Like

11 Tilumbu timosi, Yezu ha mbuka yimosi keri sambilaka, mpe bu kamanisa, mulongoki’andi wumosi wamutêla: “Mfumu, tu longesa bu basambirilaka ntiana kwa Za bu kalongesa milongoki miandi.”

2 Buna wabatêla: “Bu lusambilaka, tâkeno ebu: ‘Tata, bîka nkumbu’aku yabâ ya santu. Bîka Timfumu tiaku tiza. 3 Tu hana bidia bilumbu biabiansoni, tintwari na nsatu zeto za muna lumbu. 4 Mpe lemvokela masumu meto, mu bungu ti beto beni mpe mbo tulemvokelaka bô batuyirikaka mbi. Mpe Kubîkandi takota mu ntontolo.’”

5 Ha manima wabatêla: “Banzeno’eti, mosi mu beno wê na ndiku, wele kwe yandi ha kati-kati dia mpimpa mpe mu têlele, ‘Ndiku’ani, kundefesa mampa matatu, 6 mu bungu ti ndiku’ani yimosi yitûkiri ku nzietolo, yiziri kwe meno ka ntama ko, mpe ka ndiena na tima ko ti nimuhana.’ 7 Kâ tûka mu nzo, ndiku yo mu têlele: ‘Kumbîka kwani. Mwelo wa nitikangiri, mpe bala bani ku mfulu bena na meno. Ka ndendi’â natelama ko mu ku hana tima.’ 8 Nilutêlele, ni bu sa ti ka telama ko mu mu hana tima mu bungu ti ndiku’andi yena, ntembe kâni mu bungu ti fuki tiatingi tie nandi, mbo katelama mpe mbo kamuhana bio bie nandi nsatu. 9 Buna nilutêlele, tatamaneno mu lomba mpe mbo baluhana, tatamaneno mu dinga mpe mbo lubaka, tatamaneno mu konkota mpe mbo baluziburila. 10 Mu bungu ti, wô lomba mbo bamuhana, wô dinga mbo kabaka mpe wô konkota mbo bamuziburila. 11 Diangana, ntia tata ha kati dieno, tala ti mwana’andi mu lombele mbizi, kwizi mu hana nioka kani kamuhana mbizi? 12 Peleko tala ti mu lombele dîki, ngano mbo kamuhana nkala-nseke? 13 Buna, tala ti beno lwe bankwa-mbi luzebi hana makabu ma mbote kwe bala beno, ngano Tata wê ku zulu ka hana mpeve santu ko kwe bô bamulombaka yo?”

14 Ha manima wakuma demo yimosi yasa ti muntu wumosi kabâ baba. Buna kwa demo bu yaduka, muntu wo wa baba wazonza, mpe pôka dia bantu diayituku. 15 Kâ bakaka mu bawu batâ: “Mu nzila ya Belzebube,* mfumu ya bademo, kata kumina bademo.” 16 Mpe bakaka, mu mu tonta, babatika mu mu lomba tidimbu tiaketi tûka ku zulu. 17 Mu bungu ti wazaba mbanzulu zawu, wabatêla: “Timfumu ni timfumu tie na titantu mbo timwangana, mpe nzo ni nzo ye na titantu mbo yibwa. 18 Mpila mosi mpe, tala ti Satana titantu tie nandi na yandi beni, buna bwe timfumu tiandi tilendi sikamana? Mu bungu ti lutêle ti mu nzila ya Belzebube nita kumina bademo. 19 Tala ti mu nzila ya Belzebube nikuminaka bademo, bala beno mu nzila ya nani babakuminaka? Ntiangu bawu bakwizi bâ mfundisi zeno. 20 Kâ, tala ti ni mu mulembo wa Nzambi nikuminaka bademo, buna Timfumu tia Nzambi tituriri kwe beno. 21 Muntu wê na ngolo mpe wê na binwanunu bia lunga bu wukêlaka nzo’andi, bima biandi mu tidzunu bibâka. 22 Kâ, tala ti muntu wumuyôkele mu ngolo wizi mu nwanisa mpe mu nungini, mbo kamukatula binwanunu bi kabele sikirilaka, mpe mbo kakaba bima bi kamuwukiri. 23 Wô lembolo ku lweka lwani, mutantu’ani wena, mpe wô lembo vukasaka na meno, mwangasa kamwangasaka.

24 “Mpeve ya mbi bu yidukaka mu muntu, mu mbuka zê na mutoto wa yuma kakwe yakambe mu dinga mbuka yi kahumina, mpe tala ti ka bakiri’â yo ko, buna têle, ‘Mu nzo’ani yi natûkiri nikâla.’ 25 Bu kakwe kâri, wizi ya bwana ya kombo, mpe ya kutama. 26 Buna, mbo kakwe dinga mpeve 7 zakaka zimuyôkele mu bubi mpe bu bamana kota, babêle mûna; buna mpasi ziturila muntu wo mbo ziyôka zîna zatekela.”

27 Bu keri tâka misamu mio, mukento wumosi weri ha kati dia pôka dia bantu, wamutêla mu ngolo: “Nsayi kwe mukento wakunata mu zimi mpe wakuyemeka!” 28 Kâ watâ: “Kâni, kâ nsayi kwe bô bawirikilaka zu dia Nzambi, mpe basarilaka dio!”

