Bisalu bia Bantumwa
11 Bantumwa na mpangi zeri ku Yude bawâ ti bantu ba makanda mpe batambula zu dia Nzambi. 2 Buna Piere bu kanaka ku Yerusaleme, bantu bakangama mu musiku wa zengoso sutu babatika mu mu zonzela mu mpila ya mbi,* 3 bu batâ: “Nge wakotele mu nzo ya bantu balembo zengoso masutu, mpe wadiri na bawu.” 4 Buna Piere wabatika mu ba bangurila musamu wumosi-wumosi bu katâ:
5 “Ku mumvuka wa Zope nabêle bu nabele sambilaka, mpe mu timona-meso, namweni tima* ntiana titenda tia tinene tia line ti basimbiri mu nsongi za ziyà tiabele kôkaka ha mutoto, mpe tiayiziri kwe meno. 6 Bu natomono tala mu kati, namweni bibulu bie na malu mayà bia mutoto, bibulu bia sangi, bibulu bikwe yendele mu moyo na nuni za ku zulu. 7 Nawîri mpe zu diakuntêlele: ‘Piere, telama, honda mpe dia!’ 8 Kâ natêle: ‘Kani kabwe Mfumu, mu bungu ti mu munwa’ani ka mweka’eti kota tima tia ntonto ko peleko tia mvindu.’ 9 Mbala ya nzole, zu diatûkiri ku zulu diavuturi: ‘Bîka mu tâ ntonto bima Nzambi bi katsemese.’ 10 Zu diavutulu wakana mbala ya ntatu, mpe bima biabiansoni biavutulu kâla ku zulu. 11 Mu ntangu yo kwa, babakala batatu batelamane ha matu ma nzo yi tabêle, tûka ku Sezarea babatambikiri mu kundinga. 12 Ha manima, mpeve yakuntêlele mu kwenda na bawu mpe ka nisandi na kani ntembe. Kâ mpangi zi za 6 mpe zayiziri na meno, mpe takotele mu nzo ya Korneye.
13 “Watutêlele bwe kamweni mbazi yatelamane mu nzo’andi mpe yatêle: ‘Tambika babakala ku Zope mu tumisa Simo, yandi wu batâka Piere, 14 mpe mbo kakutêla misamu milendi lu vûkisa nge na bantu babansoni ba mu nzo’aku.’ 15 Kâ bu nabatikiri mu zonza, mpeve santu yakôkele kwe bawu ntiana kwa bu yatukôkela ku mbatukulu. 16 Buna nabambukiri misamu mia Mfumu, bu keri tâka: ‘Za wabatisa mu mamba, kâ beno mbo balubatisa mu mpeve santu.’ 17 Tala ti Nzambi wabaheni kabu dia mpamba ntiana kwa bu kahana dio kwe beto takwikila mu Mfumu Yezu Kristo, meno nani ndiena mu kabakasa Nzambi?”*
18 Bu bawâ misamu mio, babîka mu sa ntembe, mpe bakembela Nzambi bu batâ: “Dieka bo, Nzambi heni mpe bweso kwe bantu ba makanda mu soba mabanza ngatu babaka luzingu.”
19 Bô bamwangana mu bungu dia mpasi zatulumuka ha manima ma lufwa lwa Etiene, bayenda tii ku Fenisi, ku Sipre na ku Antioshe, kâ kwe Bayuda kwa beri samuninaka zu. 20 Kâ babakala bakaka ba ku Sipre na ba ku Sirene bayiza ku Antioshe mpe babatika mu zonza na bantu bazonzaka Greke, bu beri ba samuninaka nsangu za mbote zitariri Mfumu Yezu. 21 Mu bungu ti koko kwa Yehova* na bawu kweri, bantu babingi bayizi kwikila mpe babatika mu landa Mfumu.
22 Misamu mi beri tâka mu bawu, miatula mu makutu ma timvuka tia Yerusaleme, mpe batambika Barnabase ku Antioshe. 23 Bu katula mpe bu kamona bweso bwa nzitukulu bwa Nzambi, wayangalala mpe wabatika mu ba tindisa babansoni mu tatamana mu kangama kwe Mfumu mu mutima wumosi; 24 mu bungu ti muntu wa mbote wabâ, mpe wa fuluka mu mpeve santu na mu timinu. Mpe bantu babingi bayizi kwikila mu Mfumu. 25 Buna wayenda ku Tarse mu dinga Saule kwakwansoni. 26 Bu kamana mu baka, wamunata ku Antioshe. Buna mvula yimosi ya mukaka, na mpangi za timvuka beri kutakanaka, mpe balongesa pôka dia bantu, mpe ni ku Antioshe batâ milongoki Bakristo mu mbala ya ntete, mu lutwalusu lwa Nzambi.
27 Mu bilumbu bîna, mbikuri zatûka ku Yerusaleme mu kôka ku Antioshe. 28 Wumosi mu bawu weri na nkumbu Agabuse watelama, mpe mu nzila ya mpeve wabikula ti nsatu ya yinene yaketi tula ha mutoto wawansoni. Diangana, musamu wo wayilama mu ntangu ya Klode. 29 Buna, tintwari na lenda diawu, milongoki miabonga nzengolo ya tambikila mpangi za ku Yude bima biaketi ba bakisa; 30 mpe ni bo basila, bu batambika bio kwe bakuluntu mu nzila ya Barnabase na Saule.