Matie
3 Mu ntangu yîna, Za Tibatisi wayizi samuna ku sese* dia Yude, 2 bu keri tâka: “Sobeno mabanza, mu bungu ti Timfumu tia mazulu tieka pene-pene.” 3 Diangana, ni yandi mbikuri Izayi kazonzela bu katâ: “Zu dia muntu dita kawula ku sese:* Kubikeno nzila ya Yehova! Sungikeno nzila zandi.” 4 Za, tinkuti ti basala mu mika mia shamo keri lwataka, na musinga wa kwire mu luketo, makonko na mafuta ma niosi keri diaka. 5 Bantu ba ku Yerusaleme, ba Yude yayansoni, na ba tizunga tiatiansoni tia Zurde, kwe yandi beri kwendaka, 6 mpe bawu keri batisaka* mu nzari ya Zurde bu beri tomo fungulaka masumu mawu.
7 Bu kamona ti Bafarize na Basaduseye babingi beri kwizi batusuku, wabatêla: “Beno bala ba mpiri, nani walulwengese mu dioka nkesi zita kwiza? 8 Buna, yirikeno misamu misongela ti lusobele mabanza. 9 Ka ludingandi mu tâ ti: ‘Tata’eto ni Abrahame.’ Mu bungu ti wa nita lu têla, Nzambi lendi hana bala kwe Abrahame mu nzila ya matari ma. 10 Diangana soka dieka ha taku dia muti. Muti ni muti wulembo butaka mbutu za mbote mbo bazenga wo, mpe mbo balosa wo ku tiya. 11 Meno beno nita batisa mu mamba, mu bungu ti lusobele mabanza, kâ wô kwiza ha manima mani kundiôkele mu ngolo, mpe ka ndiena wa lunga ko mu mu katula mapapa, yandi mbo kalubatisa mu mpeve santu na mu tiya. 12 Tipelo tiandi tia yengezela ha koko kwandi tiena, mpe mbo katomo tsemesa mbuka’andi ya tutila mbutu, mbo kakutakasa ble’andi mu nzo yi balundilaka bima, kâ titîti mbo kayoka tio ku tiya tu balendi lembo honda.”
13 Ha manima, Yezu wakatuka ku Galile mpe wayenda ku Zurde mu batusu kwe Za. 14 Kâ, Za wadinga mu mu kabakasa, bu katâ: “Ni meno mfweti batusu kwe nge, kâ nge wiziri kwe meno?” 15 Yezu wamuvuturila: “Bîka wabêla bo bwawu bu, mu bungu ti ni bo tufweti lungisila misamu miamiansoni mia sungama.” Buna ka vutu’â mu kabakasa ko. 16 Bu kamana batusu, mbala mosi Yezu waduka mu mamba, buna, mazulu mazibuka, wamona mpeve ya Nzambi yeri kôkaka ntiana bembe, mpe diayizi mu bwila. 17 Mpe tala! Zu diatûka ku mazulu diatâ: “Wu ni Mwana’ani wu ntomono zolo, wu ntamburi.”