Kwe Bisi-Rome

15 Beto twe na timinu tia ngolo, tufweti bakisa bô balembolo na timinu tia ngolo mu korela misamu mibamwisaka mpasi. Ka tudingandi kwa mu yirika misamu mitutâka nsayi. 2 Muna muntu mu beto fweti yirika misamu mitâka mpwana’andi nsayi mu bungu dia bubote bwandi, ngatu kamutindisa. 3 Kristo mpe ka dinga nsayi ya yandi beni ko. Ntiana bu tâka wo matsonoko: “Bifingu bi bata kumfinga bibwiri kwe meno.” 4 Mu bungu ti misamu miamiansoni mi batsoneka mu ntama, batsoneka mio mu tu longesa, ngatu mu nzila ya luvivululu na ya mbombolo yi hanaka matsonoko tabaka tivuvu. 5 Bîka ti Nzambi kaluhana luvivululu na lutindusu. Mpe sambila nita sambila ti kahana mabanza mo mabâ na Kristo Yezu kwe beno bansoni, 6 ngatu mu bumosi, lwahana mukembo mu zu* dimosi kwe Nzambi wê mpe Tata dia Mfumu’eto Yezu Kristo.

7 Ntiana kwa Yezu bu kalubwana* mu mpila ya mbote, lufweti bwana mpe bantu bakaka mu mpila ya mbote. Buna, mbo wuhana mukembo kwe Nzambi. 8 Nilutêlele ti Kristo wayizi bâ tisari tia Bayuda mu songela ti Nzambi matieleka katâka, na mu singasa makani ma kasa kwe nkaka zawu, 9 mpe ngatu makanda mahana mukembo kwe Nzambi mu bungu dia tiari tiandi. Ntiana bu watsonama: “Ntiangu nikukembela ha kati dia makanda, mpe mbo nitanga mikunga mu kembela nkumbu’aku.” 10 Yandi vutulu tâ mpe: “Yangalaleno, beno makanda, na bantu beno.” 11 Mpe yikiri: “Beno makanda mamansoni, kembeleno Yehova,* mpe bîka ti bantu babansoni bamukembela.” 12 Izayi têle mpe: “Mbo kubâ mudza wa Yese, muntu wo wutelama mu yâla makanda. Makanda ni mu yandi matûla tivuvu tiawu.” 13 Bîka ti Nzambi yihanaka tivuvu kalufulusa mu nsayi na tidzunu tiatiansoni mu bungu dia lukwikulu lwe neno mu yandi. Yee, bîka lwasampa mu tivuvu mpe lwafuluka mu ngolo za mpeve santu.

14 Bampangi, lukwikulu lwe nani ti ba fuluka lwena mu mbote, mu luzabu mpe lenda die neno dia hanasana malongi beno na beno. 15 Buna, mu bungu dia bweso bwa nzitukulu bwa kunsongele Nzambi, na matieleka mamansoni nita lu tsonekena mu bungu dia misamu miakaka ngatu nalubambula mio. 16 Meno tisari tiena tia Kristo Yezu mu bungu dia makanda. Ngolo nita sa mu tisalu tia santu tia samuna nsangu za mbote za Nzambi, ngatu makanda mo mabâ kabu Nzambi di katambulaka, kabu dia santu mu nzila ya mpeve santu.

17 Nsayi ye nani mu bâ mulongoki wa Kristo Yezu na mu sala tisalu tia Nzambi. 18 Ka nizonzela misamu mi nayirika meno beni ko, kâ mio kwa mia yirika Kristo na mi katâ mu nzila ya meno mu bakisa bantu ba makanda makaka mu mu tumamana. 19 Bawu batumama mu bungu dia bimangu bia ngolo na bia nzitukulu bialungana mu nzila ya mpeve ya Nzambi. Mu mpila yo, natomono samuna nsangu za mbote zitariri Kristo tûka Yerusaleme tii ku Iliri. 20 Kani diabâ nani ni dia lembo samuna nsangu za mbote mu mbuka zo zi batizabila nkumbu ya Kristo, mu bungu ti ka nazolo’â ko mu tunga ha zulu bandu dia tunga muntu wakaka. 21 Ntiana bu watsonama: “Bô ba balembo samunina nsangu zandi mbo bamumona, mpe bô balembo wâ mbo babakula.”

22 Mu bungu dia musamu wo mpe bakunkabakase mbala zazingi mu kwiza kwe beno. 23 Kâ bwawu bu manisi tisalu tiani tia samuna mu bizunga bio, mpe tûka mvula zazingi nsatu yayingi ye nani mu kwizi lu tala. 24 Ntiangu ndie na tivuvu ti bu nikwenda ku Espagne, mbo nilumona. Bu nimana yôkesa mwa ntangu na beno, tivuvu tie nani ti mbo lukwe kunturisa mwa titini bu nikwenda ku Espagne. 25 Kâ bwawu bu nzietolo nita sa ku Yerusaleme mu kwe sarila basantu bê kûna. 26 Mpangi za ku Masedwane na za ku Akayi na nsayi yayansoni baheni kabu kwe bamputu bê ha kati dia kanda dia Nzambi ku Yerusaleme. 27 Mpangi zo nsayi yabêle nawu mu sila bo mu bungu ti mfuka yabêle nawu kwe basantu ba ku Yerusaleme, mu bungu ti mpangi za ku Yerusaleme zakabana bima biawu bia timpeve na bawu. Ntiangu mpangi zo zifweti kaba bima biawu bia tinsuni na basantu bê ku Yerusaleme. 28 Bu nimana ba hana kabu* dio, mbo niyôkela kwe beno mu ntangu yi nikwenda ku Yerusaleme. 29 Nzebi ti mu ntangu yi nitula kwe beno, mbo nilunatina tusakumunu twatwingi tutûkiri kwe Kristo.

30 Bampangi, tindisa nita lu tindisa mu nzila ya Mfumu’eto Yezu Kristo na mu nzila ya luzolo lutûkaka mu mpeve santu, mu tatamana tintwari na meno mu sambila Nzambi mu bungu dia meno. 31 Sambileno ngatu navûka ha moko ma bantu balembo kwikilaka ku Yude, mpe ngatu kabu di ninata kwe kanda dia Nzambi die ku Yerusaleme babwana dio mu mpila ya mbote. 32 Buna tala ti lo ni luzolo lwa Nzambi, mbo nibâ wa fuluka mu nsayi bu nikwiza kwe beno mpe mbo nibaka lutindusu tintwari na beno. 33 Bîka Nzambi yihanaka tidzunu yabâ na beno bansoni. Amen.