Wa ntete kwe Bisi-Korente

7 Mu musamu wutariri misamu mi lwatsonekene, bubote bwena kwe bakala mu lembo simba mukento;* 2 kâ mu bungu ti bunsuza* bwa yalangana bwena, bîka ti muna bakala kabâ na mukento wa yandi beni, mpe muna mukento kabâ na bakala dia yandi beni. 3 Bîka bakala kalungisa nsatu* za mukento’andi, mpila mosi mpe mukento kasila bo kwe bakala diandi. 4 Mukento kena na lutumu ko mu nitu’andi, kâ ni bakala diandi; mpila mosi mpe bakala kena na lutumu ko mu nitu’andi, kâ ni mukento’andi. 5 Ka lutiyiminandi beno na beno, diambu’eti mu bungu dia ntangu yi luwisane, ngatu lwayôkesa ntangu mu lusambulu mpe ha manima lwavutu vukana, buna Satana ka tatamana ko mu lu tonta mu bungu dia kondo kweno kwa tiyimina. 6 Kâ, tala ti ni bo ntêle mu bungu ti milendi tula, ka yena ntumunu ko. 7 Wê nani babakala babansoni babâ ntiana meno. Kâ, muna muntu kabu die nandi diatûka kwe Nzambi, wumosi mu mpila eyi wakaka mu mpila eyo.

8 Bwawu bu, ntêle kwe bô beka lembo kwela na kwe mifwiri mia mikento ti bubote bwingi bwena kwe bawu mu tatamana mu bâ ntiana meno. 9 Kâ, tala ti ka bena na tifu tia tiyimina ko, bîka bakwela, mu bungu ti bubote bwingi mu kwela kani bê ye mu nsatu ya vukasa nitu.

10 Kwe bantu ba kwela misiku emi nita hana, ka meno’â ko kâ Mfumu: Mukento ka fweti’â kahambana na bakala diandi ko. 11 Kâ tala ti hambane na yandi, ka kwelandi, tala ti kâni kakarisa tiwisa na bakala diandi; mpe bakala ka fweti’â kabîka mukento’andi ko.

12 Kâ kwe bantu bakaka ntêle ebu, yee, meno, ka Mfumu’â ko: Tala ti mpangi ya bakala ye kô ye na mukento wulembo kwikilaka mpe wutamburi mu tatamana mu bâ na yandi, ka mu bîkandi; 13 tala ti mpangi ya yikento ye kô ye na bakala dilembo kwikilaka mpe ditamburi mu tatamana mu bâ na yandi, ka bîkandi bakala diandi. 14 Mu bungu ti bakala dilembo kwikilaka bamusantukisi mu nzila ya mukento’andi, mpe mukento wulembo kwikilaka bamusantukisi mu nzila ya mpangi ya bakala; tala ti kâni, bala beno mbo baketi bâ mvindu, kâ bwawu bu ba santu bena. 15 Kâ tala ti muntu wulembo kwikilaka wusôlele mu hambana, bîka kahambana; mpangi ya yibakala peleko ya yikento kena wa kangama ko mu musamu wo, kâ Nzambi walutâ mbila mu bâ mu tidzunu. 16 Diangana, mukento, bwe zabiri ti kuvûkisa bakala diaku ko? Peleko bakala, bwe zabiri ti kuvûkisa mukento’aku ko?

17 Kâ, ntiana kwa Yehova* bu kahana kabu kwe muna muntu, bîka ti muna muntu kadiatila tintwari na mbila ya mu tâ Nzambi. Mpe lutwalusu lo nita hana kwe bimvuka biabiansoni. 18 Ngano bakala die kô diatibêla na sutu dia zengo bu bamutâ mbila? Ka karisandi sutu diandi. Ngano bakala die kô di batâ mbila na sutu dialembo zengo? Ka zengosoandi dio. 19 Zengoso sutu ka kwena mfunu ko, lembo zengoso sutu ka kwena mpe mfunu ko; musamu wê mfunu ni mu tumamana ntumunu za Nzambi. 20 Mpila ni mpila ya bâ muntu bu bamutâ mbila, katatamana mu bâ bo. 21 Ngano ngamba weri bu bakutâ mbila? Kumonandi buma; tala ti lendi kwizi baka timpwanza, sarila bweso bo. 22 Mu bungu ti muntu ni muntu wu batâ mbila mu Mfumu bu keri ngamba muntu wena wusarilaka Mfumu na timpwanza; mpila mosi mpe muntu ni muntu wu batâ mbila bu kabâ na timpwanza, ngamba ya Kristo yena. 23 Ntalu bafuta mu lu sumba; bîkeno mu tituka ngamba za bantu. 24 Mpila ni mpila ya bâ muntu bu bamutâ mbila, bampangi, katatamana mu bâ bo ha matu ma Nzambi.

