Kwe Bisi-Rome

14 Bwaneno muntu wulembolo na timinu tia ngolo mu mpila ya mbote, kâ ka lufundisandi bantu ba lwe na mbanzulu za swaswana. 2 Muntu wê na timinu tia ngolo bima biabiansoni wudiaka, kâ muntu wulembolo na timinu tia ngolo ndunda kwa wudiaka. 3 Wô diaka bima biabiansoni ka tsâlandi wô lembo bia diaka. Mpe muntu wo wulembo diaka bima biabiansoni ka wufundisandi wô wudiaka bio. Mu bungu ti Nzambi wamutamburi. 4 Nge ni nani mu fundisa tisari tia muntu wakaka? Mfumu’andi kwa lendi bonga nzengolo tala ti musamu wa mbi kayirikiri peleko wa mbote. Yehova* lendi mu bakisa mu lenda.

5 Muntu wulendi banza ti tilumbu tie kô tie nkatika mfunu yôka bilumbu biakaka; muntu wakaka wulendi banza ti bilumbu biabiansoni mpila mosi kwa biena. Muna muntu fweti bâ na lukwikulu mu mbanzulu zandi. 6 Bô babanzaka ti tilumbu tie kô tie nkatika mfunu yôka bilumbu biakaka, basila bo mu kembela Yehova.* Bô badiaka bima biabiansoni, basila bo mu kembela Yehova* mu bungu ti Nzambi batondaka mu bungu dia bidia. Bô balembo diaka, Yehova* mpe bakembelaka, yandi mpe batondaka. 7 Wa matieleka, muntu kâni ha kati dieto wê wa moyo mu bungu dia yandi beni, mpe ka kwena muntu ko wufwaka mu bungu dia yandi beni. 8 Mu bungu ti tala ti ba moyo twena, mu bungu dia Yehova* twe ba moyo, mpe tala ti tufwiri, mu bungu dia Yehova* tuta fwila. Buna, ni bu sa ti ba moyo twena peleko tufwiri, bantu ba Yehova* twena. 9 Wa matieleka, ni mu bungu dia musamu wo Kristo kafwila mpe kavutu kâla wa moyo, ngatu kabâ Mfumu ya bantu ba fwa na ba moyo.

10 Kâ mu bungu dia nti ta fundisila mpangi’aku? Peleko mu bungu dia nti ta tsâla mpangi’aku? Mu bungu ti beto bansoni mbo tutelama ha matu ma tribinale ya Nzambi. 11 Mu bungu ti watsonama: “Yehova* têle: ‘Wa matieleka, mu bungu ti wa moyo ndiena, bantu babansoni mbo bafukama ha matu mani, mpe babansoni mbo batambula ti meno ni Nzambi.’” 12 Buna, muna muntu ha kati dieto mbo kahana mvutu ha matu ma Nzambi mu bungu dia yandi beni.

13 Ka tutifundisakandi beto na beto. Kâ tabongeno nzengolo ya lembo yirika musamu wulendi wolesa timinu tia mpangi, peleko wulendi mu bwisa. 14 Wa nzebi, mpe lukwikulu lwe nani mu Mfumu Yezu ti ka kwena tima ko ti tudiaka tie mvindu mu tiawu beni. Kâ muntu bu wubanzaka ti tima tio mvindu tie, mbo wubâ musamu wa mbi kwe yandi kamana tia dia. 15 Tala ti bima bi ta dia mpangi’aku bita mwisa mpasi, buna kuta vutu diatila mu luzolo ko. Kristo mu bungu dia muntu wo kafwila. Mu bungu dia musamu wo, kubebesandi* timinu tia mpangi’aku mu bungu dia bima bi ta dia. 16 Ka luhanandi kwe muntu ni muntu bweso bwa zonzela bubi bwa bima bia mbote bi lusaka. 17 Timfumu tia Nzambi ka titariri’â bima bi tudiaka ko na bi tunwaka. Tima tiyôkele mfunu ni tia bâ muntu wa sungama, tia bâ na tidzunu na nsayi tintwari na mpeve santu. 18 Muntu wê ngamba ya Kristo mu mpila yo, Nzambi katâka nsayi mpe bantu yandi batambulaka.

19 Buna, tufweti sa mio miamiansoni mi tulenda mu singasa tidzunu na mu titindisa beto na beto. 20 Bîkeno mu bebesa tisalu tia Nzambi mu bungu dia bidia. Wa matieleka, tulendi dia bima biabiansoni; kâ musamu wa mbi wena mu dia tima tilendi wolesa timinu tia muntu wakaka. 21 Mbo wubâ musamu wa mbote mu lembo dia musunia, mu lembo nwa vinu, peleko mu lembo sa tima ni tima tilendi sa ti mpangi’aku yatâ kuba. 22 Lukwikulu lo lwe naku mu musamu wo, bongela lo ntiana musamu wutariri nge na Nzambi. Mbo lubâ mu nsayi bu lulembo tifundisa mu misamu mi lubanzaka ti mia sungama miena. 23 Kâ tala ti muntu ntembe zê nandi mu bima bi kata dia, mambu bamuzengela kamana bia dia. Mu bungu ti musamu wu kata yirika ka wusikamane’â mu timinu ko. Misamu miamiansoni mi tuyirikaka milembo sikamanaka mu timinu masumu mena.