Matie
4 Ha manima, mpeve yanata Yezu ku sese* ngatu Diabulu kamutonta. 2 Bu kamana yôkesa bilumbu 40 na mpimpa 40 yandi kadie, nsatu yamubaka. 3 Yandi tontaka wapusana, mpe wamutêla: “Tala ti nge mwana wa Nzambi wena, têla matari ma matituka mampa.” 4 Kâ wavutula: “Watsonama ti: ‘Muntu ka wufweti’â wazinga kwa mu dimpa dia mpamba ko, kâ mu misamu miamiansoni midukaka mu munwa wa Yehova.’”
5 Ha manima Diabulu wamunata ku mumvuka wa santu, mpe wamutelamasa ha mbuka yiyôkele ya zangama ya tempelo; 6 wamutêla: “Tala ti nge mwana wa Nzambi wena, tilosa ku banda mu bungu ti watsonama: ‘Mbo katuma mbazi zandi mu bungu dia nge, mpe mbo bakunata mu moko mawu, ngatu kulu kwaku kwalembo botana mu tari.’” 7 Yezu wamutêla: “Watsonama mpe ti: ‘Kufweti’â watonta Yehova Nzambi’aku ko.’”
8 Diabulu wavutu mu nata ku mongo weri na bula bwa nzitukulu, mpe wamusongela bimvwama biabiansoni bia nza na mukembo’awu. 9 Mpe wamutêla: “Bima bi biabiansoni, mbo nikuhana bio tala ti fukamane mpe kunsambiri* kwa mbala mosi.” 10 Buna Yezu wamutêla: “Katuka Satana! mu bungu ti watsonama: ‘Ni Yehova Nzambi’aku fweti sambila, mpe ni Yandi kwa fweti sarila tisalu tia santu.’” 11 Dieka bo Diabulu wamubîka, mpe tala! bambazi bayiza mpe babatika mu mu sarila.
12 Yezu bu kawâ ti bakanga Za, wayenda ku Galile. 13 Ha manima, Yezu wakatuka ku Nazarete mpe waye bêla ku Kafarnawome ha ndeko mubu, ku tizunga tia Zabulone na tia Neftali, 14 ngatu misamu mia tâ mbikuri Izayi mialungana, bu katâ: 15 “Ô nsi ya Zabulone na nsi ya Neftali, beno lwe mu nzila ya mubu ku simu diakaka dia Zurde, Galile ya makanda! 16 Kanda dizakale ku mpimpa dimweni mutsamina wa munene, mpe mutsamina wutelamane kwe bô bazakale ku mbuka yi yâlaka lufwa.” 17 Tûka ntangu yîna, Yezu wabatika mu samuna bu keri kwe tê: “Sobeno mabanza mu bungu ti Timfumu tia mazulu tieka pene-pene.”
18 Bu keri kwe yende ha ndeko mubu wa Galile, wamona bantu bole beri mpangi na yaya, Simo wu beri tâka Piere na Andre beri losaka file* zawu mu mubu, mu bungu ti bilobi* bia mbizi biabâ. 19 Wabatêla: “Kundandeno, mpe mbo nilutitula bilobi bia bantu.” 20 Hô nkatika bendo, bayambirika file zawu mpe bamulanda. 21 Bu katatamana mu kwe yende, wamona bantu bole bakaka beri mpangi na yaya, Zaki mwana wa Zebede na Za. File beri yirikaka na tata’awu mu bato, mpe wabatâ mbila. 22 Hô nkatika bendo, babîka bato na tata’awu mpe bamulanda.
23 Buna babatika mu zungana Galile yayansoni, mu kwe longese mu sinagoge zawu, mu kwe samuni nsangu za mbote za Timfumu, na mu kwe wasisi bimbevo na bifuma bia mpila na mpila ha kati dia bantu. 24 Nsangu zandi zayangana ku Siri yayansoni, bamunatina bantu babansoni beri na bimbevo na mpasi za mpila na mpila, bô beri na bademo, bô beri bwaka nzieta na bô beri na binama bia fwa, mpe wabawasisa. 25 Buna pôka dia bantu bamulanda: batûka ku Galile, ku Dekapole,* ku Yerusaleme, ku Yude na ku simu diakaka dia Zurde.