25 Mu musamu wutariri bantu beka lembo kwela, ka ndiena na ntumunu ko yitûkiri kwe Mfumu, kâ mabanza mani nita hana bu ndiena muntu wa kwikama wu bafwila tiari kwe Mfumu. 26 Nita banza ti bubote bwingi kwe bakala mu tatamana mu bâ buna bu kena mu bungu dia mpasi za ntangu yi. 27 Ngano mukento wê naku? Kudingandi mu hambana na yandi. Ngano ka wena na mukento ko? Kudingandi mukento. 28 Kâ tala ti kwelele, kusa masumu ko. Mpe tala ti muntu weka lembo kwela wukwelele, muntu wo ka ta sa masumu ko. Kâ bô bakwela mbo babwabana na mpasi mu nitu zawu. Kâ meno wê nani nalukengerela mu musamu wo.

29 Musamu wakaka bampangi, ebu nita tâ, ntangu yeka ya fioti. Tûka bwawu bu, bîka ti bô bê na bakento babâ ntiana’eti ka bena na bo ko, 30 bô bata dila ntiana bantu bata lembo dila, bô bata yangalala ntiana bantu bata lembo yangalala, bô bata sumba ntiana bantu balembolo na tima, 31 mpe bô babakaka ndandu mu bima bia nza ntiana bantu balembo tomo bia bakilaka ndandu; mu bungu ti tinsamu tia nza yi soba tita soba. 32 Wa matieleka, wê nani ka lubândi na lwaka. Bakala dilembolo dia kwela lwaka lubâka nandi mu misamu mia Mfumu, bwe kalendi sa ngatu Mfumu kamutambula. 33 Kâ bakala dia kwela lwaka lubâka nandi mu bungu dia misamu mia nza, bwe kalendi sa ngatu mukento’andi kamutambula, 34 mpe mabanza yeko-yeko me nandi. Mpe mukento wulembolo wa kwela, mpila mosi mpe na wô weka lembo zaba babakala, lwaka lubâka nandi mu bungu dia misamu mia Mfumu, ngatu kabâ wa santu mu nitu’andi na mu mpeve’andi. Kâ mukento wa kwela lwaka lubâka nandi mu bungu dia misamu mia nza, bwe kalendi sa ngatu bakala diandi kamutambula. 35 Kâ misamu mio ntêle mu bungu dia mbote ya beno beni, ka mu lu yimina ko,* kâ mu lu tuma mu yirika misamu mia sungama na mu bâ ba kwikama kwe Mfumu na mabanza ma sungama.

36 Kâ tala ti muntu wuyôkese mvula zandi za butwenia* mpe benzi ti musamu wa mbi kata yirika bu kata lembo kwela,* kayirika mîna mi kazololo; ka ta sa masumu ko. Bîka kakwela. 37 Kâ tala ti muntu bongele nzengolo mu mutima’andi, mpe ka tima ko tita mu kabakasa, kâ lutumu lwe nandi mu nsatu zandi, mpe bongele nzengolo mu mutima mu lembo kwela,* mbo kayirika musamu wa mbote. 38 Buna, wô ta kwela* musamu wa mbote kata yirika, kâ wô ta lembo kwela mbo kayirika musamu wuyôkele bubote.

39 Mukento wa kangama wena ntangu yayansoni bakala diandi yi kena wa moyo. Kâ tala ti bakala diandi difwiri, lendi kwela muntu ni muntu wu kazololo, kâ na mulongoki wa Mfumu kwa. 40 Kâ mu mabanza mani, mbo kabâ na nsayi yayingi tala ti tatamane mu bâ buna bu kena; ntembe kâni mbenzi ti mpeve ya Nzambi mpe ye nani.