Bisalu bia Bantumwa
20 Vwandi bu diawa, Paulo watâ mbila milongoki, bu kamana ba tindisa mpe bu kabatêla ti wafweti ba sisa, wayenda ku Masedwane. 2 Bu kamana sabuka tizunga tio, ku kahanina lutindusu lwalwingi kwe bantu, watula ku Grese. 3 Ngonda zitatu kayôkesa kûna, kâ mu bungu ti Bayuda dinga beri dingaka mu mu sa bubi bu keri dingaka mu kwenda ku Siri mu bato, wabonga nzengolo ya kâla ku Masedwane. 4 Bantu bamuturisa ni: Sopatere mwana wa Piruse Musi-Bere, Aristarke na Sekundose Bisi-Tesalonike, Gayuse Musi-Derbe, Timote, mpe ba tizunga tia Azi, Tishike na Trofime. 5 Babakala bo batekela, mpe baye tu kêla ku Troase; 6 kâ beto takatuka ku Filipe mu nzila ya mubu ha manima ma Malaki ma Mampa Malembo Levire, mpe tavukana na bawu ku Troase ntete bilumbu bitanu biafwana. Tayôkesa bilumbu 7 kûna.
7 Mu tilumbu tia ntete tia lumingu, bu takutakana mu dia tintwari, Paulo wabatika mu ba zonzela, mu bungu ti wafweti kwenda mu tilumbu tiaketi landa; walalumuna tinzonzi tiandi tii mu kati-kati dia mpimpa. 8 Minda miamingi miabâ mu shambre ya ku zulu mu takutakana. 9 Ntwenia yimosi ya bakala yeri na nkumbu Etishe yazakala ha fenetre. Wabwa tolo twa ngolo mu ntangu Paulo yi keri saka tinzonzi, mu bungu ti wayenderela ku tolo wabwa tûka etaze ya ntatu, mpe watifwila bu bamunanguna. 10 Kâ Paulo wakôka, watilosa kwe yandi, wamubumba, mpe watâ: “Bîkeno lwaza, mu bungu ti wa moyo wena.”* 11 Ha manima wanaka, wazenga dimpa, mpe wadia. Watatamana mu zonza ntangu yayingi tii bwa tia bwisi, ha manima wayenda. 12 Buna banata mwana wo wa bakala wa moyo, mpe batomo yangalala.
13 Buna takota mu bato mpe tayenda ku Asose, ku taketi sa bongela Paulo ntiana bu katutêla, mu bungu ti mu malu kayendela kûna. 14 Dieka bo, bu katubwana ku Asose, tamubonga mu bato mpe tayenda ku Mitilene. 15 Mpe bu takatuka kûna mu tilumbu tialanda, tatula pene-pene na Kiyo. Tilumbu tialanda takangama ku Samose, mpe tilumbu tiakaka tialanda tatula ku Mile. 16 Paulo wabonga nzengolo ya lembo kangama ku Efeze ngatu kalembo yôkesa ntangu yayingi ku tizunga tia Azi, mu bungu ti manzangu keri sarilaka mu kulu tula ku Yerusaleme mu tilumbu tia Malaki ma Pentekote tala ti mbo bwaketi bâ.
17 Kâ tûka ku Mile, watambika nsangu ku Efeze mu tâ mbila bakuluntu ba timvuka. 18 Bu bayiza kwe yandi, wabatêla: “Lutomono zaba bwe nadiatila ha kati dieno tûka tilumbu tia ntete ti nasa kulu ku tizunga tia Azi. 19 Mfumu nabele sarilaka ntiana ngamba na kuluka kwakwansoni, na mansangaza, mpe na mpasi zabele kunturilaka mu bungu dia makani ma Bayuda mu kunsa bubi, 20 bu nabele lembo tiyiminaka mu lu têla misamu miamiansoni miabêle mfunu kwe beno, na mu lu longesa ha lungiri bantu na mu nzo na nzo. 21 Kâ natomono tâ timbangi ha matu ma Bayuda na ma Bagreke mu musamu wutariri nsobolo ya mabanza kwe Nzambi na timinu mu Mfumu’eto Yezu. 22 Kâ bwawu bu, taleno! Ku Yerusaleme nita kwenda, ntiana bu kuntumini mpeve, ni bu sa ti ka nzebi’â ko ka nti bikunturila kûna. 23 Musamu ewu kwa nzebi: mu mumvuka ni mumvuka, mpeve santu meno yita kwe lwengese ti boloko na nkwamusu bita kunkêla. 24 Kâ, ka nita mona ko ti luzingu lwani mfunu lwena tala ti ka manisi’â ntinu zi nita dioka ko na tisalu ti natambula kwe Mfumu Yezu, mu tomo tâ timbangi mu nsangu za mbote za bweso bwa nzitukulu bwa Nzambi.
25 Kâ bwawu bu, taleno! nzebi ti ka kwena muntu ko ha kati dieno wu nasamunini Timfumu vutu mona tidiri tiani. 26 Dieka bo lumbu ti, beno mbangi zena ti, wa tsema ndiena mu menga ma bantu babansoni, 27 mu bungu ti ka natiyimini’â ko mu lu têla kani diadiansoni dia Nzambi. 28 Seno keba mu beno beni na mu twila diadiansoni, mpeve santu di kalunomene minkengi mu kipa timvuka tia Nzambi, ti kasumba mu menga ma Mwana wa Yandi beni. 29 Nzebi ti bu nimana kwenda, mbulu zê na miangu zikota ha kati dieno, mpe ka zibongela twila ko na bulembami, 30 mpe babakala baduka ha kati dieno, balongesa misamu mia bungungu ngatu milongoki miabalanda.
31 “Ntiangu, tatamaneno mu bâ na meso ma tia na mu bambuka ti tûka mvula zitatu, mpimpa na mwini, ka nabikiri’â ko mu lwengesa muna muntu mu beno na mansangaza. 32 Mpe bwawu bu niluheni ha moko ma Nzambi na kwe zu dia bweso bwandi bwa nzitukulu, zu dilendi lu tunga mpe dilendi lu hana fwa ha kati dia bô babansoni ba basantukisi. 33 Ka nadienokene’â arza, ore peleko binkuti bia muntu ko. 34 Beno beni wa luzebi ti moko ma malungisi nsatu zani na za bô babêle na meno. 35 Mu miamiansoni, na lusongele ti ni mu mpila yo lufweti sala ngolo mu bakisa bô bê bâ nôka, na mu lunda zu dia Mfumu Yezu bu katâ yandi beni: ‘Nsayi ya kaba yiyôkele ya baka.’”
36 Bu kamana tâ misamu mio, wafukama tintwari na babansoni mpe wasambila. 37 Diangana, babansoni batomo dila, babumba Paulo* mpe bamuhana bize za luzolo, 38 mu bungu ti tiari tiatingi tia bâ nawu nsungula bu kabatêla ti ka baketi’â vutu mona tidiri tiandi ko. Ha manima bamuturisa ha bato.