Matie

6 “Seno keba mu lembo yirika misamu mia sungama ha meso ma bantu mu timonekesa; tala ti kâni, ka lubaka musendo ko wutûka kwe Tata’eno die ku mazulu. 2 Buna, bu hanaka makabu* kwe bamputu, kusikakandi mpungi ha matu maku ntiana bu saka bangungu mu sinagoge na mu nzila ngatu bantu babasîka. Wa matieleka nita lu têla, musendo’awu wa batibakiriri. 3 Kâ nge, bu hanaka makabu kwe bamputu, kusandi ti koko kwaku kwa lukento kwazaba mita yirika koko kwaku kwa lubakala, 4 ngatu makabu maku kwe bamputu masalama mu mansweki, buna Tata’aku ditalaka ku mansweki mbo kakusenda.

5 “Mpe, bu lusambilaka, ka lusakandi ntiana bangungu, bazoloko mu sambila tia mitela mu sinagoge na ha mahambu ma nzila za zinene, ngatu bantu babamona. Wa matieleka nita lu têla, musendo’awu wa batibakiriri. 6 Kâ, tala ti zololo wasambila, kota mu shambre’aku ya ku kati, mpe bu mana kanga mwelo, sambila Tata’aku die ku mansweki, buna Tata’aku ditalaka ku mansweki, mbo kakusenda. 7 Bu lusambilaka, ka lukârilakandi misamu mimosi ntangu zazansoni, ntiana bu saka bantu ba makanda, mu bungu ti babanzaka ti mbo babawâ bu bazonza bwabwingi. 8 Buna ka lubândi ntiana bawu, mu bungu ti Tata’eno zebi mio mie neno nsatu ntete lwamulomba.

9 “Lufweti sambilaka ebu:

“‘Tata’eto die ku mazulu, bîka nkumbu’aku yabâ ya santu. 10 Bîka Timfumu tiaku tiza, bîka luzolo lwaku lwasalama ha mutoto ntiana ku zulu. 11 Tu hana bidia* bie neto nsatu lumbu ti. 12 Mpe lemvokela masumu meto ntiana bu tulemvokelaka bô batuyirikaka mbi. 13 Kubîkandi takota mu ntontolo, kâ tu kûla* mu munkwa-mbi.’

14 “Mu bungu ti lwamana lemvokela bantu masumu mawu, Tata’eno die ku zulu mbo kalulemvokela mpe. 15 Kâ, lwamana lembo lemvokela bantu masumu mawu, Tata’eno mpe ka lulemvokela masumu meno ko.

16 “Bu lusaka diêna, ka lusakandi bidiri bia tiari ntiana bangungu, mu bungu ti bidiri biawu basobesaka mu songela kwe bantu ti diêna bata sa. Wa matieleka nita lu têla, musendo’awu wa batibakiriri. 17 Kâ, nge bu saka diêna, tûla mafuta ku mutu‘aku, mpe sukula tidiri tiaku, 18 ngatu wasongela ti kusaka diêna ko mu bungu dia bantu, kâ mu bungu dia Tata’aku kwa die ku mansweki, mpe Tata’aku ditalaka ku mansweki mbo kakusenda.

19 “Bîkeno mu kutakasa bimvwama ha mutoto ku dîlaka bio nselele, ku bebeselaka bio ruye, mpe ye mbuka yikotaka mivi mu ngolo mu laba. 20 Kâ, kutakaseno bimvwama ku zulu ku lembo bia dîlaka banselele, ku lembo bia bebeselaka ruye, mpe ku lembo kotaka mivi mu ngolo mu laba. 21 Mu bungu ti kô kwe timvwama tiaku, mutima’aku mpe ni kô wubâ.

22 “Mwinda wa nitu ni disu, buna tala ti disu diaku disungamane* tima timosi, nitu’aku yayansoni mbo yibâ mu mutsamina. 23 Kâ, tala ti disu diaku dienokena dikwe dienokene, nitu’aku yayansoni mbo yibâ mpimpa. Tala ti mutsamina wê mu nge nkatika mpimpa wena, buna mpimpa yango nguria ngolo yena.

24 “Ka kwena muntu ko wulendi bâ ngamba ya mfumu zole, mu bungu ti mbo kayina yimosi mpe mbo kazolo yakaka, peleko mbo kakangama kwe yimosi mpe mbo kavweza yakaka. Ka lulendi’â lwabâ ngamba za Nzambi ko na za bimvwama.

25 “Ntiangu nita lu têla: Bîkeno mu bâ na lwaka mu bungu dia luzingu* lweno mu bio bi ludia, peleko bi lunwa peleko mu bungu dia nitu zeno mu bio bi lulwata. Ngano luzingu* ka luyôkele’â bidia ko, mpe nitu ka yiyôkele’â binkuti ko? 26 Tomoeno taluzula nuni za mazulu, ka zikunaka mbutu ko, ka zitiaka ko, mpe ka zikutakasaka mu nzo zi balundilaka bima ko, kâ Tata’eno die ku mazulu bawu kadikilaka. Ngano ka luyôkele’â ntalu na bawu ko? 27 Nani mu beno mu lwaka na lwaka, lendi lalumuna luzingu lwandi na kani mu koko kumosi? 28 Mpe mu bungu dia nti luta bêla na lwaka mu bungu dia binkuti? Bakeno malongi mu mpila yi menenaka bifulu bia makanga. Ka bisalaka ko, mpe ka bitungaka binkuti ko; 29 kâ nilutêlele, banza Salomo, mu mukembo’andi wawansoni, ka sa lwatila ko ntiana timosi tia bifulu bio. 30 Tala ti Nzambi ni bo kalwikilaka bitîti bia makanga bie hô lumbu ti, kâ bi batuba ku tiya mbazi, ngano ka tomo’â lu lwikila ko, beno lwe na timinu tia fioti? 31 Buna, kani kabwe ka lubâkandi na lwaka bu lutâ: ‘Nti tudia?’ peleko ‘Nti tunwa?’ peleko ‘Nti tulwata?’ 32 Bantu ba makanda misamu ni mio miamiansoni batomo belokelaka lwaka, Tata’eno die ku zulu zebi ti bima bio biabiansoni bie neno nsatu.

33 “Buna tatamaneno mu toko dinga Timfumu na buderede bwa Nzambi, mpe bima bio biabiansoni biakaka mbo baluyikila bio. 34 Kani kabwe ka lubândi na lwaka mu bungu dia tilumbu tia mbazi, mu bungu ti tilumbu tia mbazi mbo tibâ na maniongo mandi. Muna tilumbu na mpasi zandi.