Bisalu bia Bantumwa
18 Ha manima ma misamu mio, wakatuka ku Atene mpe wayenda ku Korente. 2 Wabwana Muyuda wumosi wu batâka nkumbu Akila, Musi-Ponti watûka ku Itali ka ntama ko na mukento’andi Prisile, mu bungu ti Klode wahana ntumunu kwe Bayuda babansoni mu katuka ku Rome. Buna, Paulo wayenda kwe bawu. 3 Mpe mu bungu ti tisalu timosi beri salaka, Paulo wabâ mu nzo’awu mpe wasala na bawu, mu bungu ti bisari bia bivula bieri. 4 Tinzonzi keri saka* mu sinagoge sabala zazansoni, mpe Bayuda na Bagreke keri wisaka.
5 Silase na Timote bu bakatuka ku Masedwane, Paulo wabatika mu tomo tihana mu tisalu tia samuna zu, bu keri tâka timbangi kwe Bayuda mu songela ti Yezu ni Kristo. 6 Kâ, mu bungu ti batatamana mu mu telamana na mu mu zonzela mu mpila ya mbi, Paulo wakubula binkuti biandi mpe wabatêla: “Menga meno mabâ ha mitu mieno. Wa tsema ndiena. Tûka bwawu bu mbo nikwenda kwe bantu ba makanda.” 7 Buna wakatuka kûna* mpe wayenda ku nzo ya bakala dimosi di batâka nkumbu Titiuse Yustuse, tisari timosi tia Nzambi tiabâ na nzo pene-pene na sinagoge. 8 Krispuse, ntwarisi ya sinagoge, wabatika mu kwikila mu Mfumu, yandi na bantu ba mu nzo’andi. Bisi-Korente babingi bawâ nsangu, bayizi kwikila mpe babatusu. 9 Musamu wakaka, mu mpimpa, Mfumu watâ kwe Paulo mu timona-meso: “Kubândi na bunkuta, kâ tatamana mu zonza mpe kukutandi, 10 mu bungu ti na nge ndiena mpe ka kwena muntu ko wukunwanisa mu ku sa bubi; mu bungu ti bantu babingi bê nani mu mumvuka wu.” 11 Buna wabâ kûna mvula yimosi na ngonda 6, bu keri kwe longese zu dia Nzambi ha kati diawu.
12 Galio bu keri guvernere ya Akayi, Bayuda bavukana mu sa Paulo bubi na mu mu nata ku tribinale, 13 batâ: “Bakala di bantu kata wisa mu sambila Nzambi mu mpila yita lembo delakana na musiku.” 14 Kâ Paulo bu kadinga mu zonza, Galio watâ kwe Bayuda: “Diangana, tala ti kondo kwa buderede kubêle peleko musamu wa nkatika wa mbi, mbo wuketi bâ musamu wa mbote kwe meno mu lu wirikila na luvivululu, beno Bayuda. 15 Kâ tala ti disikita luta disikita mu ntêlo, mu nkumbu na mu musiku wa beno beni, lufweti wa yirika beno beni. Ka nzololo’â ko nabâ mfundisi ya misamu mio.” 16 Dieka bo wabakuma mu tribinale. 17 Buna, babansoni babwila Sostene, ntwarisi ya sinagoge, mpe babatika mu mu twa ha matu ma tribinale. Kâ Galio ka kota misamu mio ko na kani fioti.
18 Kâ, bu kamana yôkesa mwa bilumbu, Paulo watâ kwe bampangi ti fweti kwenda. Wakota mu bato mu kwenda ku Siri tintwari na Prisile na Akila. Wazengoso nsuki ku Sankere mu bungu ti mpana* kadia. 19 Buna batula ku Efeze, mpe wabasisa kûna; kâ wakota mu sinagoge mpe wamoka na Bayuda. 20 Ni bu sa ti batatamana mu mu têla mu vutu bâ kô mwa bilumbu, wakala. 21 Kâ wabatêla ti wafweti kwenda, bu katâ: “Mbo nivutu kâla kwe beno tala ti Yehova* zololo.” Wakatuka ku Efeze mu nzila ya mubu 22 mpe wakôka ku Sezarea. Wanaka* mu kwe hana mbote kwe timvuka mpe ha manima wayenda ku Antioshe.
23 Bu kamana yôkesa mwa ntangu kûna, wayenda mpe wazungana mbuka zazingi mu nsi ya Galate na ku Frizi bu keri tindisaka milongoki miamiansoni.
24 Muyuda wumosi weri na nkumbu Apolose, Musi-Alekisandri watula ku Efeze; bubote keri zonzaka mpe Matsonoko ma katomo zaba. 25 Bakala diango ndongosolo za Yehova* bamulongesa, mpe mu bungu ti luhemo lwalwingi lwabâ nandi mu lubakusu lwa mpeve ya Nzambi, na matieleka mamansoni keri zonzaka mpe keri longesaka misamu mitariri Yezu, kâ bateme ya Za kwa kazaba. 26 Wabatika mu zonza na butindi bwabwansoni mu sinagoge, mpe Prisile na Akila bu bamuwâ, bamubonga kwe bawu mpe batomo mu bangurila nzila za Nzambi. 27 Mu bungu ti nsatu yabâ nandi ya kwenda ku Akayi, bampangi batsonekena milongoki mu ba lemberela mu mu bwana na nsayi. Buna bu kayenda kûna, watomo bakisa bô bayizi kwikila mu nzila ya bweso bwa nzitukulu bwa Nzambi; 28 mu bungu ti ha meso ma bantu babansoni mpe na ngolo zazansoni wasongela ti Bayuda huna beri hunaka, bu katomo ba songela mu nzila ya Matsonoko ti Yezu ni Kristo.