Za
17 Yezu watâ misamu mio, wananguna meso ku zulu, mpe watâ: “Tata, ntangu yifweni. Kembesa mwana’aku ngatu mwana’aku kakukembesa, 2 ntiana kwa bu wamuhana lutumu kwe bantu babansoni, ngatu kahana luzingu lwa mankululu kwe bô babansoni ba wamuhana. 3 Luzingu lwa mankululu luzololo tâ, biza balongoka mu ku zaba, nge Nzambi ya yimosi ya matieleka, na wô wu watambika, Yezu Kristo. 4 Nikukembele ha mutoto, bu manisi tisalu ti wakungana mu sala. 5 Bwawu bu Tata, kunkembesa ha lweka lwaku, mu mukembo wabâ nani kwe nge ntete nza yayilama.
6 “Natomono zabikisa nkumbu’aku kwe bantu ba wakungana mu nza. Ba nge beri, mpe wakungana bo, mpe basaririri* zu diaku. 7 Bwawu bu bayizi zaba ti bima biabiansoni bi wakungana kwe nge biatûka; 8 mu bungu ti nabatêlele misamu mi wakungana, batamburi mio mpe diangana bayizi zaba ti ntiana timonikisi tiaku nayiza, mpe bakwikiri ti ni nge wakuntambika. 9 Ndombolo nita sa mu bungu dia bawu; ndombolo nita sa, ka mu bungu dia nza ko, kâ mu bungu dia bô ba wakungana, mu bungu ti nge ba vwiri; 10 mpe bima biabiansoni bi mvwiri bia nge biena, mpe bia nge bia meno biena, mpe nabakiri mukembo ha kati diawu.
11 “Ka nsiri’â mu nza ko, kâ bawu mu nza bena, mpe kwe nge nita kwiza. Tata wa santu, ba kengerela mu bungu dia nkumbu’aku yi wakungana, ngatu babâ muntu wumosi* ntiana kwa bu twena muntu wumosi.* 12 Bu nabêle na bawu, bawu nabele kipaka mu bungu dia nkumbu’aku yi wakungana; bawu nakengerele, mpe na kani wumosi mu bawu wafukiri diambu’eti mwana wa mfukulu, ngatu matsonoko malungana. 13 Kâ bwawu bu kwe nge nita kwiza, mpe misamu mi nita tâ mu nza, ngatu babâ na nsayi’ani mpe yabâ ya lunga. 14 Nabaheni zu diaku, kâ nza yabayinini, mu bungu ti ka bena bantu ba nza ko, ntiana meno bu ndembolo muntu wa nza.
15 “Ka nita lomba ko wabakatula mu nza, kâ wabakengerela mu bungu dia munkwa-mbi. 16 Ka bena bantu ba nza ko, ntiana meno bu ndembolo muntu wa nza. 17 Ba santukisa* mu nzila ya matieleka, zu diaku matieleka diena. 18 Ntiana kwa bu wakuntambika mu nza, meno mpe nibatambikiri mu nza. 19 Mpe nitisantukisi mu bungu dia bawu, ngatu bawu mpe babasantukisa mu nzila ya matieleka.
20 “Ndombolo nita sa, ka mu bungu dia bawu’â ko kwa, kâ mpe mu bungu dia bô batûlaka timinu mu meno mu nzila ya misamu mi batâka, 21 ngatu babansoni babâ muntu wumosi, ntiana kwa nge, Tata, bu wena mu bumosi na meno mpe meno ndie mu bumosi na nge, ngatu bawu mpe babâ mu bumosi na beto, ngatu nza yakwikila ti ni nge wakuntambika. 22 Nabaheni mukembo wu wakungeni, ngatu babâ muntu wumosi ntiana kwa bu twena muntu wumosi. 23 Meno mu bumosi na bawu, mpe nge mu bumosi na meno, ngatu babâ ba lunga mu bumosi,* buna nza mbo yizaba ti ni nge wakuntambika, mpe bawu wazolo ntiana kwa bu wakunzolo. 24 Tata, nzololo ti bô ba wakungana babâ na meno ha ndiena, ngatu bamona mukembo’ani, wo wu wakungana, mu bungu ti wakunzolo ntete mbatukulu ya nza. 25 Tata dia buderede, diangana, nza ka yalongoka ko mu ku zaba, kâ meno nge nzebi, mpe bawu ba bayizi zaba ti ni nge wakuntambika. 26 Nkumbu’aku ya nabazabikisi mpe mbo nizabikisa yo, ngatu luzolo lu wakunzololo lwabâ mu bawu, mpe meno mu bumosi na bawu.”