Bisalu bia Bantumwa
19 Ha manima, Apolose bu keri ku Korente, Paulo wasabuka bizunga bia Azi mpe wayenda ku Efeze. Kûna wamona milongoki miakaka, 2 mpe wabatêla: “Ngano mpeve santu ya lwabakiri bu lwayizi kwikila?” Bawu bamuvuturila: “Kani kabwe ka tweka’eti wâ ko ti mpeve santu ye kô.” 3 Buna watâ: “Ntia bateme lwabaka?” Bawu bavutula: “Bateme ya Za.” 4 Paulo watâ: “Za wabatisa mu bateme yimonekesaka nsobolo ya mabanza, bu katâ kwe bantu mu kwikila mu muntu waketi kwiza ha manima mandi, wuzololo tâ, kwikila mu Yezu.” 5 Bu bawâ bo, babatusu mu nkumbu ya Mfumu Yezu. 6 Paulo bu kabatenseka moko, mpeve santu yabakôkela, mpe babatika mu zonza mazu ma nzenza na mu bikula. 7 Babansoni beri kampe babakala 12.
8 Wakota mu sinagoge, mpe ngonda tatu za mukaka na butindi keri zonzaka, binzonzi keri saka mpe bawu keri wisaka mu musamu wutariri Timfumu tia Nzambi. 9 Kâ mu bungu ti bakaka mu ngolo beri kalaka mu kwikila, Nzila beri zonzelaka mu mpila ya mbi ha matu ma pôka dia bantu, wahambana na bawu mpe wanata milongoki. Binzonzi keri saka bilumbu biabiansoni mu nzo ya lukolo lwa Tiranuse. 10 Walongesa kûna mvula zole, buna bô babansoni beri bêlaka ku tizunga tia Azi, Bayuda na Bagreke bawâ zu dia Mfumu.
11 Mpe Nzambi watatamana mu sa bimangu bia ngolo mu moko ma Paulo, 12 kwe mbevo beri nataka binkuti na milele mia tisalu bia simba Paulo; bimbevo biawu wasa bieri wasaka mpe mpeve za mbi duka zeri dukaka. 13 Kâ Bayuda bakaka beri kwe zungane kwakwansoni mu kuma bademo, bayêla bawu mpe mu sarila nkumbu ya Mfumu Yezu kwe bô babâ na mpeve za mbi; ebu beri tâka: “Mu nkumbu ya Yezu yi samunaka Paulo nilulombele mu duka.” 14 Ha kati dia bantu beri saka bo, mweri na bala ba babakala ba 7 ba Muyuda wumosi weri mfumu ya banganga-nzambi wu beri tâka nkumbu Seva. 15 Kâ mpeve ya mbi yabavuturila: “Yezu yandi nzebi na Paulo mpe; kâ beno ni banani?” 16 Buna bakala diabâ na mpeve ya mbi wababwila mu nitu, mpe mu bungu ti wabayôka mu ngolo, wabakutika mosi na mosi, ntiangu badioka nzo yîna bimpene mpe ba lwala. 17 Musamu wo wayizi zabakana kwe bantu babansoni, ni bu wubâ kwe Bayuda na kwe Bagreke beri bêlaka ku Efeze; bunkuta bwababaka babansoni, mpe nkumbu ya Mfumu Yezu yatatamana mu kemboso. 18 Mpe babingi mu bô bayizi kwikila beri kwizaka mu fungula na mu tomo zonzela nsalulu zawu. 19 Diangana babîngi mu bô beri sarilaka mpandu bayizi kutakasa mabuku mawu mpe bayoka mo ha matu ma bantu babansoni. Bu badinga mu zaba ntalu ya mabuku mâna, bayizi baka mipata 50 000 mia arza. 20 Ntiangu mu mpila ya nzitukulu, zu dia Yehova* diatatamana mu kula na mu nunga.
21 Ha manima ma misamu mio, Paulo wabonga nzengolo ya sabuka Masedwane na Akayi, na ya kwenda ku Yerusaleme ha manima. Watâ: “Bu nimana kwenda kûna, mfweti kwenda mpe ku Rome.” 22 Buna watambika bibakisi biandi biole ku Masedwane, Timote na Eraste, kâ yandi beni wasâla mwa ntangu ku tizunga tia Azi.
