Bisalu bia Bantumwa
15 Babakala bakaka batûka ku Yude mpe babatika mu longesa bampangi: “Tala ti ka luzengoso’â masutu ko tintwari na tikulu tia Mose, ka lulendi’â lwavûka ko.” 2 Kâ kondo kwa tiwisa kwa ngolo bu tiatulumuka mpe bu babakana na Paulo na Barnabase, babonga nzengolo ti Paulo na Barnabase na bantu bakaka banaka kwe bantumwa na kwe bakuluntu ku Yerusaleme mu zonzela musamu wo.
3 Buna timvuka bu tiamana ba turisa mwa titini, babakala bô batatamana mu sa nzietolo’awu bu basabuka Fenisi na Samaria, bu beri tomo ba têlaka bwe bantu ba makanda basobela ndiatulu, mpe nsangu zo nsayi yayingi zeri tâka kwe mpangi zazansoni. 4 Bu batula ku Yerusaleme, timvuka, bantumwa na bakuluntu bababwana na nsayi yayingi, mpe babatêla misamu miamingi mia yirika Nzambi mu nzila ya bawu. 5 Kâ bantu bakaka ba dibundu dia Bafarize, bô bayizi kwikila, batelama ha chaise zawu mpe batâ: “Bafweti ba zenga masutu mpe bafweti ba tuma mu landa Musiku wa Mose.”
6 Buna bantumwa na bakuluntu bavukana mu taluzula musamu wo. 7 Bu bamana wa zonzela bwabwingi, Piere watelama mpe watâ: “Babakala, bampangi, luzebi ti tûka mbatukulu Nzambi wakunsôla ha kati dieno ngatu mu munwa’ani bantu ba makanda bawâ zu dia nsangu za mbote mpe bakwikila. 8 Nzambi zebi mitima, watêle timbangi bu kabaheni mpeve santu, ntiana kwa bu kasa kwe beto. 9 Mpe ka siri’â na kani luswaswanu ko ha kati dia bawu na beto, kâ watsemese mitima miawu mu nzila ya timinu. 10 Buna bwawu bu, mu bungu dia nti luta tontela Nzambi bu luta kwika dema* kwe milongoki, dema di talembana mu nata beto na nkaka zeto? 11 Ku lweka lwakaka, lukwikulu lwe neto ti mu nzila ya bweso bwa nzitukulu bwa Mfumu Yezu tavûkiri, ntiana kwa bawu.”
12 Buna, bantu babansoni bakuta mpe babatika mu wirikila Barnabase na Paulo beri zonzelaka bidimbu na bimangu biabingi bia sa Nzambi mu nzila ya bawu ha kati dia makanda. 13 Bu bamanisa mu zonza, Zaki wavutula: “Babakala, bampangi, kungwirikileno. 14 Simeone tomono tâ bwe mbala ya ntete Nzambi kakipila makanda makaka mu dukisa kanda ha kati diawu mu bungu dia nkumbu’andi. 15 Mpe wukwelane na misamu mia tâ Bambikuri, ntiana kwa bu watsonama: 16 ‘Ha manima ma misamu mio mbo nikâla mpe mbo nivutu telamasa tivula tia Davide tiabwa; mbo nivutu tunga mbuka zandi za beba mpe mbo nitomesa tivula tiango, 17 ngatu babakala basâla batomo dinga Yehova,* tintwari na bantu ba makanda mamansoni, bantu ba katâka mbila mu nkumbu’andi, bu têle Yehova* Yandi ta yirika misamu mio, 18 misamu miazabakana tûka ntama.’ 19 Dieka bo, nzengolo’ani ka yena ko mu tulumuna misamu kwe makanda mata baluka kwe Nzambi, 20 kâ mu ba tsonekena mu kala bima bi bahana mu mukayulu* kwe biteki, bunsuza,* mu kala mu dia bibulu bi balembolo tsonesa menga, na menga. 21 Mu bungu ti tûka ntama Mose bantu bê nandi bata samuna misamu mi katâ mu mimvuka miamiansoni, mu bungu ti mia batangaka mu zu dia tumbu mu sinagoge sabala zazansoni.”
22 Buna bantumwa, bakuluntu na timvuka tiatiansoni, babonga nzengolo ya tambika ku Antioshe babakala ba basôla ha kati diawu tintwari na Paulo na Barnabase. Batambika Yuda wu beri tâka Barsabase na Silase, beri na madema ha kati dia bampangi. 23 Misamu mi batsoneka na mi batambika mu nzila’awu emi ni miawu:
“Beto mpangi zeno, bantumwa na bakuluntu, tulutsonekene beno mpangi za makanda, za ku Antioshe, za ku Siri na za ku Silisi: Mbote zeno! 24 Tawîri ti bakaka ha kati dieto balukotesele vwandi mu nzonzolo’awu, bu badingiri mu lu yayasa* ni bu sa ti ka tabatumini’â ko. 25 Buna, ha timosi tayizi bonga nzengolo ya sôla babakala na ya ba tambika na Barnabase mpe na Paulo ba tuzololo, 26 babakala bahana luzingu* lwawu mu bungu dia nkumbu ya Mfumu’eto Yezu Kristo. 27 Dieka bo, tutambikiri Yuda na Silase ngatu balutêla misamu mimosi mu munwa’awu. 28 Mu bungu ti mpeve santu na beto beni tabongele nzengolo ya lembo lu yikila dema diakaka tala ti ka misamu emi’â ko mia mfunu: 29 tatamaneno mu kala bima bi bahana mu mukayulu kwe biteki, menga, mu kala mu dia bibulu bi balembolo tsonesa menga na bunsuza.* Tala ti lutomono sa keba mu misamu mio, misamu mieno mbo mitoma. Sâleno bubote!”
30 Buna bampangi bayenda mpe bakôka ku Antioshe. Bakutakasa tikunku tiatiansoni tia bantu mpe babahana mukanda. 31 Bu bamana wa tanga, bayangalala mu lutindusu lo. 32 Mu bungu ti Yuda na Silase mbikuri mpe zeri, batindisa mpe bayika bampangi ngolo mu nzila ya binzonzi biabingi. 33 Bu bamana yôkesa mwa ntangu kûna, bampangi bababîka bakâla kwe bô babatambika bu babatêla basa nzietolo ya mbote. 34* —— 35 Kâ Paulo na Barnabase basâla ku Antioshe. Tintwari na mpangi zakaka, nsangu za mbote za zu dia Yehova* beri longesaka mpe beri samunaka.
36 Ha manima ma mwa bilumbu, Paulo watâ kwe Barnabase: “Tavutu kâla mu kwe tala bampangi mu mimvuka miamiansoni mi tasamunina zu dia Yehova* mu zaba bwe bata hanina.” 37 Barnabase wabonga nzengolo ya nata Za wu batâka Marke. 38 Kâ Paulo ka zolo’â ko mu mu nata na bawu mu bungu ti wasa ba sisa ku Pamfili mpe ka ba turisa ko mu tisalu. 39 Buna bayizi tomo bakana, mpe bahambana; muna muntu wayenda mu nzila’andi. Barnabase wanata Marke na yandi mpe wayenda ku Sipre mu bato. 40 Paulo wasôla Silase, mpe bampangi bu bamana sambila Yehova* ngatu kamusongela bweso bwa nzitukulu, wayenda. 41 Wasabuka Siri na Silisi bu keri kwe yiki bimvuka ngolo.