29 Bantu bu beri tatamanaka mu yikama, wabatika mu tâ: “Mbandu yi ya mbi yena; tidimbu yita dinga, kâ ka babahana tidimbu ko diambu’eti tidimbu tia Yona. 30 Ntiana kwa Yona kayizi bâ tidimbu mu bungu dia Bisi-Ninive, Mwana muntu mpe mbo kabâ tidimbu mu bungu dia mbandu yi. 31 Mu tilumbu tia mfundusu, mutinu wa mukento wa ku side na bantu ba mu ntangu yi mbo bavumbuka ha timosi kwe ba fwa, mpe yandi mbo kabafundisa, mu bungu ti watûka kûna kwa sukisina mutoto mu kwizi wâ ndwenga za Salomo. Kâ tala! muntu wê kû wuyôkele Salomo. 32 Mu ntangu ya mfundusu bantu ba Ninive na ba ntangu yi mbo bavumbuka kwe ba fwa ha timosi, mpe bawu mbo babafundisa mu bungu ti basoba mabanza Yona bu kabasamunina. Kâ tala! muntu wê kû wuyôkele Yona. 33 Muntu bu kamana namisaka mwinda, ka tûlaka wo ku mbuka ya swekama peleko ku nsi’a titunga ko, kâ ha zulu titûlulu tia mwinda katûlaka wo ngatu bô bakota bamona mutsamina. 34 Mwinda wa nitu ni disu diaku. Disu diaku bu disungamanaka tima timosi, nitu’aku yayansoni mpe mu mutsamina yibâka. Kâ, disu diaku bu didienokenaka, nitu’aku mpe mu mpimpa yibâka. 35 Dieka bo sa keba, ngatu mutsamina wê mu nge ka wubândi mpimpa. 36 Kâ tala ti nitu’aku yayansoni mu mutsamina yena, mpe ka yena na mbuka ya mpimpa ko, mbo yibâ na mutsamina ntiana mwinda wuta ku hana mutsamina.”

37 Bu kamanisa mu tâ misamu mio, Farize yimosi yamulomba mu kwizi dia ku nzo’andi. Buna wakota mpe badia.* 38 Kâ Farize yayituku, bu kamona ti Yezu ka sukula* moko ko ntete badia. 39 Kâ Mfumu wamutêla: “Beno Bafarize kopa na ndonga lusukulaka ku mbazi, kâ mu kati ba fuluka lwena mu dienokena na mu mbi. 40 Bizoba! Ngano wô wasala mbazi ka sala mpe kati ko? 41 Kâ bu luhanaka makabu kwe bamputu,* hanakeno bima bitûkaka mu kati, mpe bima bieno biabiansoni mbo bibâ bia tsema. 42 Kâ tiari kwe beno Bafarize, mu bungu ti tikunku timosi-timosi luhanaka mu bikunku bia 10 bia mente, bia peganone na bia matîti makaka ma nsunga ya mbote, kâ ka lusarilaka buderede na luzolo lwa Nzambi ko! Wufwanane mu sa bima bio, mpe lwalembo zimbakana bio biakaka. 43 Tiari kwe beno Bafarize, mu bungu ti chaise za ntete luzoloko mu sinagoge na mbote ha mazandu! 44 Tiari kwe beno, mu bungu ti ntiana mpiema lwena zilembo tomo monekaka,* mpe bantu zi badiataka bawu ka bazabi.”

45 Mosi mu bantu batomo zaba Musiku wamuvuturila: “Mulongi, bu ta tâ bo beto mpe ta finga.” 46 Kâ Yezu watâ: “Tiari kwe beno mpe lutomono zaba Musiku, mu bungu ti matsulu ma dema lunatisaka bantu, kâ beno beni ka lusimbaka mo ko na kani mu mulembo’eno wumosi!

47 “Tiari kwe beno, mu bungu ti mpiema za bambikuri lutungaka, kâ nkaka zeno zabahonda! 48 Diangana, beno mbangi zena za misamu mia yirika nkaka zeno, kâ ntono musamu wo bawu lutambulaka. Bahonda bambikuri, mpe beno mpiema zawu lutungaka. 49 Ntiangu ndwenga za Nzambi zitâka mpe: ‘Mbo nibatambikila mbikuri na bantumwa, mpe bawu mbo bahonda mpe mbo bakwamisa bakaka mu bawu, 50 ngatu menga ma mbikuri zazansoni matsamuka tûka mbatukulu ya nza, mabâ* ha mutu wa mbandu yi, 51 tûka menga ma Abele tii ma Zakari wu bahonda ha kati dia ziku* na tempelo.’* Diangana nilutêlele, menga mawu mbo mabâ* ha mutu wa mbandu yi.

52 “Tiari kwe beno lutomono zaba Musiku, mu bungu ti lukaturi vungula ya luzabu. Beno, ka lukotele’â ko, mpe bô bata kota luta yêla mu kabakasa!”

53 Buna bu kaduka mu nzo, bitsoniki na Bafarize babatika mu mu sila miangu na mu mu yula biyuvu biakaka biabingi; 54 weri nawu bamutambila mutambu, ngatu bamubwila mu nzonzolo ya yandi beni.