Like

5 Lumbu timosi pôka dia bantu bu dieri finkakanaka ha keri, mu wâ zu dia Nzambi, Yezu watelama ha ndeko mamba ma Genezarete.* 2 Wamona bato zole zeri ha ndeko mamba, kâ bilobi bia mbizi biaduka, mpe file* zawu beri sukulaka. 3 Wanaka mu bato ya vwa Simo, mpe wamulomba mu nata yo mwa mala na mutoto. Ha manima wazakala mpe wabatika mu longesa pôka dia bantu tûka mu bato. 4 Bu kamanisa mu zonza, watâ kwe Simo: “Pusa he ndilu, mpe loseno file* zeno mu loba mbizi.” 5 Kâ Simo wavutula: “Mulongi, tisalu tia ngolo tusariri mpimpa yayansoni mpe ka tubakiri’â tima ko, kâ mu bungu ti nge têle wo mbo nilosa file.”* 6 Bu basila bo, babaka* mbizi zazingi. Diangana file* zawu zabatika mu tendoka. 7 Batêla bampwana’awu beri mu bato yakaka mu kwizi ba bakisa, buna bayiza mpe bafulusa bato za zole zabatika mu diama. 8 Simo Piere bu kamona bo, wafukama ha matu ma Yezu mpe watâ: “Yenda mala na meno Mfumu, mu bungu ti muntu wa masumu ndiena.” 9 Mu bungu ti yandi na bô babâ nandi tintwari batomo yituku mu bungu dia mbizi zi baloba, 10 mpila mosi kwa mpe kwe Zaki na Za, bala ba Zebede beri salaka tintwari na Simo. Kâ Yezu watâ kwe Simo: “Kubândi na bunkuta, mu bungu ti bwawu bu bantu ba moyo batika mu loba.” 11 Buna bakarisa bato ha mutoto, bayambirika bima biabiansoni, mpe bamulanda.

12 Tilumbu tiakaka bu keri ku mumvuka wumosi, kweri na bakala dimosi diafuluka mu bwazi. Bu kamona Yezu, wafukama, wakondamasa tidiri, mpe wamulemberela: “Mfumu, tala ti zololo lendi kuntsemesa.” 13 Bu kalambula koko kwandi, wamusimba mpe watâ: “Nzololo! Tsema.” Hô nkatika bendo, bwazi bwandi bwawasa. 14 Ha manima walomba kwe bakala dio mu lembo wa tâ kwe muntu, watâ: “Kâ yenda watisongela kwe nganga-nzambi, mpe hana kabu dia lomba Mose, mu songela ti tsemene ngatu tiabâ timbangi kwe bawu.” 15 Kâ nsangu zandi zatatamana mu mwangana, mpe bantu babingi beri kutakanaka mu mu wirikila mpe ngatu kawasisa bimbevo biawu. 16 Kâ vula-vula, mu mbuka za yandi kaka keri kwendaka mu sambila.

17 Tilumbu timosi mu ntangu yîna, bu keri longesaka, Bafarize na milongi mia Musiku batûka ku mahata ma Galile, ma Yude na ma Yerusaleme bazakala hâna; mpe ngolo za Yehova* mu Yezu zeri ngatu kawasisa bantu. 18 Mpe tala! bantu banata bakala dimosi dieri na binama bia fwa dialambalala ha zulu mfulu,* mpe weri nawu bamutûla ha matu ma Yezu. 19 Kâ mu bungu dia pôka dia bantu ka babâ na lenda ko dia mu kotesa, buna banaka ku muluri, batobola wo mpe bamukôkesa mu mfulu’andi ha kati-kati dia bantu ha mbuka yeri Yezu. 20 Bu kamona timinu tiawu, watâ kwe bakala dio: “Masumu maku balemvokele mo.” 21 Buna bitsoniki na Bafarize babatika mu yindula bu batâ: “Muntu wu nani wena ngatu kafinga Nzambi? Nani lendi lemvokela masumu tala ti ka Nzambi’â ko kwa?” 22 Kâ Yezu, wabakula mabanza mawu mpe wabavuturila: “Mu bungu dia nti luta banzila bo mu mitima mieno? 23 Nti bilembolo nguria mpasi, ngano ni mu tâ, ‘Masumu maku ma balemvokele,’ peleko ni mu tâ, ‘Telama mpe yenda yende’? 24 Kâ, ngatu lwazaba ti Mwana muntu lutumu lwe nandi lwa lemvokela masumu ha mutoto—” watâ kwe muntu wafwa binama: “Nikutêlele, telama, bonga mfulu’aku mpe yenda ku nzo’aku.” 25 Buna watelama ha matu mawu, wabonga mfulu yi keri sekelaka, mpe wayenda ku nzo’andi bu keri kwe kembele Nzambi. 26 Dieka bo bayituku babansoni, babatika mu kembela Nzambi, mpe bayizi bâ na bunkuta bwabwingi bu batâ: “Misamu mia nzitukulu tumweni lumbu ti!”

27 Ha manima Yezu wayenda mpe wamona muntu wutotaka mpaku wu beri tâka nkumbu Levi wazakala ha biro di bafutilaka mpaku, mpe wamutêla: “Kundanda.” 28 Mpe wabîka bima biabiansoni, watelama mpe wabatika mu mu landa. 29 Ha manima Levi wasa malaki ma manene ku nzo’andi mu bungu dia Yezu mpe bantu babingi batotaka mpaku babâ kô na bantu bakaka beri diaka* na bawu. 30 Buna Bafarize na bitsoniki babatika mu niunguta kwe milongoki miandi bu batâ: “Mu bungu dia nti luta dîla mpe luta nwina na bantu batotaka mpaku mpe na bisumuki?” 31 Yezu wabavuturila: “Ka bantu ba wasa ko bê na nsatu doktere, kâ bô bê na bimbevo. 32 Ka bantu ba sungama ko ndizi tâ mbila, kâ bisumuki ngatu basoba mabanza.”

33 Bamutêla: “Milongoki mia Za diêna mivulu saka na ndiawululu, milongoki mia Bafarize mpe ni bo basilaka, kâ mia nge dia midiaka mpe nwa minwaka.” 34 Yezu wabavuturila: “Ka lulendi’â lwalomba kwe ndiku za bakala dita kwela ko mu sa diêna, ka buna ko? 35 Kâ diangana, bilumbu bie kô mbo bakatula bakala dita kwela ha kati diawu, mpe buna mbo basa diêna mu bilumbu bio.”

36 Wabahana mpe tifwani eti: “Ka kwena muntu ko wuzengaka titenda tia môna mu londa tio ha tinkuti tia ntama. Kamana sila bo, titenda tia môna mbo tipasula tinkuti tia ntama, mpe ka bidelakana ko. 37 Mpe ka kwena muntu ko wutûlaka vinu dia môna mu nkutu* za vinu za ntama. Kamana sila bo, vinu dia môna mbo dipasula nkutu,* dieka bo mbo ditsamuka mpe nkutu* mbo zihombela. 38 Kâ vinu dia môna mu nkutu* za môna bafweti dia tûla. 39 Ka kwena muntu ko wunwaka vinu dia ntama wudingaka mu nwa vinu dia môna, mu bungu ti ebu katâka, ‘Vinu dia ntama dia mbote diena.’”