Like
16 Ha manima wavutu tâ kwe milongoki miandi: “Bakala dimosi dia mvwama diabâ na tisari* ti bafunda ti bimvwama biandi keri bebesaka. 2 Buna wamutâ mbila mpe wamutêla, ‘Ntia misamu nita wâ mu nge? Kuntsonekena mpila yi sarilaka bimvwama biani mu bungu ti ka nge’â ko vutu twarisa nzo’ani.’ 3 Buna tisari tiatâ ku mutima’andi, ‘Nti mfweti sa, mu bungu ti mfumu’ani weka kunkatula mu tisalu? Ka ndiena na ngolo ko za sala nsaba, mpe nsoni zê nani za yinga. 4 Ah! nzebi nti mfweti sa ngatu bu bakunkatula ku tisalu bantu bakumbwana ku nzo zawu.’ 5 Mpe watâ mbila mosi na mosi mu bantu beri defaka mfumu’andi, watâ kwe wa ntete, ‘Kwa defaka kwe mfumu’ani?’ 6 Wamuvuturila: ‘Bidezolo* 100 bia mafuta ma olive.’ Tisari tiamutêla, ‘Bonga mukanda’aku wa mfuka, zakala mpe kulu tsoneka 50.’ 7 Ha manima wayula kwe wakaka, ‘Mbo nge, kwa defaka?’ Watâ, ‘Bidezolo bia binene* 100 bia ble.’ Wamutêla, ‘Bonga mukanda’aku wa mfuka mpe tsoneka 80.’ 8 Mpe mfumu yasîka tisari tio, ni bu sa ti ka bâ wa sungama ko, mu bungu ti yandi wasarila ndwenga;* diangana bala ba nza* yi ndwenga zingi basarilaka ha kati dia mbandu’awu yôka bala ba mutsamina.
9 “Musamu wakaka, nilutêlele: Seno bindiku mu nzila ya bimvwama biakondo buderede, ngatu bu biwa balubwana mu mbuka za bêla za mankululu. 10 Wô wê wa kwikama mu misamu mia fioti wa kwikama mpe wena mu misamu mia minene, mpe wô lembolo wa sungama mu misamu mia fioti kena mpe wa sungama ko mu misamu mia minene. 11 Buna tala ti ka lwena ba kwikama ko mu mpila ya sarila bimvwama biakondo buderede, nani lu simbisa timvwama tia matieleka? 12 Mpe tala ti ka lwena ba kwikama ko mu mpila ya sarila bimvwama bia muntu wakaka, nani lu hana timvwama tia beno beni? 13 Ka kwena muntu ko lendi bâ ngamba ya mfumu zole, mu bungu ti mbo kayina yimosi mpe mbo kazolo yakaka, peleko mbo kakangama kwe yimosi mpe mbo kavweza yakaka. Ka lulendi’â lwabâ ngamba za Nzambi na za bimvwama ko.”
14 Bafarize beri zoloko mbongo, misamu mio miamiansoni beri wâka mpe babatika mu mu sehesela. 15 Buna wabatêla: “Ba sungama lutimonekesaka ha meso ma bantu, kâ Nzambi mitima mieno mia kazebi. Mu bungu ti tio timonekaka ntiana tia zanguka ha meso ma bantu tima tia ntonto tiena ha meso ma Nzambi.
16 “Musiku na Bambikuri biabâ tii mu ntangu ya Za. Mpe tûka ntangu yo nsangu za mbote za Timfumu tia Nzambi za bata samuna, mpe bantu ba mpila na mpila ngolo bata sarila mu kota mô. 17 Diangana, zulu na mutoto bilendi zimbakana, kâ lweka lwa titsono timosi tia Musiku mbo lulungana.
18 “Wô honda makwela na mukento’andi mpe kwelele mukento wakaka bunsuza kata sa, mpe wô kwela mukento wuhondele makwela na bakala diandi bunsuza kata sa.
19 “Kweri na bakala dimosi dia mvwama dieri lwataka binkuti bia mbwaki ya ngolo na bia line, mpe bilumbu biabiansoni keri yangalalaka mu nienze. 20 Kâ bakala dimosi dia mputu* dieri na nkumbu Lazare beri vulu kwizi sisaka ha mwelo’andi, mputa zeri nandi mu nitu yayansoni, 21 mpe nsatu yabâ nandi ya dia bima bieri bwaka ku nsi’a meza ma mvwama yo. Yee, mbwa mpe mputa zandi zeri kwizi hendaka. 22 Ha manima bakala dio dia mputu diafwa mpe mbazi zamunata ku lweka lwa Abrahame.*
“Bakala dio dia mvwama mpe diafwa mpe bamuzika. 23 Mpe ku ndiamu* ku keri mwinaka mpasi, wananguna meso mandi, mpe wamona mala Abrahame na Lazare weri ku lweka lwandi.* 24 Buna watâ mbila mpe watâ, ‘Tata Abrahame, kumfwila tiari, mpe tambika Lazare kavwika mutu mulembo’andi mu mamba mpe kalembeka ludimi lwani mu bungu ti mpasi nita mona ku tiya tu twa ngolo.’ 25 Kâ Abrahame watâ, ‘Mwana, bambuka ti wa fuluka wabâ mu bima bia mbote mu luzingu lwaku, kâ Lazare yandi bima bia mbi kwa keri bakaka. Bwawu bu mbombolo kata baka kû kâ nge mpasi ta mona. 26 Musamu wakaka, bulu dia dinene batûriri ha kati dia beto na beno, buna bô bê kû kwe beto bata dinga mu kwiza kwe beno, ka balendi’â benda ko, mpe bô bê kwe beno ka balendi’â biza kwe beto ko.’ 27 Buna muntu wo watâ: ‘Mu bungu ti ni bo wena, nikulombele tata mu mu tambika mu nzo ya tata’ani, 28 mu bungu ti mpangi tanu zê nani, kenda kabalwengesa ngatu balembo kota bawu mpe ku mbuka yi ya mpasi.’ 29 Kâ Abrahame wamutêla, ‘Bawu Mose na Bambikuri bê nawu; bîka babawirikila.’ 30 Muntu wo watâ, ‘Kâni tata Abrahame, kâ tala ti muntu wutûkiri kwe ba fwa wele bamonekena mbo basoba mabanza.’ 31 Kâ wamutêla, ‘Tala ti ka bawirikiri’â Mose na Bambikuri ko, ka bawirikila mpe muntu wutûkiri kwe ba fwa ko.’”