Matie

8 Bu kamana kôka ku mongo, pôka dia bantu diamulanda. 2 Mpe tala! Munkwa-bwazi wumosi wayiza, wafukama ha matu mandi mpe wamutêla: “Mfumu, tala ti zololo lendi kuntsemesa.” 3 Bu kalambula koko kwandi, wamusimba mpe watâ: “Nzololo! Tsema.” Hô nkatika bendo, bwazi bwandi bwawasa. 4 Ha manima Yezu wamutêla: “Wa kutêlele muntu, kâ yenda watisongela kwe nganga-nzambi, mpe hana kabu dia tuma Mose, ngatu tiabâ timbangi kwe bawu.”

5 Bu kakota ku Kafarnawome, mfumu yimosi ya binwani yayiza kwe yandi, wamulemberela, 6 mpe watâ: “Mfumu, tisari tiani ku nzo kalambalale, ka ta lenda ko mu ningana, mpe nguria mpasi kata mona.” 7 Wamutêla: “Bu nikwenda ku nzo’aku mbo nimuwasisa.” 8 Mfumu ya binwani wamuvuturila: “Mfumu, ka ndiena wa fwanana ko mu ku bwana ku nzo’ani, kâ tâ kwa musamu, mpe tisari tiani mbo tiwasa. 9 Mu bungu ti me beni mpe mfumu zê nani zi nitumamanaka, mpe binwani bie nani bi nitumaka. Bu nitâka kwe wumosi, ‘Yenda!’ mbo kakwendaka, kwe wakaka, ‘Yiza!’ mbo kakwizaka, mpe bu nitâka kwe ngamba’ani, ‘Sa ebu,’ ni bo kasilaka.” 10 Yezu bu kawâ bo, wayituku mpe watâ kwe bô beri mu landaka: “Wa matieleka nita lu têla, ka kwena muntu ko ku Israele wê na timinu tia tinene tia mpila yi. 11 Kâ wa nita lu têla, babingi batûka ku este na ku weste, mpe bazakala ha meza na Abrahame, Izake na Yakobe mu Timfumu tia mazulu. 12 Kâ bala ba Timfumu, mbo babalosa ku mbazi ku mpimpa. Ni kô badirila mpe bakwetesela mêno mawu.” 13 Buna, Yezu watâ kwe mfumu ya binwani: “Yenda, mu bungu ti timinu songele, bîka misamu miayôkela buna bu lombele mio.” Mpe tisari tiawasa mu ntangu yîna.

14 Bu kakota mu nzo ya Piere, Yezu wamona nguri ya mukento wa Piere wabâ wa lambalala, mpe fievre yeri nandi. 15 Buna wamusimba koko, mpe fievre’andi yawa, watelama mpe wabatika mu mu kipa. 16 Kâ mpimpa bu yatula, bamunatina bantu babingi beri na bademo; mpe mu ntumunu yimosi ya mpamba, wakuma mpeve zango mpe wawasisa bô babansoni beri monaka mpasi, 17 ngatu misamu mia tâ mbikuri Izayi mialungana bu katâ: “Yandi beni walweti bimbevo bieto na mpasi zeto.”

18 Yezu bu kamona pôka dia bantu diamuzungirila, walomba kwe milongoki miandi mu sabuka ku lweka lwakaka lwa mubu. 19 Titsoniki timosi tiayiza, mpe tiamutêla: “Mulongi, nzololo nakulanda kwakwansoni ku kwenda.” 20 Kâ Yezu wamuvuturila: “Mibaku mabulu me nawu, mpe nuni mazanza me nawu, kâ Mwana muntu kena na tibuka ko ti katensekela mutu.” 21 Ha manima, mulongoki wakaka wamulomba: “Mfumu kungana nzila ya toko kwe zika tata’ani.” 22 Yezu wamutêla: “Tatamana mu kundanda, mpe bîka bantu ba fwa bazika bantu bawu ba fwa.”

23 Mpe bu kanaka mu bato, milongoki miandi miamulanda. 24 Mpe tala! titembo tia ngolo tiabatika mu pûpa mu mubu, mpe matuma* mabatika mu fulusa bato; kâ yandi tolo keri bwaka. 25 Baye mu vumbula, mpe batâ: “Mfumu tu vûkisa, ntamana mbo tufwa!” 26 Kâ wabatêla: “Mu bungu dia nti lwe na bunkuta, beno lwe na timinu tia fioti?” Ha manima watelama, wabamina titembo na mubu, mpe kwayizi bâ tidzunu tia ngolo. 27 Milongoki miayituku mpe miatâ: “Wu ntia mpila muntu? Titembo na mubu bia bita mu tumamana mpe.”

28 Bu katula ku lweka lwakaka, ku tizunga tia Gadara, wabwabana na babakala bole beri na demo batûka ha kati dia mpiema, miangu miamingi miabâ nawu, mpe ka kwabâ muntu wabâ na butindi ko bwa yôkela mu nzila yo. 29 Bakawula ebu: “Ntia musamu wê neto na nge Mwana Nzambi? Ngano wiziri mu tu kwamisa ntete ntangu yi bakubika yafwana?” 30 Ha titini tieri mwa mala na bawu, ngulu zazingi zeri diaka. 31 Buna, bademo babatika mu mu lemberela bu batâ: “Tala ti tu kumini, tu tambika mu bangulu.” 32 Dieka bo wabatêla: “Yendeno!” Buna baduka, mpe bayenda mu bangulu, ngulu zazansoni zatilosa mu mubu tûka ku zulu mpe zafwa mu mamba. 33 Kâ bantu beri kêlaka ngulu badioka, bakota ku mumvuka, mpe baye zonzela misamu miamiansoni na mio mitariri bantu babâ na bademo. 34 Mpe bantu babansoni ba mumvuka baduka mu bwabana na Yezu, mpe bu bamumona, bamulomba mu katuka ku tizunga tiawu.