Matie

25 “Buna Timfumu tia mazulu balendi tia fwanakasa na ndumba* 10 zibongele minda miawu mpe zidukiri mu bwabana na bakala di bakwela. 2 Batanu babâ bizoba mpe batanu babâ na mayela.* 3 Bizoba biabonga minda kâ ka bianata mafuta ko, 4 kâ ba mayela babonga mafuta mu mbwata zawu na minda ha timosi. 5 Mu bungu ti bakala di baketi kwela ka kulu’â kwiza ko, babansoni tolo twababaka mpe baseka. 6 Ha kati-kati dia mpimpa bantu bakawula: ‘Bakala dilukwela edi ni diawu! Dukeno lwamubwana.’ 7 Buna ndumba zo zazansoni zavumbuka mpe zakubika minda miawu. 8 Ndumba za bizoba zatâ kwe ndumba za mayela: ‘Tu haneno ndambu mafuta, mu bungu ti minda mieto ntamana mbo mifwa.’ 9 Ndumba za mayela zavutula: ‘Kampe ka matulungila ko beno na beto. Yendeno kwe bô batekaka mpe sumbeno ma beno beni.’ 10 Bu baye ma sumba, bakala di baketi kwela diatula. Ndumba zeri za kubama zakota na yandi mu sa malaki ma makwela, mpe bakanga mwelo. 11 Ha manima ndumba zo zakaka zayiza, zatâ: ‘Mfumu, mfumu, tu ziburila!’ 12 Yandi wabavuturila: ‘Matieleka nita lu têla, ka niluzebi’â ko.’

13 “Buna bêno na meso ma tia, mu bungu ti ka luzebi’â tilumbu na heure ko.

14 “Mu bungu ti tiena ntiana bakala dita zolo sa nzietolo ku bunzenza, ditikisi ngamba zandi mpe ba simbisi bimvwama biandi. 15 Kwe wumosi heni talenta* tanu, zole kwe wakaka, mpe yimosi kwe wakaka, heni kwe muna muntu nsinsa na lenda diandi, mpe wele ku bunzenza. 16 Hô nkatika bendo, wô wu bahana talenta tanu wayenda, watêla zo nkari mpe wabaka talenta tanu zakaka. 17 Mpila mosi mpe, wô wu bahana talenta zole wabaka zole zakaka. 18 Kâ ngamba yabaka kwa talenta yimosi yaye tima bulu mpe yazika mbongo* za mfumu’andi.

19 “Ntangu yayingi ha manima, mfumu ya ngamba zo yayiza mpe yayirika misamu mia mbongo na bawu. 20 Buna wô wu bahana talenta tanu wapusana mpe wanata talenta tanu zakaka, watâ: ‘Mfumu, talenta tanu wakunsisiriri; tala, talenta tanu zakaka mvutulu baka.’ 21 Mfumu’andi yamutêla: ‘Bubote siri, ngamba ya mbote na ya kwikama! Wa kwikama bêle mu bima bia fioti. Mbo nikunoma mu bima biabingi. Kota mu nsayi ya mfumu’aku.’ 22 Ha manima, wô wu bahana talenta zole wapusana mpe watâ: ‘Mfumu, talenta zole wakunsisiriri; tala, talenta zole zakaka mvutulu baka.’ 23 Mfumu’andi yamutêla: ‘Bubote siri, ngamba ya mbote na ya kwikama! Wa kwikama bêle mu bima bia fioti. Mbo nikunoma mu bima biabingi. Kota mu nsayi ya mfumu’aku.’

24 “Ku nsuka ngamba yi bahana talenta yimosi yapusana mpe yatâ: ‘Mfumu, nzebi ti yiribita die naku, bima bi walembo kuna tiaka mpe mbutu zi walembo yengeza totaka. 25 Buna bunkuta bwakumbaka mpe naye lunda talenta’aku ku nsi’a mutoto. Talenta’aku eyi ni yawu.’ 26 Mfumu’andi wamuvuturila: ‘Ngamba ya mbi na ya tilenga, tomono zaba ti bima bi nalembo kuna nitiaka mpe mbutu zi nalembo yengeza nitotaka. 27 Wafwanana ti wasisa mbongo* zani mu banke, bwawu bu bu nkêri ngâ mbongele zo na ntenso.

