Matie

19 Yezu bu kamanisa mu tâ misamu mio, wakatuka ku Galile mpe wayenda mu ndilu ya Yude ku simu diakaka dia Zurde. 2 Buna, pôka dia bantu diamulanda, mpe wabawasisa kûna.

3 Mpe Bafarize bapusana kwe yandi mu mu tonta, bamuyula: “Ngano bakala nswa wê nandi wa honda makwela na mukento’andi mu musamu ni musamu?” 4 Yandi wabavuturila: “Ngano ka lwatanga ko ti wô wabasala tûka ku mbatukulu, wabasala mukento na bakala 5 mpe watâ: ‘Ntiangu bakala mbo kasisa tata’andi na nguri’andi, mpe mbo kakangama kwe mukento’andi, mpe ba bole mbo babâ musunia wumosi’? 6 Buna, ka basiri’â bantu bole ko, kâ beka musunia wumosi. Ntiangu muntu ka wuhambasandi bio bi vukase* Nzambi.” 7 Bawu bamutêla: “Buna, mu bungu dia nti Mose kalomba mu hana mukanda wusongela ti mukento bakumini na mu honda makwela na yandi?” 8 Yezu wabatêla: “Ni mu bungu dia mitima mieno mia ngolo, Mose kaluhana nswa wa honda makwela na bakento beno, kâ misamu ka miabêla buna ko ku mbatukulu. 9 Nilutêlele ti wô honda makwela na mukento’andi, tala ti ka mu bungu dia bunsuza* ko, mpe kwelele muntu wakaka, siri bunsuza.”

10 Milongoki miamutêla: “Tala ti musamu ni bo wena kwe bakala na mukento’andi, bubote bwena mu lembo kwela.” 11 Yandi wabatêla: “Ka bantu babansoni’â ko batambulaka musamu wo, kâ bô kwa bê na kabu. 12 Bakaka ka bakwelaka ko mu bungu ti ni bo babutukila, bakaka bubakala babakatula kwe bantu, mboko bakaka ka bakwelaka ko mu bungu dia Timfumu tia mazulu. Bîka ti wô lendi tambula musamu wo, katambula wo.”

13 Ha manima bamunatina bala ba fioti ngatu kabatenseka moko mpe kabasambirila, kâ milongoki miababamina. 14 Kâ Yezu watâ: “Bîkeno bala ba fioti, mpe ka ludingandi mu ba kabakasa mu kwiza kwe meno, mu bungu ti Timfumu tia mazulu tia bô bê ntiana bawu tiena.” 15 Wabatenseka moko mpe wakatuka kûna.

16 Mpe tala! muntu wumosi wayiza kwe yandi mpe watâ: “Mulongi, nti mfweti sa bia mbote mu baka luzingu lwa mankululu?” 17 Yandi wamutêla: “Mu bungu dia nti ta kundiurila misamu mitariri mbote? Muntu wumosi kwa wê wa mbote. Kâ, tala ti zololo wabaka luzingu, tatamana mu sarila ntumunu.” 18 Yandi wamutêla: “Ntia ntumunu?” Yezu watâ: “Kufweti’â wahonda muntu ko, kufweti’â wasa bunsuza ko, kufweti’â walaba ko, kufweti’â watâ timbangi tia bungungu ko, 19 zitisa* tata’aku na nguri’aku, mpe fweti zolo mpwana’aku ntiana nge beni.” 20 Ntwenia yo ya bakala yamutêla: “Ntumunu zo zazansoni za nisarilaka; nti biakaka bita kunkondo?” 21 Yezu wamutêla: “Tala ti zololo wabâ wa lunga, yenda wateka bimvwama biaku mpe kabila bamputu, buna mbo bâ na timvwama ku zulu; mpe yiza wakundanda.” 22 Ntwenia yo ya bakala bu yawâ bo, wayenda na tiari tiatiansoni, mu bungu ti bimvwama biabingi biabâ nandi. 23 Buna, Yezu watâ kwe milongoki miandi: “Wa matieleka nita lu têla, musamu wa mpasi wubâ kwe mvwama mu kota mu Timfumu tia mazulu. 24 Wa nita vutu lu têla, mbo wubâ musamu wa fioti kwe shamo mu yôkela ha munwa wa ntumbu, kâ musamu wa mpasi kwe mvwama mu kota mu Timfumu tia Nzambi.”

25 Milongoki bu miawâ bo, miatomo yituku, mpe miatâ: “Buna nani kwa lendi vûka?” 26 Bu katomo ba sungamana, Yezu wabatêla: “Kwe bantu ka bulendi’â bwabâ ko, kâ Nzambi ka lendi’â kalembana musamu ko.”

27 Buna Piere wamuvuturila: “Tala! Bima biabiansoni bia tasisiri mpe takulendi. Dieka bo nti tubaka?” 28 Yezu wabatêla: “Wa matieleka nita lu têla, bima biabiansoni bu bikâla bia môna, mu ntangu Mwana muntu yi kazakala ha muyâlu’andi wa mukembo, beno lwakundendi mbo luzakala ha miyâlu* 12 mu fundisa makanda 12 ma Israele. 29 Mpe wô sisa nzo, peleko nkazi, peleko bibusi, peleko tata, peleko mama, peleko bala, peleko mitoto mu bungu dia nkumbu’ani, mbo kabaka bio mbala yôka 100, mpe mbo kabaka luzingu lwa mankululu.

30 “Kâ babingi bê ba ntete mbo babâ ba mansukina, mpe ba mansukina mbo babâ ba ntete.