Wa ntete kwe Bisi-Korente

8 Bwawu bu, mu musamu wutariri bidia bi bahanaka kwe biteki: Tuzebi ti beto bansoni luzabu lwe neto. Luzabu lulendo lutumaka, kâ luzolo tunga lutungaka. 2 Tala ti muntu benzi ti musamu kazebi, keka’eti wa zaba ko ntiana bu kafweti wa zabila. 3 Kâ tala ti muntu wuzololo Nzambi, muntu wo Nzambi yandi kazebi.

4 Mu musamu wutariri dia bidia bi bahana kwe biteki, tuzebi ti titeki ka tiena tima ko mu nza mpe Nzambi yimosi kwa yena. 5 Mu bungu ti ni bu sa ti bakaka bê kô ba batâka nzambi ku zulu peleko ha mutoto, ntiana kwa bu kwe “nzambi” zazingi na “mfumu” zazingi, 6 kwe beto Nzambi yimosi kwa ye kô, Tata, ni kwe Yandi kwatûka bima biabiansoni mpe mu bungu dia Yandi tuzingaka; mpe Mfumu yimosi kwa ye kô, Yezu Kristo, ni mu nzila ya yandi bima biabiansoni biayilamana mpe ni mu nzila ya yandi twe ba moyo.

7 Kâ babansoni ka bena na luzabu lo ko. Bakaka mu bungu ti biteki beri sambilaka, bima bio badiaka ntiana’eti bia bahana mu mukayulu kwe titeki, mpe mu bungu ti ngindu’awu ka yena ngolo ko, bawu yikwamisaka. 8 Kâ ka bidia ko bisa ti tabâ pene-pene na Nzambi: ni bu sa ti ka tudiri’â ko ka tukondo’â tima ko, mpe ni bu sa ti tudiri ka tubaka tima ko. 9 Kâ seno keba ngatu nswa’eno wa sôla ka wunatandi bantu balembolo ngolo mu tâ kuba. 10 Mu bungu ti tala ti nge wê na luzabu diri mu tempelo ya titeki mpe muntu wê na ngindu yilembolo ngolo ku mweni, ngano ngindu ya muntu wo ka yimutuma ko mu dia bidia bi bahana mu mukayulu kwe biteki? 11 Buna, mu bungu dia luzabu lwaku muntu wulembolo ngolo mbo wuhombela. Kuzimbakanandi ti mpangi’aku yena, mpe Kristo wafwa mu bungu dia yandi. 12 Bu sumukaka mu mpila yo ha meso ma mpangi zaku mpe bu lwekesaka ngindu’awu yilembolo ngolo, masumu saka ha meso ma Kristo. 13 Dieka bo, tala ti bidia mpangi’ani bitêsaka kuba, kani kabwe ka nivutu’â dia musunia ko ngatu nalembo têsa mpangi’ani kuba.