Wa ntete kwe Bisi-Korente
6 Tala ti muntu musamu wê nandi na muntu wakaka, ngano kwe luyâlu lwa bantu balembolo ba sungama kakwenda, kani kenda kwe basantu? 2 Peleko ngano ka luzebi’â ko ti ni basantu bafundisa nza? Mpe tala ti ni beno lufundisa nza, ngano ka lwena na lenda ko dia yirika misamu mia fioti? 3 Ngano ka luzebi’â ko ti mbo tufundisa bambazi? Buna mu bungu dia nti tulembo fundisa misamu mia luzingu lu? 4 Tala ti misamu mie neno mu luzingu lu mi bafweti fundisa, ngano nti luta sôlela bantu ba balembo tambulaka kwe mpangi za timvuka mu bâ mfundisi? 5 Zonza nita zonza mu lu fwisa nsoni. Ngano ka kwena muntu ko wê na ndwenga ha kati dieno wulendi fundisa mpangi zandi? 6 Kâ mpangi yita kwenda ku tribinale mu funda mpangi’andi, nsungula ha matu ma bantu balembo kwikilaka!
7 Wa matieleka lutihombesele bu lufundasanaka beno na beno ku tribinale. Mu bungu dia nti luta lembo bîkila kwa balusa bubi? Mu bungu dia nti luta lembo bîkila kwa balulaba? 8 Kâ ni beno lusaka bubi mpe lulabaka, mpe kwe mpangi zeno lusaka bo!
9 Peleko ka luzebi’â ko ti bantu balembolo ba sungama ka babiarila Timfumu tia Nzambi ko? Ka luhunakanandi. Bô basarilaka bunsuza,* basambilaka biteki, basarilaka bunsuza mu makwela, babakala bavukasaka nitu na babakala,* 10 mivi, bantu bê na suka,* basulare, bantu bafingaka,* na bantu bawukaka bima, ka babiarila Timfumu tia Nzambi ko. 11 Bakaka mu beno ni bo lwabâ. Kâ balusukula; balusantukisa; balutâ mbila bantu ba sungama mu nkumbu ya Mfumu Yezu Kristo na mu mpeve ya Nzambi’eto.
12 Nswa wê nani wa yirika misamu miamiansoni, kâ bima biabiansoni ka biena ndandu ko. Nswa wê nani wa yirika misamu miamiansoni, kâ ka nibîka na kani tima ko tiakuntuma. 13 Bidia mu bungu dia moyo biena mpe moyo mu bungu dia bidia, kâ Nzambi mbo kafukisa bima bio bia biole. Nitu ka yena mu bungu dia bunsuza* ko kâ mu bungu dia Mfumu, mpe Mfumu mu bungu dia nitu. 14 Kâ Nzambi wavumbula Mfumu kwe ba fwa, mbo katuvumbula mpe kwe ba fwa mu nzila ya ngolo zandi.
15 Ngano ka luzebi’â ko ti nitu zeno binama bia Kristo biena? Buna, ngano mfweti katula binama bia Kristo mu vukasa bio na tiyala? Ka bulendi’â bwabâ ko! 16 Ngano ka luzebi’â ko ti wô vukasaka nitu na tiyala, nitu yimosi kakwizi bâka na yandi? Mu bungu ti watâ, “Ba bole mbo babâ musunia wumosi.” 17 Kâ wô vukanaka na Mfumu, muntu wumosi kakwizi bâka na yandi mu mpeve. 18 Diokeno bunsuza!* Masumu ni masumu malendi yirika muntu ka mena mu nitu’andi ko, kâ wô sarilaka bunsuza nitu’andi kata mwisa mpasi. 19 Ngano ka luzebi’â ko ti nitu’eno ni tempelo ya mpeve santu ye mu beno, yi lwabaka kwe Nzambi? Musamu wakaka, ka lutivwiri’â ko, 20 mu bungu ti bafuta ntalu mu lu sumba. Mu miamiansoni, kembeleno Nzambi na nitu’eno.