Like
18 Ha manima Yezu wabahana tifwani mu songela mfunu ya sambilaka ntangu zazansoni na ya lembo bîka, 2 watâ: “Ku hata dimosi, kweri na mfundisi yimosi yeri lembo tînaka Nzambi mpe yeri lembo zitisaka bantu. 3 Ku hata dîna, kweri mpe na mufwiri wumosi wa wukento weri kwizi mu talaka ntangu zazansoni mu mu têla, ‘Sa ti musamu wu ndie na wo na mutantu’ani bazengela wo mu buderede.’ 4 Mfundisi wakala mwa ntangu. Kâ ha manima watâ, ‘Ni bu sa ti ka nitînaka Nzambi ko, peleko ka nizitisaka bantu ko, 5 kâ mu bungu ti mufwiri wu ka ta bîka ko mu kwizi kunkwamisa, mbo nisa ti bazenga musamu’andi mu buderede ngatu kalembo tatamana mu kwizi kunkanzakasa na ndombolo zandi.’”* 6 Buna Mfumu watâ: “Wêno musamu wu têle mfundisi ni bu sa ti kondolo buderede! 7 Ngano Nzambi ka sa ko ti bazenga musamu mu buderede mu bungu dia bantu ba kasôla, bamuyawurilaka mpimpa na mwini, bu kabasongelaka luvivululu? 8 Wa nita lu têla, mbo kasa ti bakulu zenga musamu wo mu buderede. Kâ Mwana muntu bu kakwiza, ngano mbo kabwana timinu tia mpila yo ha mutoto?”
9 Wahana mpe tifwani eti kwe bantu bakaka beri na lukwikulu ti ba sungama bena mpe beri bongelaka bantu bakaka ntiana bantu ba mpamba: 10 “Babakala bole bayenda ku tempelo mu sambila, wumosi Farize yeri mpe wakaka titoti tia mpaku. 11 Farize yatelama mpe yabatika mu sambila ebu ku mutima, ‘Ô Nzambi, nikutondele mu bungu ti ka ndiena ntiana bantu babansoni bakaka ko—bê mivi, bantu balembolo ba sungama, bantu basarilaka bunsuza—peleko ntiana titoti tia mpaku eti. 12 Diêna nisaka mbala zole mu lumingu; mpe tikunku timosi mu bikunku bia 10 nihanaka mu bima bi nibakaka.’ 13 Kâ titoti tia mpaku tiatelama mwa mala, keri’â zoloko mu nanguna meso ku zulu ko, kâ ntulu keri bundaka bu keri tâka, ‘Ô Nzambi, kumfwila tiari, mu bungu ti musumuki ndiena.’ 14 Wa nita lu têla, bakala dio kêri ku nzo’andi mpe tomono moneka wa sungama yôka Farize yo. Mu bungu ti muntu ni muntu wutizangula mbo bamubetola, kâ muntu ni muntu wutibetola mbo bamuzangula.”
15 Ha manima, bantu bamunatina mpe bala bawu ba fioti ngatu kabasimba, kâ bu bamona bo, milongoki miabatika mu ba bamina. 16 Kâ Yezu watâ mbila bala ba fioti kwe yandi mpe watâ: “Bîkeno bala ba fioti biza kwe meno; ka ludingandi mu ba kabakasa, mu bungu ti Timfumu tia Nzambi tia bô bê ntiana bawu tiena. 17 Wa matieleka nita lu têla, wô lembo bwana Timfumu tia Nzambi ntiana mwana wa fioti, kani kabwe ka kota mô ko.”
18 Mpe mfumu yimosi ya Bayuda yamuyula: “Mulongi wa mbote, nti mfweti sa mu baka luzingu lwa mankululu?” 19 Yezu wamutêla: “Mu bungu dia nti ta kuntâ wa mbote? Muntu wumosi kwa wê wa mbote, ni Nzambi. 20 Ntumunu za zebi: ‘Kusandi bunsuza, kuhondandi muntu, kulabandi, kutândi timbangi tia bungungu, zitisa* tata’aku na nguri’aku.’” 21 Ha manima watâ: “Ntumunu zo zazansoni za nisarilaka tûka buleke bwani.” 22 Bu kamana wâ misamu mio, Yezu wamutêla: “Tima timosi tita ku kondo: Teka bimvwama biaku biabiansoni mpe kabila bamputu, buna mbo bâ na timvwama ku mazulu; mpe yiza wakundanda.” 23 Bakala dio bu diawâ bo, diayizi tomo bâ na tiari mu bungu ti nkatika mvwama yeri.
24 Yezu wamutala mpe watâ: “Musamu wa mpasi wubâ kwe bô bê na mbongo mu kota mu Timfumu tia Nzambi! 25 Diangana, mbo wubâ musamu wa fioti kwe shamo mu yôkela ha munwa wa ntumbu yi balondelaka, kâ musamu wa mpasi kwe mvwama mu kota mu Timfumu tia Nzambi.” 26 Bô bawâ musamu wo batâ: “Nani kwa lendi vûka?” 27 Yezu watâ: “Misamu mi lembanaka bantu, Nzambi ka lendi’â kalembana mio ko.” 28 Kâ Piere watâ: “Tala! Bima biabêle neto bia tasisiri mpe takulendi.” 29 Wabatêla: “Wa matieleka nita lu têla, ka kwena muntu ko sisiri nzo, peleko mukento, peleko nkazi, peleko bibuti, peleko bala, mu bungu dia Timfumu tia Nzambi, 30 lembo baka bwawu bu bima biyôkele, mpe mu nza* yikwiza, luzingu lwa mankululu.”
31 Ha manima wabonga ba 12 ha bawu kaka mpe wabatêla: “Tala! Ku Yerusaleme tuta kwenda, mpe misamu miamiansoni mi batsoneka mu nzila ya bambikuri mu bungu dia Mwana muntu mbo milungana. 32 Mu tifwani, mbo bamuteka ha moko ma bantu ba makanda, mbo bamusehesela, mbo bamufinga mpe mbo bamuloborela mante. 33 Mpe bu bamana mu winda bisikoti, mbo bamuhonda, kâ tilumbu tia bitatu mbo kavumbuka kwe ba fwa.” 34 Kâ ka babakula na kani tima ko mu misamu mio miamiansoni, mu bungu ti nsasa ya nzonzolo yo babaswekela mpe ka beri’â zabaka ko bwe misamu mio mieri zolo tâka.
35 Yezu bu keri pusanaka pene-pene na Yeriko, timfwa-meso timosi tiazakala mu ndeko nzila tieri yingaka. 36 Mu bungu ti wawâ pôka dia bantu dieri yôkaka, wabatika mu yula ntia musamu weri yôkaka. 37 Bamutêla: “Yezu Musi-Nazarete ta yôka!” 38 Buna wakawula mu ngolo: “Yezu, Mwana Davide, kumfwila tiari!” 39 Mpe bantu beri kwe yende ku matu babatika mu mu bamina, bu beri mu têlaka kakuta, kâ yandi ni keri tomo kawulaka mu ngolo: “Mwana Davide, kumfwila tiari!” 40 Buna Yezu wakangama mpe walomba bamunatina bakala dio. Bakala dio bu diapusana, Yezu wamuyula: 41 “Nti zololo nasa mu bungu dia nge?” Watâ: “Mfumu, sa ti navutu mona.” 42 Buna Yezu wamutêla: “Vutu mona; timinu tiaku tikuwasisi.” 43 Mpe hô nkatika bendo wavutu mona, mpe wabatika mu mu landa bu keri kwe kembele Nzambi. Bantu babansoni bu bamona bo, bakembela mpe Nzambi.