Matie

18 Mu ntangu yo milongoki miapusana kwe Yezu, mpe miatâ: “Mu matieleka, nani yôkele bunene mu Timfumu tia mazulu?” 2 Buna, watâ mbila mwana wa fioti, wamutelamasa ha kati diawu, 3 mpe watâ: “Wa matieleka nita lu têla, tala ti ka lusobele’â ko, mpe ka lubêle’â ntiana bala ba fioti ko, kani kabwe ka lukota mu Timfumu tia mazulu ko. 4 Kâ wô tibetola ntiana mwana wu wa fioti ni yandi yôkele bunene mu Timfumu tia mazulu; 5 mpe wô bwana mwana wa fioti ntiana ewu mu bungu dia nkumbu’ani, ni meno kwa mpe kabweni. 6 Kâ wô têsa kuba wumosi mu bala ba bê na timinu mu meno, bubote bamukanga ha laka tari di banikinaka mbutu di zungasaka buluku, mpe bamulosa mu mubu.

7 “Tiari kwe nza mu bungu dia bima bitêsaka makuba! Diangana, ka balendi’â bazimbakasa bima bitêsaka makuba ko. Kâ tiari kwe wô tûla tima titêsaka kuba! 8 Buna, tala ti koko kwaku peleko kulu kwaku kuba kukutêsaka, zenga ko, mpe losa ko mala na nge. Bubote bwena kwe nge bu bakiri luzingu na koko kumosi peleko na kulu kumosi na bu bakulosele ku tiya twa ntangu zazansoni na moko mole peleko na malu mole. 9 Mpe, tala ti disu diaku kuba dikutêsaka, katula dio mpe losa dio mala na nge. Bubote bwena bu bakiri luzingu na disu dimosi na bu bakulosele na meso mole ku Zehene* ya tiya. 10 Seno keba mu lembo vweza wumosi mu bala eba ba fioti, mu bungu ti wa nita lu têla mbazi zawu ku zulu ntangu zazansoni tidiri tia Tata’ani die ku zulu batalaka. 11 ——

12 “Bwe luta banza? Tala ti muntu bimeme 100 bie nandi mpe timosi tiwumukini, ngano ka sa sisa bia 99 ko ku miongo mu kwe dinga tio tiwumukini? 13 Mpe tala ti bakiri tio, diangana nilutêlele, nsayi yibâ nandi mu bungu dia timeme tio, mbo yiyôka yo ye nandi mu bungu dia bimeme 99 bilembolo wumuka. 14 Mpila mosi mpe Tata’ani* die ku zulu ka zololo’â ko ti wumosi mu bala eba wafuka.

15 “Tala ti mpangi’aku siri disumu, yenda mpe mu zabikisa mbi’andi* ha beno bole. Tala ti ku wirikiri, karisi mpangi’aku ha mahambu. 16 Kâ tala ti ka ku wirikiri’â ko, bonga muntu mosi peleko bole, ngatu mu timbangi* tia bantu bole peleko batatu, musamu wasingana. 17 Tala ti ka ba wirikiri’â ko, tâ wo kwe timvuka. Tala ti ka wirikiri’â mpe timvuka ko, mu bongela ntiana muntu wa makanda peleko muntu wutotaka mpaku.

18 “Wa matieleka nita lu têla, tima ni tima ti lukanga ha mutoto mbo batikangila tio ku zulu, mboko tima ni tima ti lusutula ha mutoto mbo batisuturila tio ku zulu. 19 Wa matieleka nita vutu lu têla, tala ti bantu bole mu beno ha mutoto bawisane mu lomba tima ni tima tia mfunu mu lusambulu, Tata’ani die ku zulu mbo kalungisa ndombolo’awu. 20 Mu bungu ti hô ha vukane bantu bole peleko batatu mu nkumbu’ani, meno mpe ha kati diawu nibâka.”

21 Ha manima Piere wapusana mpe wamuyula: “Mfumu, mbala kwa mfweti lemvokela mpangi’ani tala ti kundirikiri musamu wa mbi? Ngano mbala 7?” 22 Yezu wamutêla: “Nikutêlele, ka mbala 7’â ko kwa, kâ mbala 77.

23 “Ntiangu Timfumu tia mazulu balendi tia fwanakasa na mutinu weri zoloko mu yirika misamu mia mbongo na ngamba zandi. 24 Bu kabatika mu yirika mio, bamunatina bakala dimosi dieri mu defaka talenta 10 000.* 25 Kâ mu bungu ti ka bâ na tima ko ti kaketi futa, mfumu wahana ntumunu bamuteka yandi, mukento’andi, bala bandi na bima biandi biabiansoni, ngatu bafuta mfuka. 26 Buna ngamba yafukama, yakondama ha matu mandi, mpe yatâ: ‘Bâ na luvivululu mu meno, mbo nikufuta bima biabiansoni.’ 27 Mu bungu ti tiari tiamubaka, mfumu ya ngamba yo yamubîka kenda, mpe wamutêla mu lembo vutu futa mfuka’andi. 28 Kâ ngamba yo yaye monekena ngamba yakaka yeri mu defaka denie 100, wamufieta ha laka mpe watâ: ‘Futa mbongo zi ta kundefa.’ 29 Buna ngamba yo yabwa ha mutoto, mpe yabatika mu mu lemberela, yatâ: ‘Bâ na luvivululu mu meno, mbo nikufuta mbongo zaku.’ 30 Kâ yandi ka zolo’â ko, buna waye mu losa ku boloko tii bu kaketi mu futa mfuka’andi. 31 Ngamba zakaka bu zamona misamu miayôka, tiari tiatomo ba baka, mpe baye tâ misamu miamiansoni kwe mfumu’awu. 32 Buna mfumu wamutikisa mpe wamutêla: ‘Ngamba ya mbi, me nikutêlele mu lembo vutu futa mfuka’aku bu kundemberele. 33 Ngano ka wufwananeke’â ko ti nge mpe wafwila mpwana’aku ngamba tiari ntiana bu nikufwiririki tiari?’ 34 Dieka bo mfumu’andi nkesi zatomo mu baka, mpe wamuhana ha moko ma minkengi mia ku boloko tii bu kaketi futa mfuka’andi yayansoni. 35 Tata’ani die ku mazulu ni bo mpe kalusa, tala ti mosi mu beno ka lemvokele’â mpangi’andi ko mu mutima’andi wawansoni.”