28 “‘Buna, mu bongeno talenta ye nandi mpe haneno yo kwe wô wê na talenta 10. 29 Mu bungu ti wô têkele na tima, mbo bamuyikila tima, mpe mbo kabâ na bima biabingi; kâ wô lembolo na tima, banza tio tie nandi mbo bamukatula tio. 30 Mpe loseno ngamba yilembolo salu ku mbazi kwe mpimpa ya ngolo. Ni kô kadirila mpe kakwetesela mêno mandi.’

31 “Mwana muntu bu kakwiza mu mukembo’andi, tintwari na mbazi zazansoni, mbo kazakala ha muyâlu’andi wa mukembo. 32 Makanda mamansoni mbo mavukana ha matu mandi, mpe mbo kahambasa bantu ntiana bu hambasaka muvungi bimeme na nkombo. 33 Mpe mbo katûla bimeme ku lubakala lwandi, kâ nkombo ku lukento lwandi.

34 “Buna Mutinu mbo katâ kwe bô bê ku lubakala lwandi: ‘Yizeno, beno ba basakumuni kwe Tata’ani, biarileno Timfumu ti balukubikila tûka mbatukulu ya nza. 35 Mu bungu ti nayizi bâ na nsatu, lwakungeni tima tia dia; nayizi bâ na nsatu mamba, lwakungeni tima tia nwa. Nayizi bâ nzenza lwakumbweni na ndiambu; 36 nayizi bâ mpene,* lwakundwikiri. Nayizi bêla, lwakunkipiri. Nakota boloko, lwayizi kuntala.’ 37 Buna bantu ba sungama mbo bamuvuturila ebu: ‘Mfumu ntia ntangu takumona wabâ na nsatu mpe takudikila, peleko wabâ na nsatu mamba mpe takuhana tima tia nwa? 38 Ntia ntangu takumona wabâ nzenza mpe takubwana na ndiambu, peleko wabâ mpene mpe takulwika? 39 Ntia ntangu takumona wa bêla peleko ku boloko mpe tayizi ku tala?’ 40 Mutinu mbo kabavuturila: ‘Wa matieleka nita lu têla, ntangu zazansoni zi lwasiri bo kwe wumosi wa mpangi zani zi za fioti, ni kwe meno lwasiri bo.’

41 “Buna mbo katâ kwe bô bê ku lukento lwandi: ‘Beno ba balokele, yendeno mala na meno, ku tiya twa ntangu zazansoni tu bakubikila Diabulu na mbazi zandi. 42 Mu bungu ti nayizi bâ na nsatu, kâ ka lwakungeni’â tima tia dia ko, nayizi bâ na nsatu mamba, kâ ka lwakungeni’â tima tia nwa ko. 43 Nayizi bâ nzenza, kâ ka lwakumbweni’â na ndiambu ko; mpene kâ ka lwakundwikiri’â ko; wa bêla mpe ku boloko, kâ ka lwakunkipiri’â ko.’ 44 Bawu mpe mbo bavutula ebu: ‘Mfumu, ntia ntangu takumona na nsatu peleko na nsatu mamba, peleko wabâ nzenza, peleko wabâ mpene, wabâ wa bêla, wabâ ku boloko mpe talembo ku bakisa?’ 45 Buna mbo kabavuturila ebu: ‘Wa matieleka nita lu têla, ntangu zazansoni zi lwalembo sa bo kwe wumosi wa mpangi zani zi za fioti, ni kwe meno lwalembo sila bo.’ 46 Bawu mbo babaka lufwa lwa mankululu, kâ bantu ba sungama luzingu lwa mankululu.”