kwe pôka dia bantu na kwe milongoki miandi, bu katâ: 2 “Bitsoniki na Bafarize ha tibuka tia Mose bazakale. 3 Buna, seno misamu miamiansoni mi balutêla, kâ ka ludiatilandi ntiana bawu, mu bungu ti ka basarilaka misamu mi batâka ko. 4 Matsulu ma dema bakangaka mpe batûlaka ha mahembo ma bantu, kâ bawu beni ka bazololo’â ko mu ningasa mo mu milembo miawu. 5 Bisalu biabiansoni bi basalaka ni mu timonekesa kwe bantu, kese zawu za fioti bayikaka bunene zê na Matsonoko mpe balwataka mu tikengerela, mboko nsongi za binkuti biawu bayikaka bula. 6 Mbuka za nguria mfunu* bazoloko bu badiaka mu nkokela na chaise za ntete mu sinagoge, 7 mpe bazololo babahanaka mbote ha zandu, mboko bantu babatâka Rabi.* 8 Kâ beno, ka ludingandi ti balutâ Rabi, mu bungu ti Mulongi wumosi kwa wê neno, mpe beno bansoni bampangi lwena. 9 Musamu wakaka, ka lutândi na kani muntu ha mutoto tata’eno, mu bungu ti Tata dimosi kwa die neno, ni dio die ku zulu. 10 Ka ludingandi mpe ti balutâ mfumu, mu bungu ti Mfumu yimosi kwa ye neno, ni Kristo. 11 Kâ wô yôkele nsangu ha kati dieno fweti bâ tisari tieno. 12 Muntu ni muntu wutizangula mbo bamubetola, mpe muntu ni muntu wutibetola mbo bamuzangula.

13 “Tiari kwe beno Bitsoniki na Bafarize, bangungu! mu bungu ti bantu lukangilaka nzila ya Timfumu tia mazulu; beno beni ka lukota mo ko, kâ bô bata dinga mu kota luta kanga nzila. 14⁠ ——

15 “Tiari kwe beno Bitsoniki na Bafarize, bangungu! mu bungu ti nzietolo lusaka mu mubu na ha mutoto mu sa ti nzenza yimosi yatambula dibundu dia Bayuda, mpe bu kamana dia tambulaka, mbo lusaka ti kabâ muntu wukwenda ku Zehene* mbala zole yôka beno.

16 “Tiari kwe beno, ntwarisi zafwa meso, lutâka: ‘Tala ti muntu diri ndefi mu tempelo, ka wena musamu ko; kâ tala ti muntu diri ndefi mu ore ya tempelo, fweti ya zitisa.’ 17 Bizoba na bimfwa-meso! Ngano nti biyôkele mfunu, ore peleko tempelo yisantukisi ore? 18 Ebu mpe lutâka: ‘Tala ti muntu diri ndefi mu ziku,* ka wena musamu ko; kâ tala ti muntu diri ndefi mu kabu die ha zulu ziku,* fweti ya zitisa.’ 19 Bimfwa-meso! Ngano nti biyôkele mfunu, kabu peleko ziku* disantukisaka kabu? 20 Buna, wô dia ndefi mu ziku,* ni mu nkumbu ya ziku* na ya bima biabiansoni bie ha zulu ziku* kata ya dîla; 21 mpe wô dia ndefi mu tempelo, ni mu nkumbu ya tempelo na ya Wô bêlaka mu tempelo kata ya dîla; 22 mboko wô dia ndefi mu zulu, ni mu muyâlu wa Nzambi na ya Wô zakalale wo kata ya dîla.

23 “Tiari kwe beno Bitsoniki na Bafarize, bangungu! mu bungu ti tikunku timosi-timosi luhanaka mu bikunku bia 10 bia mente, bia anete na bia cumin, kâ ka lukipaka misamu mia nguria mfunu ko mia Musiku, ntiana buderede, tiari na nkwikamanu. Wufwanane mu sa bima bio, mpe lwalembo zimbakana bio biakaka. 24 Ntwarisi zafwa meso zikênzaka lubu, kâ ziminaka shamo.

25 “Tiari kwe beno Bitsoniki na Bafarize, bangungu! mu bungu ti kopa na ndonga lusukulaka ku mbazi, kâ mu kati bia fuluka biena mu dienokena* na mu kondo kwa tiyimina. 26 Farize zafwa meso, tokoeno sukula kopa na ndonga mu kati, ngatu ku mbazi mpe kwabâ kwa tsema.

27 “Tiari kwe beno Bitsoniki na Bafarize, bangungu! mu bungu ti ntiana mpiema zi balengele mpemba lwena, zimonekaka za toma ku mbazi, kâ ku kati za fuluka zena mu bihisi bia bantu ba fwa na mu mvindu za mpila na mpila. 28 Mpila mosi mpe, ku mbazi ba sungama lumonekaka, kâ ku kati bungungu bwabwingi bwe neno mpe misiku luvwezaka.

29 “Tiari kwe beno Bitsoniki na Bafarize, bangungu! mu bungu ti mpiema za bambikuri lutungaka mpe mpiema za bantu ba sungama lutomesaka, 30 mpe ebu lutâka: ‘Tala ti mu ntangu ya nkaka zeto tabâ, ka taketi’â sa tintwari na bawu ko mu tsamuna menga ma bambikuri.’ 31 Buna, beno beni lutomono songela ti beno ni bala ba bô bahonda bambikuri. 32 Dieka bo, fuluseno tidezolo tia nkaka zeno.

33 “Nioka, bala ba mpiri, bwe lulendi diokela mfundusu ya Zehene?* 34 Ntiangu nita lu tambikila bambikuri, bantu ba ndwenga na milongi. Bakaka mbo lubahonda mpe mbo lubakanga ha mapoto, bakaka mbo lubazwanda bisikoti mu sinagoge zeno mpe mbo lubakwamisa mu mimvuka miamiansoni, 35 ngatu menga mamansoni ma bantu ba sungama matsamuka ha mutoto miza ha mitu mieno, tûka menga ma Abele weri wa sungama tii menga ma Zakari, mwana Baraki, wu lwahonda ha kati dia mbuka ya santu na ziku.* 36 Wa matieleka nita lu têla, misamu mio miamiansoni mbo miturila mbandu yi.

37 “Yerusaleme, Yerusaleme, hata dihondaka bambikuri mpe diwindaka matari kwe bô ba bamutambikilaka​—⁠mbala zikwa kwa nadinga mu kutika bala baku ntiana bu kutika nsusu bala bandi ku nsi’a mahayi mandi! Kâ ka lwazolo’â ko. 38 Tala! Nzo’eno balusisiriri yo.* 39 Mu bungu ti wa nita lu têla, ka luvutu’â ku mona ko na tii bu lutâ: ‘Kabâ wa sakumunu yandi ta kwiza mu nkumbu ya Yehova!’”