Za

13 Mu bungu ti wazaba ntete malaki ma Pake ti ntangu’andi yafwana yi kaketi sisa nza yi mpe yi kaketi kwenda kwe Tata, Yezu, mu bungu ti wazolo bô babâ nandi mu nza, wabazolo tii ku nsuka. 2 Bidia bia nkokela beri diaka, mpe Diabulu watitûrila mabanza ma mu teka mu mutima wa Yuda Iskariote, mwana wa Simo. 3 Mpe Yezu bu kazaba ti Tata wahana bima biabiansoni ha moko mandi, ti kwe Nzambi katûka, mpe kwe Nzambi keri kwendaka, 4 watelama bu beri diaka mu nkokela mpe wakatula binkuti biandi bia zulu. Wabonga serviete mpe wazinga yo mu luketo lwandi.* 5 Ha manima watula mamba mu ndonga mpe wabatika mu sukula malu ma milongoki na mu kusuna mo mu serviete yi kazinga mu luketo.* 6 Bu kapusana kwe Simo Piere, yandi wamutêla: “Mfumu, ngano malu mani ta zolo sukula?” 7 Yezu wamuvuturila: “Musamu wu nita yirika kuta wa bakula ko bwawu bu, kâ mbo bakula wo ha manima.” 8 Piere wamutêla: “Kani kabwe nge kunsukula malu ko.” Yezu wamuvuturila: “Tala ti ka nikusukuri’â malu ko, kubaka na kani tima tintwari na meno ko.” 9 Buna Simo Piere wamutêla: “Mfumu, kunsukulandi kwa malu, kâ sukula mpe moko mani na mutu’ani.” 10 Yezu wamutêla: “Muntu wuyebele nsatu ye nandi bamusukula kwa malu, mu bungu ti nitu’andi yayansoni ya tsema yena. Mpe beno ba tsema lwena, kâ ka beno bansoni’â ko.” 11 Mu bungu ti wazaba muntu waketi mu teka. Ntiangu katâ: “Ka beno bansoni’â ko lwe ba tsema.”

12 Buna, bu kamanisa mu ba sukula malu, na bu kalwata binkuti biandi bia zulu, wavutu lambalala ha meza mpe wabatêla: “Ngano lubakuri misamu mi niluyirikiri? 13 Meno lutâka ‘Mulongi’ na ‘Mfumu,’ ni buna wena, mu bungu ti ni bo ndiena. 14 Buna, tala ti meno nilusukuri malu, meno ndie Mfumu na Mulongi, beno mpe lufweti tisukula malu beno na beno. 15 Mu bungu ti tifwani niluheni, ngatu mpila yi nilusiri, beno mpe lwasila bo. 16 Nkatika matieleka nita lu têla, ngamba ka yôkele’â mfumu’andi ko, mpe wô wu batambikiri ka yôkele’â wô wumutambikiri ko. 17 Tala ti misamu mio mia luzebi, nsayi kwe beno tala ti mia luta sarila. 18 Ka beno bansoni’â ko nita zonzela; bantu ba nsôlele ba nzebi. Kâ ni buna wena ngatu matsonoko malungana: ‘Wô weri diaka dimpa diani kumbalukiri.’ 19 Bwawu bu nita mia lu têla ntete miatula, ngatu bu mitula lwakwikila ti meno ni yandi. 20 Nkatika matieleka nita lu têla, wô bwana wô wu ntambikiri, kumbweni mpe, mpe wô kumbwana, bweni mpe Wô wakuntambikiri.”

21 Bu kamana tâ misamu mio, Yezu tiari tiatomo mu baka, mpe watâ timbangi bu katâ: “Nkatika matieleka nita lu têla, wumosi mu beno kunteka.” 22 Milongoki miabatika mu talasana bawu na bawu, ka beri’â zabaka ko nani keri zonzelaka. 23 Wumosi wa milongoki, wô Yezu wu keri tomo zoloko, walambalala pene-pene na* Yezu. 24 Buna Simo Piere walabisa muntu wo mpe wamutêla: “Tu têla nani kata zonzela.” 25 Buna muntu wûna waseka ha ntulu ya Yezu mpe wamutêla: “Mfumu, nani wena?” 26 Yezu wavutula: “Ni muntu wu nihana tibuku tia dimpa di nivwika mu ndonga.” Buna, bu kamana vwika dimpa mu ndonga, wabonga dio mpe wahana dio kwe Yuda, mwana wa Simo Iskariote. 27 Yuda bu kamana bonga tibuku tia dimpa, Satana wamukotela. Buna Yezu wamutêla: “Mio mi ta yirika, kulu mia yirika.” 28 Kâ na kani muntu mu bô balambalala ha meza wazaba mu bungu dia nti kamutêla bo. 29 Mu bungu ti ni Yuda weri simbaka kese ya mbongo, bakaka babanza ti Yezu ebu keri mu têlaka, “Sumba bima bie neto nsatu mu bungu dia malaki,” peleko, wafweti hana mwa tima kwe bamputu. 30 Buna bu kamana baka tibuku tia dimpa, mbala mosi waduka. Mpimpa yabâ.

31 Buna, bu kaduka, Yezu watâ: “Bwawu bu Mwana muntu bakiri mukembo, mpe Nzambi bakiri mukembo mu nzila’andi. 32 Nzambi Yandi beni mbo kamuhana mukembo, mpe mbo kamuhana mukembo mbala mosi. 33 Bala ba fioti, na beno natiri ntangu fioti. Mbo lukundinga, mpe ntiana bu natâ wo kwe Bayuda, wa nita lu têla mpe bwawu bu, ‘Kuma ku nita kwenda, ka lulendi’â kwa kwiza ko.’ 34 Ntumunu ya môna nita lu hana: Zolosonoeno beno na beno; ntiana kwa bu naluzolo, beno mpe zolosonoeno beno na beno. 35 Ni buna bantu babansoni bazabila ti milongoki miani lwena tala ti luzolo lwe neno ha kati dieno.”

36 Simo Piere wamutêla: “Mfumu, kwe ta kwenda?” Yezu wavutula: “Kuma ku nita kwenda, kulendi’â wakundanda bwawu bu ko, kâ mbo kundanda ha manima.” 37 Piere wamutêla: “Mfumu, mu bungu dia nti ndendi lembo ku landa bwawu bu? Mbo nihana luzingu* lwani mu bungu dia nge.” 38 Yezu wavutula: “Ngano mbo hana luzingu* lwaku mu bungu dia meno? Nkatika matieleka nita ku têla, ntete nsusu yakuba, mbo kunkala mbala tatu.”