Like

21 Bu kananguna meso, Yezu wamona bamvwama beri tûlaka makabu mu kese za makabu. 2 Ha manima wamona mufwiri wumosi wa wukento weri mputu watûla mipata miole mia fioti mialembo bâ na ntalu* yayingi, 3 mpe watâ: “Wa matieleka nita lu têla, mufwiri wu mbongo zazingi katûriri yôka babansoni. 4 Mu bungu ti babansoni bakaka ntenso’awu batûriri, kâ yandi wê mputu tûriri bio biabiansoni bie nandi, bio biabiansoni bibêle nandi mu zinga.”

5 Ha manima, bakaka bu beri zonzelaka tempelo, mpila yi batomesena yo mu matari ma ntalu na mu bima bi bahana kwe Nzambi, 6 watâ: “Bima bi luta mona bwawu bu, bilumbu bie kô bita kwiza ka ku sâla tari ha zulu tari ko di balembo mwangasa.” 7 Buna bamuyula, bu batâ: “ Mulongi, ntia ntangu misamu mi milungana, mpe ntia tidimbu tisongela ti misamu mio mbo mitula?” 8 Watâ: “Seno keba ngatu lwalembo wubakana, mu bungu ti babingi bakwiza mu nkumbu ya meno, bu batâ: ‘Meno ni yandi,’ mpe ‘Ntangu yeka pene-pene.’ Ka lubalandandi. 9 Musamu wakaka, bu luwâ lwaza lwa mizingu na lwa vwandi, ka lubândi na bunkuta. Mu bungu ti misamu mio mifweti toko tula. Kâ nsuka ka yitula hô nkatika bendo ko.”

10 Ha manima wabatêla: “Kanda mbo dinwanisa kanda diakaka, mpe timfumu mbo tinwanisa timfumu tiakaka. 11 Mbo kubâ midikutulu mia mutoto mia minene, mu mbuka za mpila na mpila mbo kubâ nsatu na bimbevo biyalanganaka; mpe mbo kubâ bima bia nzitukulu na bidimbu bia binene ku zulu.

12 “Kâ ntete misamu mio miatula, bantu mbo balukanga mpe mbo balukwamisa, mbo baluhana ku sinagoge mpe mbo balutûla mu maboloko. Mbo balunata ha matu ma mitinu na ma baguvernere mu bungu dia nkumbu’ani. 13 Buna mbo lubâ na bweso bwa tâ timbangi. 14 Buna, ka ludingandi na kani fioti mu tikubikila mpila yi lutinwanina, 15 mu bungu ti mbo niluhana misamu mi lutâ na ndwenga, zi lembo lenda mu telamana mbeni zeno peleko zi balembo sila ntembe ni bu sa ti bavukane babansoni. 16 Musamu wakaka, ni bu bibâ bibuti bieno, mpangi zeno, bantu ba kanda dieno na ndiku zeno mbo baluteka, mpe bakaka ha kati dieno mbo babahonda, 17 mpe bantu babansoni mbo baluyina mu bungu dia nkumbu’ani. 18 Kâ na kani lusuki lumosi lwa mutu’eno luhombela. 19 Ni mu tifu tieno tia korela luvûkisila luzingu* lweno.

20 “Kâ bu lumona ti Yerusaleme bazungiriri yo kwe binwani, buna zabeno ti mfukulu’andi yeka pene-pene. 21 Dieka bo, bô bê ku Yude babatika mu dioka ku miongo, bîka ti bô bê ku Yerusaleme baduka mpe bô bê ku musitu ka bakâlandi kûna, 22 mu bungu ti bilumbu bio mbo bibâ bilumbu bi bazengela misamu mu buderede* ngatu misamu miamiansoni miatsonama mialungana. 23 Tiari kwe bakento babâ na mazimi na bayemeka bala mu bilumbu bio! Mu bungu ti mbo kubâ mpasi za zinene ku nsi na nkesi ziturila bantu bo. 24 Mbo babafukisa mu mbele, mpe mbo babanata ku bungamba mu nsi zazansoni; mpe Yerusaleme mbo badiatuzula yo kwe makanda* na tii bu lungana ntangu yi bakubikila makanda.*

25 “Mbo kubâ mpe bidimbu mu ntangu, mu ngonda na mu mbwetete, mpe ha mutoto makanda mbo mabâ mu bunkuta mpe ka bazaba ko nti basa mu bungu dia lwaza lwa mubu na bu nanguzuka matuma* mandi. 26 Bantu mbo bafwa mu bunkuta bu bakêla misamu mitula ha mutoto mu bungu ti ngolo zê ku mazulu mbo ziteketa. 27 Mpe buna, mbo bamona Mwana muntu wuta kwiza mu tuti, na ngolo zazingi mpe na mukembo. 28 Kâ misamu mio bu mibatika mu tula, telameno mpe vumbuleno mitu mu bungu ti nkûlulu’eno yeka pene-pene.”

29 Ha manima wabahana tifwani timosi: “Taleno mufige na miti miamiansoni miakaka. 30 Bu lumonaka ti mibatikiri mu sasa, buna luzebi ti ntangu yi dukaka mbutu yituriri. 31 Mpila mosi mpe bu lumona ti bima bio bitûriri, zabeno ti Timfumu tia Nzambi tieka pene-pene. 32 Wa matieleka nita lu têla, kani kabwe mbandu yi ka yiyôka ko tii misamu miamiansoni bu mitula. 33 Zulu na mutoto mbo biyôka, kâ kani kabwe zu diani ka diyôka ko.

34 “Kâ seno keba ngatu mitima mieno mialembo dema mu bundiafu bwa dîla, bwa nwina na mu maniongo ma luzingu ngatu tilumbu tio ka tilubwilandi mu ta-pulukusu 35 ntiana mutambu. Mu bungu ti mbo tikwiza kwe bantu babansoni babêlaka ha mutoto. 36 Buna bêno na meso ma tia mpe yawuleno ntangu zazansoni ngatu lwalenda mu vûka mu misamu miamiansoni mifweti tula mpe lwatelama ha matu ma Mwana muntu.”

37 Dieka bo, mu mwini mu tempelo keri longesaka, kâ mpimpa ku mongo wu batâka Mongo wa miti mia Olive keri kwe ya yôkeselaka. 38 Mpe bantu babansoni kwe yandi beri kwizaka mu nkatika pari mu mu wirikila mu tempelo.