Za

6 Ha manima, Yezu wayenda ku simu diakaka dia mubu wa Galile, peleko Tiberiade. 2 Mpe pôka dia bantu diatatamana mu mu landa mu bungu ti bimangu bi keri saka beri monaka bu keri wasisaka mbevo. 3 Buna Yezu wanaka ku mongo mpe wazakala kûna na milongoki miandi. 4 Pake, malaki ma Bayuda, pene-pene mabâ. 5 Yezu bu kananguna meso mpe bu kamona pôka dia bantu dieri kwizaka kwe yandi, watâ kwe Filipe: “Kwe tusumbila mampa mu bungu dia bantu ba ngatu badia?” 6 Kâ Yezu misamu mio keri tâka mu mu tonta, mu bungu ti wazaba nti kaketi sa. 7 Filipe wamuvuturila: “Mampa ma denie* 200 ka malunga ko ngatu muna muntu kê baki mwa tibuku.” 8 Mosi wa milongoki miandi Andre, mpangi ya Simo Piere wamutêla: 9 “Mwana wa bakala wê hâ wê na mampa matanu ma orze na mbizi zole za fioti. Ngano mbo malunga kwa mu bungu dia bantu bo babingi?”

10 Yezu watâ: “Zakaseno bantu. Mu bungu ti matîti mamingi mabâ ha mbuka yo, bantu bazakala; kampe babakala 5 000 babâ. 11 Yezu wabonga mampa mpe bu kamana sa lusambulu lwa matondo, wakaba mo kwe bantu bazakala hâna; ni bo kwa mpe kasa na mbizi za fioti mpe bantu badia buna bu bazolo. 12 Kâ bantu bu bamana dia buna bu bazolo, Yezu watâ kwe milongoki miandi: “Toteno bibuku bisiri ngatu na kani tima tialembo hombela.” 13 Buna batota bio mpe bafulusa bitunga 12 mu bibuku bia sisa bantu badia mampa matanu ma orze.

14 Bantu bu bamona timangu ti kasa, babatika mu tâ: “Wa matieleka, yandi ni Mbikuri yaketi kwiza mu nza.” 15 Ha manima, Yezu bu kazaba ti mbo baketi kwizi mu bwila mu mu sa mutinu, wavutu bendoka yandi kaka ku mongo.

16 Nkokela bu yatula, milongoki miandi miakôka ku mubu, 17 banaka mu bato mpe babatika mu sabuka mubu mu kwenda ku Kafarnawome. Mpimpa yatifwanina mpe Yezu ka tibêla na bawu ko. 18 Musamu wakaka, mubu ngolo weri ninganaka mu bungu ti titembo ngolo tieri pûpaka. 19 Kâ, bu basa kilometre* kampe 5 peleko 6, bamona Yezu weri kwe yende ha mukanda mamba mpe weri pusanaka na bato, mpe bunkuta bwababaka. 20 Kâ wabatêla: “Meno wena; ka lubândi na bunkuta!” 21 Buna batambula mu mu kotesa mu bato, mpe hô nkatika bendo bato yaye kangama ku mbuka yi beri kwendaka.

22 Tilumbu tialanda, pôka dia bantu diasâla ku simu diakaka, diamona ti ka kwabâ bato ko. Bato ya fioti yabâ hô, kâ Yezu ka naka mu bato yo ko na milongoki miandi, mu bungu ti milongoki miandi miayenda bawu kaka. 23 Kâ bato zatûka ku Tiberiade zatula pene-pene na mbuka yi badîla mampa, Mfumu bu kamana sa lusambulu lwa matondo. 24 Buna pôka dia bantu bu diamona ti Yezu peleko milongoki miandi ka babâ kûna ko, banaka mu bato zawu mpe bayenda ku Kafarnawome mu dinga Yezu.

25 Bu bamumona ku simu diakaka dia mubu, bamutêla: “Rabi, ntia ntangu turiri kû?” 26 Yezu wabavuturila: “Nkatika matieleka nita lu têla, ka luta kundinga ko mu bungu ti bimangu lwamweni, kâ mu bungu ti mampa lwadiri mpe lwayukuti. 27 Saleno, ka mu bungu dia bidia ko bibolaka, kâ mu bungu dia bidia bitatamanaka mu bungu dia luzingu lwa mankululu, bidia bi lu hana Mwana muntu; mu bungu ti ni mu yandi Tata, Nzambi Yandi beni, katula tiniemo ti yandi katambula.”

28 Buna bamutêla: “Nti tufweti sa mu lungisa bisalu bia Nzambi?” 29 Yezu wabavuturila: “Tisalu tia Nzambi ni eti, lufweti sarila timinu mu muntu wu katambika.” 30 Buna bamutêla: “Ntia timangu sa ngatu tamona mpe takwikila? Ntia tisalu ta sala? 31 Nkaka zeto mane badia ku sese, ntiana bu watsonama: ‘Wabahana dimpa diatûka ku zulu mu dia.’” 32 Buna Yezu wabatêla: “Nkatika matieleka nita lu têla, Mose ka lu hana dimpa diatûka ku zulu ko, kâ Tata’ani nkatika dimpa ditûkiri ku zulu kata lu hana. 33 Mu bungu ti dimpa dia Nzambi ni dio ditûkiri ku zulu mpe dihanaka luzingu mu nza.” 34 Buna bamutêla: “Mfumu, tu hanaka dimpa dio ntangu zazansoni.”