23 Mu ntangu yîna kwayizi bâ vwandi dia ngolo mu bungu dia Nzila. 24 Bakala dimosi dieri na nkumbu Demetriyuse weri yirikaka bima bia ore na bia arza, tempelo za Artemise keri yirikaka, mpe ndandu yayingi keri natinaka kwe bô beri salaka bisalu bia moko. 25 Wabavukasa na bantu bakaka beri salaka bisalu bia mpila yo mpe watâ: “Babakala, lutomono zaba ti timvwama tieto mu tisalu tio titûkaka. 26 Kâ lumweni mpe luwîri bwe Paulo dio, ku Efeze mpe kampe ku tizunga tiatiansoni tia Azi kata wisa mpe kata sobesa mabanza ma bantu, bu kata tâ ti nzambi zi basala mu moko ma bantu ka zena nkatika nzambi ko. 27 Musamu wakaka, bunkuta bwe nani ti bantu babatika mu zonzela tisalu tieto mu mpila ya mbi, kâ mpe babatika mu bongela tempelo ya nzambi ya yikento ya yinene Artemise ntiana tima tia mpamba, mpe yandi wu basambilaka mu tizunga tiatiansoni tia Azi na ha mutoto wa mukaka kizi kahombesa mukembo’andi.” 28 Bu bawâ bo nkesi zatomo ba baka, mpe babakala bango babatika mu kawula: “Artemise ya Bisi-Efeze wa wunene wena!”
29 Buna vwandi diatulumuka ku mumvuka, mpe babansoni babulumuka mu nzo ya nsaka, bakoka Gayuse na Aristarke, Bisi-Masedwane, beri ndiku za nzietolo za Paulo. 30 Paulo yandi, wadinga mu kota kô kwabâ bantu, kâ milongoki ka miamuhana nzila ko. 31 Bantu bakaka mpe beri kubikaka malaki na nsaka, mpe beri mu zoloko bamutambikila bantu mu mu lemberela mu lembo dinga mu kota mu nzo ya nsaka. 32 Diangana bantu misamu mia swaswana beri kawulaka mu ngolo; mu bungu ti vwandi diakota ha kati dia bantu bavukana, mpe bantu babîngi ka beri’â zabaka ko mu bungu dia nti bavukana kûna. 33 Buna badukisa Alekisandere ha kati dia pôka dia bantu, Bayuda ku matu beri mu nungunaka. Alekisandere wabatêla mu koko kwandi mu bîka lwaza mpe wabatika mu tinwanina ha matu ma bantu. 34 Kâ bantu bu bayizi zaba ti Muyuda weri, babansoni babatika mu kawula ha timosi, kampe heure zole za mukaka: “Artemise ya Bisi-Efeze wa wunene wena!”
35 Muntu wutsonekaka misamu mia mumvuka bu kakutisa pôka dia bantu, watâ: “Babakala ba ku Efeze, nani lembolo zaba ha kati dia bantu ti ni mumvuka wa Bisi-Efeze wukengerelaka tempelo ya Artemise wa wunene na tifwiti tiatûka ku zulu? 36 Mu bungu ti ka balendi’â basila misamu mio ntembe ko, lufweti dzuna mpe ka luyirikandi misamu mu tîta. 37 Mu bungu ti babakala ba luneti kû ka miena mivi mia tempelo ko mpe ka bavwezaka nzambi’eto ya yikento ko. 38 Buna tala ti Demetriyuse na bantu bakasalaka na bo bisalu bia moko, musamu wê nawu na muntu, bilumbu bia mfundusu bie kô, mpe na baguvernere; bîka benda bafundasana. 39 Kâ tala ti musamu wakaka wê kô wuyôkele musamu ewu, bafweti wa zengela kwe timvuka ti bahana nswa wa zenga mambu. 40 Diangana, tala ti ka tusiri’â keba ko, balendi kwizi tu funda ntiana’eti beto tuta tuma bantu mu tulumuna vwandi, mu bungu ti ka twena na musamu ko wu tutâ mu tinwanina wuta sa ti tatulumuna vwandi di.” 41 Bu kamana tâ bo, wamwangasa bantu bavukana.