Wa ntete kwe Bisi-Korente

13 Tala ti mazu ma bantu na ma bambazi nizonzaka, kâ ka ndiena na luzolo ko, ndieka ntiana ngunga yita sa lwaza peleko biba bia mizike bita homa. 2 Tala ti kabu dia bikula die nani, mansweki ma santu mamansoni nibakulaka mpe luzabu lwalwansoni lwe nani, mpe tala ti timinu tiatiansoni tie nani tilendi sa ti nakatula* miongo ha mbuka zawu, kâ ka ndiena na luzolo ko, ka ndiena tima* ko. 3 Tala ti ngeni bima biani biabiansoni mu dikila bantu bakaka, mpe tala ti ngeni nitu’ani mu baka mukembo, kâ ka ndiena na luzolo ko, ka nita bia bakila ndandu ko.

4 luzolo luvivululu lwe nandi na mbote. Luzolo ka lwena na timbanda ko. Ka lupaparalaka ko, mpe ka lufulukaka mu lulendo ko, 5 ka luyirikaka misamu mia nsoni ko, ka ludingaka ndandu za yandi beni ko, ka lubakaka nkesi ko. Ka lukipaka mbi yi bamuyirikiri ko. 6 Ka luyangalalaka mu kondo kwa buderede ko, kâ na matieleka luyangalalaka. 7 Miamiansoni lukorelaka, miamiansoni lukwikilaka, miamiansoni lusilaka tivuvu, miamiansoni luvivirilaka.

8 Luzolo ka lusukaka ko. Kâ ni mabâ makabu ma bikula, mbo bakatula mo; ni bu dibâ kabu dia zonza mazu* mbo diwa; ni bu lubâ luzabu, mbo bakatula lo. 9 Mu bungu ti luzabu lwa ndambu kwa lwe neto, mpe ndambu kwa tubikulaka, 10 kâ tima tia lunga bu tikwiza, tia ndambu mbo bakatula tio. 11 Bu ndieri mwana wa fioti, ntiana mwana wa fioti ndieri zonzaka, ntiana mwana wa fioti ndieri banzilaka, ntiana mwana wa fioti ndieri mwinaka misamu; kâ bwawu bu bu ndieka bakala dia kula, ka nasala yiriki misamu ntiana mwana wa fioti ko. 12 Bwawu bu ka tuta tomo mona tifwa ko mu titâri tia tisengo, kâ tilumbu tie kô ti tutomo mona. Bwawu bu ndambu kwa nzebi, kâ lumbu mbo nibâ na luzabu lwa lunga ntiana kwa bu bakunzebi. 13 Lumbu ti bima ebi bia bitatu kô biena: timinu, tivuvu, luzolo; kâ tiyôkele bunene mu bia bitatu ni luzolo.