35 Yezu wabatêla: “Meno ni dimpa dia luzingu. Wô kwiza kwe meno ka vutu’â bâ na nsatu ko, mpe wô sarila timinu mu meno, kani kabwe ka vutu’â bâ na nsatu mamba ko. 36 Kâ ntiana bu nalutêlele, meno lwamweni kâ ka luta kwikila ko. 37 Bantu babansoni ba kungana Tata mbo bakwiza kwe meno, mpe kani kabwe ka nikuma wô ta kwiza kwe meno ko; 38 mu bungu ti ka natûka ku zulu ko mu sarila luzolo lwa me beni, kâ mu sarila luzolo lwa wô wakuntambika. 39 Luzolo lwa wô wakuntambika ni elu, ka mfweti’â nahombesa na kani wumosi ko mu bô babansoni ba kakungeni, kâ mfweti ba vumbula kwe ba fwa mu tilumbu tia mansukina. 40 Mu bungu ti luzolo lwa Tata’ani ni elu: muntu ni muntu wutambula Mwana mpe sarila timinu mu yandi kabaka luzingu lwa mankululu, mpe mbo nimuvumbula kwe ba fwa mu tilumbu tia mansukina.”

41 Buna Bayuda babatika mu niunguta mu yandi mu bungu ti ebu katâ: “Meno ni dimpa ditûkiri ku zulu.” 42 Mpe babatika mu tâ: “Ngano yandi ka Yezu’â ko mwana wa Yozefe, wu tuzabiri tata na mama? Bwawu bu mu bwe kata têla ti ‘Meno ni dimpa ditûkiri ku zulu’?” 43 Yezu wabavuturila: “Bîkeno mu niunguta. 44 Ka kwena muntu ko lendi kwiza kwe meno tala ti Tata wakuntambika ka mu bendele’â ko, mpe mbo nimuvumbula kwe ba fwa mu tilumbu tia mansukina. 45 Watsonama mu Bambikuri ti: ‘Yehova* mbo kabalongesa babansoni.’ Muntu ni muntu wuwirikiri Tata mpe wulongokele, kwe meno kakwizaka. 46 Ka kwena muntu ko weka mona Tata, diambu’eti wô watûka kwe Nzambi; muntu wo ni yandi weka mona Tata. 47 Nkatika matieleka nita lu têla, wô kwikilaka, luzingu lwa mankululu lwe nandi.

48 “Meno ni dimpa dia luzingu. 49 Nkaka zeno badia mane ku sese, kâ bafwa. 50 Di ni dimpa ditûkiri ku zulu, buna wô dia dio ka fwa ko. 51 Meno ni dimpa dia moyo ditûkiri ku zulu. Tala ti muntu diri dimpa di, mbo kazinga mankululu; mpe diangana, dimpa di nimuhana ni nitu’ani mu bungu dia luzingu lwa nza.”

52 Buna Bayuda babatika mu disikita bawu na bawu, bu batâ: “Bwe muntu wu kalendi tu hanina musunia’andi ngatu tadia?” 53 Buna Yezu wabatêla: “Nkatika matieleka nita lu têla, tala ti ka ludiri’â musunia wa Mwana muntu ko mpe ka lunwini’â menga mandi ko, ka lwena na luzingu mu beno ko. 54 Wô dia musunia’ani mpe nwa menga mani, luzingu lwa mankululu lwe nandi, mpe mbo nimuvumbula kwe ba fwa mu tilumbu tia mansukina; 55 mu bungu ti musunia’ani nkatika bidia biena, mpe menga mani nkatika malavu mena. 56 Wô dia musunia’ani mpe nwa menga mani mu bumosi kena na meno, mpe meno mu bumosi ndiena na yandi. 57 Ntiana kwa Tata dia moyo bu kakuntambika mpe bu ndie wa moyo mu bungu dia Tata, dieka bo wô dia musunia’ani, yandi mpe mbo kabâ wa moyo mu bungu dia meno. 58 Di ni dimpa ditûkiri ku zulu. Ka diena ntiana dio dia dia nkaka zeno ko, kâ zafwa. Wô dia dimpa di mbo kazinga mankululu.” 59 Watâ misamu mio bu keri longesaka mu sinagoge* ku Kafarnawome.

60 Bu bawâ misamu mio, milongoki miandi miamingi miatâ: “Nzonzolo yi ngolo yena, nani lendi ya wirikila?” 61 Kâ Yezu bu kazaba ti milongoki miandi musamu wo beri niungutilaka, wabatêla: “Ngano wulutêsele kuba? 62 Buna nti bitula tala ti lumweni Mwana muntu wuta naka kûna ku katûka? 63 Ni mpeve yihanaka luzingu; musunia ka wena salu ko. Misamu mi nilutêlele mpeve miena, mpe luzingu miena. 64 Kâ ha kati dieno bantu bê kô bata lembo kwikila.” Mu bungu ti tûka ku mbatukulu Yezu wazaba bô beri lembo kwikilaka na wô waketi mu teka. 65 Wavutu tâ: “Ntiangu nilutêlele: Ka kwena muntu ko wulendi kwiza kwe meno tala ti Tata ka mu heni’â nzila ko.”

66 Mu bungu dia musamu wo, milongoki miandi miamingi miakarila bima bi basisa ku manima mpe ka bavutu’â zolo ko mu kwe yende na yandi. 67 Buna Yezu watâ kwe ba 12: “Ngano beno mpe ka luta zolo ko mu kwenda?” 68 Simo Piere wamuvuturila: “Mfumu kwe nani tukwenda? Nzonzolo ya luzingu lwa mankululu ye naku. 69 Tayizi kwikila mpe tayizi zaba ti nge ni Musantu wa Nzambi.” 70 Yezu wabavuturila: “Beno ba 12 nasôla, ka buna ko? Kâ wumosi mu beno hunisinaka bantu misamu.”* 71 Diangana, Yuda keri zonzelaka mwana wa Simo Iskariote, mu bungu ti ni yandi waketi mu teka ni bu sa ti wumosi mu ba 12 weri.