Marke

5 Ha manima batula ku lweka lwakaka, ku tizunga tia Bisi-Geraza. 2 Buna kwa Yezu kakôka mu bato, bakala dimosi dieri mu lutumu lwa mpeve ya mbi diatûka ha kati-kati dia mpiema mpe diayizi mu bwana. 3 Ha kati dia mpiema keri bâka, mpe tii ntangu yo, muntu kâni wabâ na lenda dia mu kanga ni bu wubâ mu chaîne. 4 Mbala zazingi moko na malu beri mu kangaka mu chaîne, kâ zenga keri za zengaka; mpe muntu kâni wabâ na ngolo za mu kutika. 5 Mpe ntangu zazansoni, mpimpa na mwini keri kawulaka ku mpiema na ku miongo, mpe nitu’andi keri lwekesaka mu matari. 6 Kâ bu kamona Yezu mala, wadioka mpe wakondama ha matu mandi. 7 Ha manima wakawula mu ngolo: “Ntia musamu wê nani na nge Yezu Mwana wa Nzambi Yatomo Zangama? Nikulombele mu dia ndefi mu nkumbu ya Nzambi ti kunkwamisa ko.” 8 Mu bungu ti Yezu wamutêla: “Duka mu bakala dio, nge mpeve ya mbi.” 9 Yezu wamuyula: “Nkumbu’aku nani?” Yandi wavutula: “Nkumbu’ani Mukangu, mu bungu ti babingi twena.” 10 Mpe watatamana mu lemberela Yezu mu lembo kuma mpeve zo ku nsi yakaka.

11 Ngulu zazingi zeri diaka pene-pene na mongo. 12 Buna mpeve zamulemberela: “Tu tambika mu ngulu ngatu takota mûna.” 13 Wabahana nzila. Buna mpeve za mbi zaduka, mpe zayenda mu ngulu, mpe twila diadiansoni, kampe ngulu 2000, zatilosa tûka ku zulu mu mubu mpe zayambuka. 14 Kâ bantu beri kêlaka ngulu badioka, mpe baye zonzela musamu wo ku mumvuka na ku mahata, mpe bantu bayiza mu kwizi mona musamu watula. 15 Buna bayiza kwe Yezu mpe bamona bakala diabâ na bademo, wô watoko bâ na mukangu wa bademo, wazakala na binkuti mpe mabanza ma sungama meri nandi. Dieka bo bunkuta bwababaka. 16 Bô bamona misamu miatula, babazonzela misamu miaturila bakala diabâ na bademo na mio miaturila ngulu. 17 Buna babatika mu lemberela Yezu mu katuka ku tizunga tiawu.

18 Bu keri nakaka mu bato, bakala dio diabâ na bademo diamulemberela mu kwenda na yandi. 19 Ka mu hana nzila ko, kâ wamutêla: “Kâla kwe bibuti biaku mpe ba zonzela mio miamiansoni misiri Yehova* mu bungu dia nge na tiari ti kakusongele.” 20 Bakala dio diayenda mpe diabatika mu zonzela misamu miamiansoni miasa Yezu mu bungu dia yandi ku Dekapole,* mpe bantu babansoni bayituku.

21 Ha manima Yezu wavutu kâla ku simu diakaka mu bato, yungi dia bantu diavukana pene-pene na yandi, mpe yandi ha ndeko mubu kabâ. 22 Mfumu yimosi ya sinagoge yi batâka Zayiruse wayiza, mpe bu kamumona, wabwa ha malu mandi. 23 Wamulemberela mbala zazingi bu katâ: “Mwana’ani wa fioti wa wukento nkatika timbevo tie nandi.* Mulemvo’aku yiza wamutenseka moko maku ngatu kawasa mpe kazinga.” 24 Buna Yezu wayenda na yandi, yungi dia bantu dieri kwe mu landi mpe dieri tomo kwe mu bandakane.

25 Mukento wumosi weri hâna, weri kwe duki menga tûka mvula 12. 26 Mpasi zazingi kamona ha moko ma badoktere babingi, wamanisa mbongo zandi zazansoni mpe ka wasa ko, kâ, timbevo tiandi tiayizi tomo bâ ngolo. 27 Bu kawâ misamu mi beri tâka mu Yezu, wapusana ha manima mandi ha kati dia pôka dia bantu, mpe wasimba tinkuti tiandi tia zulu, 28 mu bungu ti ebu keri tâka: “Tala ti nsimbiri kwa binkuti biandi bia zulu, mbo niwasa.” 29 Mpe hô nkatika bendo menga mandi ka meri’â vutu dukaka ko, mpe wamona mu nitu’andi ti wawasa mu timbevo tiandi tia ngolo.

30 Mbala mosi Yezu wabakula ti ngolo zaduka mu yandi, wabaluka ha kati dia pôka dia bantu mpe wayula: “Nani simbiri binkuti biani bia zulu?” 31 Kâ milongoki miandi miamutêla: “Pôka dia bantu dia ta mona dita tomo ku bandakana, kâ nge vutulu yula, ‘Nani kunsimbiri?’” 32 Kâ watala kwakwansoni mu zaba nani wasa bo. 33 Mukento wo bunkuta bwabâ nandi mpe teketa keri teketaka mu bungu ti wazaba mio miamuturila; wapusana, wafukama ha matu mandi mpe wamutêla matieleka mamansoni. 34 Wamutêla: “Mwana’ani, timinu tiaku tikuwasisi. Yenda mu tidzunu, mpe wasa mu timbevo tiaku tia ngolo.”

35 Ka timanisina mu zonza ko, bantu ba mu nzo ya ntwarisi ya sinagoge bayiza mpe batâ: “Mwana’aku wa wukento wufwiri! Mu bungu dia nti tuvutu kwamisina Mulongi?” 36 Kâ Yezu wawâ misamu mi beri tâka, mpe watâ kwe ntwarisi ya sinagoge: “Kubândi na bunkuta, sarila kwa timinu.” 37 Dieka bo ka bîka ko ti muntu kamulanda diambu’eti Piere, Zaki na Za mpangi ya Zaki.

38 Bu batula mu nzo ya ntwarisi ya sinagoge, wamona bantu beri niyâ, beri dilaka, na beri kawulaka mu ngolo. 39 Bu kamana kota Yezu wabatêla: “Mu bungu dia nti luta dirila mpe lwe niyâ? Mwana ka wufwiri’â ko, kâ tolo kata bwa.” 40 Buna babatika mu mu sehesela. Kâ bu kamana dukisa bantu babansoni ku mbazi, wanata tata, nguri ya mwana na bô babâ nandi, mpe bakota kô kwa bâ mwana. 41 Wabonga koko kwa mwana, mpe wamutêla: “Talita kumi,” yizololo tâ: “Mwana mukento, nikutêlele, telama!” 42 Hô nkatika bendo mwana watelama mpe wabatika mu kwe yende. (Mvula 12 zabâ nandi.) Mpe mbala mosi ka beri’â vutu lendaka ko mu zonza mu bungu ti nsayi yayôka. 43 Kâ wabalomba mbala zazingi* mu lembo zonzela musamu wo kwe muntu, mpe watâ bahana tima tia dia kwe mwana.