Kwe Bisi-Galate
2 Mvula 14 ha manima, navutu naka ku Yerusaleme na Barnabase, nanata mpe Tite. 2 Nanaka kûna mu bungu ti nzabukusu nabaka, mpe nazonzela nsangu za mbote zi ndieri samunaka ha kati dia makanda kwe bampangi. Ka nasila bo ko ha meso ma bantu babansoni, kâ ha matu ma bantu ba beri tomo zitisaka, mu zaba tala ti ka ndieri’â diokaka ko, peleko kwa mpamba kwa ndieri diokaka. 3 Ni bu sa ti Tite, wakunturisa, Greke yeri, ka bamutuma mu ngolo ko mu zengoso sutu. 4 Kâ musamu wo watulumuka mu bungu ti mpangi za bungungu zakota mu timvuka, zeri dingaka mu bebesa timpwanza tie neto mu bumosi na Kristo Yezu. Bawu bazolo mu tu nata mu ngolo ngatu tavutu bâ ngamba za Musiku. 5 Na kani fioti* ka tabawîrikila ko, ngatu matieleka ma nsangu za mbote matatamana mu bâ kwe beno.
6 Mu bungu dia bantu beri monekaka ti mfunu bêna—kwe meno, ka weri’â mfunu ko mu zaba ntia mpila bantu beri, mu bungu ti Nzambi ka talaka mpila yi monekenaka muntu ha meso ma bantu ko—bantu bo ba beri tomo zitisaka ka bakundongesa tima tia môna ko. 7 Kâ bu bamona ti bakungana dema dia zonzela nsangu za mbote kwe bô ba balembo zenga masutu, ntiana kwa bu bahana dio kwe Piere mu bungu dia bantu ba bazenga masutu— 8 mu bungu ti wô wahana lenda kwe Piere dia bâ ntumwa mu bungu dia bô ba bazenga masutu, wakungana mpe lenda dia bâ ntumwa mu bungu dia bantu ba makanda— 9 mpe bu babakula bweso bwa nzitukulu bu bakungana, Zaki, Sefase* na Za, ba beri bongelaka ntiana mapoto,* bahana koko kwawu kwa lubakala kwe Barnabase na meno mu songela tintwari, ngatu beto twenda kwe bantu ba makanda mpe bawu benda kwe bô ba bazenga masutu. 10 Batulomba kwa mu tatamana mu banzila bamputu, mpe musamu ni wo nasariri ngolo mu yirika.
11 Kâ Sefase* bu kayiza ku Antioshe, namutelamana mu bungu ti wamoneka ti musamu wa mbi kayirika.* 12 Mu bungu ti ntete bantu bo ba tambika Zaki batula, yandi tintwari keri diaka na bantu ba makanda; kâ bantu bo bu batula, yandi wabîka mu sila bo mpe wayizi bâ mala na bawu mu bungu ti tikunku tia bô ba bazenga masutu keri tînaka. 13 Bayuda bakaka mpe basa ntiana yandi, Barnabase mpe walanda ndiatulu’awu ya mbi.* 14 Kâ bu namona ti ka beri’â diatilaka mu matieleka ma nsangu za mbote ko, natâ kwe Sefase* ha meso ma bantu babansoni: “Tala ti nge wê Muyuda, ndiatulu ye naku ya bantu ba makanda, kâ ka ya Bayuda ko, bwe lendi lombela mu ngolo kwe bantu ba makanda badiata tintwari na tikulu tia Bayuda?”
15 Beto tabutukila mu kanda dia Bayuda, mpe tulembolo bisumuki biatûka mu makanda, 16 tutamburi ti mu nzila ya timinu mu Yezu Kristo kwa batâka muntu wa sungama, kâ ka mu nzila ya nsalulu za musiku’â ko. Buna tutûriri timinu tieto mu Kristo Yezu ngatu batutâ bantu ba sungama mu nzila ya timinu mu Kristo, kâ ka mu nzila ko ya nsalulu za musiku, mu bungu ti ka kwena muntu ko wu balendi tâ wa sungama mu nzila ya nsalulu za musiku. 17 Bwawu bu, tala ti batutêle bankwa-masumu bu tuta dinga batutâ ba sungama mu nzila ya Kristo, ngano wuzololo tâ ti Kristo masumu kata sarila? Diangana kâni! 18 Tala ti mvutulu tunga bio bi namwangasa mu ntama, buna mbo nisongela ti meno Musiku nivwezaka. 19 Mu nzila ya musiku wa fwa ndiena mu musamu wutariri musiku, ngatu nabâ wa moyo ha meso ma Nzambi. 20 Bakunkomene ha poto na Kristo. Ka wusiri’â meno ko ndie wa moyo, kâ ni Kristo we wa moyo mu bumosi na meno. Wa matieleka, luzingu lwe nani bwawu bu mu tinsuni ni mu nzila ya timinu mu Mwana wa Nzambi ndie na lo, yandi wakunzolo mpe watihana yandi beni mu bungu dia meno. 21 Ka nita kala bweso bwa nzitukulu bwa Nzambi ko,* mu bungu ti tala ti buderede mu nzila ya musiku bukwizilaka, buna lufwa lwa Kristo lwa mpamba kwa lweri.