Bisalu bia Bantumwa
28 Bu tavûka, tayizi zaba ti ile* yango Malte beri ya tâka. 2 Bantu beri bâka kûna batusongela nsayi mu mpila ya nzitukulu. Bawu banamisa tiya mpe batubwana beto bansoni na nsayi mu bungu ti mvula yeri nokaka mpe tiozi tiabâ kô. 3 Kâ Paulo bu katota mukuta wa nkuni mpe bu katuba wo ku tiya, mpiri yaduka mu bungu dia tiya mpe yanamatana mu koko kwandi. 4 Bantu babêlaka kûna bu bamona mpiri yanamatana mu koko kwandi, babatika mu tâ bawu na bawu: “Ntembe kâni bakala di muntu kahondele, mpe ni bu sa ti vûkiri mu mubu, buderede* ka buta mu hana nzila ko ya tatamana mu bâ wa moyo.” 5 Kâ, yandi waningasa tibulu tiango mu bwisa tio ku tiya mpe ka mona mpasi ko. 6 Kâ bawu bakêla ti kavimba peleko kafwa mbala mosi. Bu bakêla ntangu yayingi mpe bu bamona ti tima tia mbi ka tiamuturila ko, basoba mabanza mpe babatika mu tâ ti nzambi yena.
7 Pene-pene na mbuka yo, nsi zabâ kô za vwa bakala dia mfunu dia ile* yo, diabâ na nkumbu Pibliuse, watomo tu bwana mpe watusongela ndiambu ku nzo’andi bilumbu bitatu bia mukaka. 8 Kâ tata dia Pibliuse wa lambalala wabâ ku mfulu, fievre yabâ nandi na diare ya menga. Paulo wayenda kwe yandi, wasambila, wamutenseka moko, mpe wamuwasisa. 9 Ha manima, bantu bakaka ba ku ile* yo beri na bimbevo babatika mpe mu kwiza kwe yandi, mpe wabawasisa. 10 Batuzangula mpe bu batuhana makabu mamingi. Mpe bu tweri kâlaka mu nzila ya mubu, batuhana bima biabiansoni biabâ neto nsatu.
11 Ngonda tatu ha manima, takota mu bato yabâ na tidimbu ti batsoneka “Bala ba Zese.” Bato yango ku Alekisandri yatûka mpe yayôkesa ntangu ya tiozi tia ngolo ku ile* yango. 12 Bu tatula ku pore ya Sirakuze, tayôkesa bilumbu bitatu kûna; 13 tûka kûna talanda nzila’eto mpe tatula ku Regiume. Tilumbu tialanda, titembo tia side tiananguka mpe tatula ku Puteoli mu tilumbu tia nzole. 14 Kûna tamona bampangi, mpe batusa tiya mu bâ na bawu bilumbu 7; ha manima tayenda ku Rome. 15 Bampangi bu bawâ nsangu zeto, tûka kûna bayiza ku Zandu dia Apiyuse na ku Nzo Zitatu mu tu bwana. Bu kabamona, Paulo watonda Nzambi mpe wabaka butindi. 16 Ku nsuka bu tatula ku Rome, Paulo bamuhana nzila ya bâ ku nzo ya yandi beni na tinwani tieri mu kêlaka.
17 Bilumbu bitatu ha manima watâ mbila babakala ba mfunu ba Bayuda. Bu bavukana, wabatêla: “Babakala, bampangi, bakuntûla ku boloko tûka ku Yerusaleme mpe bakungana ha moko ma Bisi-Rome, ni bu sa ti ka nayirika musamu wa mbi ko kwe kanda di peleko mu bikulu bia nkaka zeto. 18 Mpe bu bamana taluzula musamu’ani, bazolo mu kundiambula, mu bungu ti ka babaka na kani musamu ko waketi sa ti bakungonda. 19 Kâ mu bungu ti Bayuda bakala ti bakundiambula, namona kwa ti bafweti kumfundisa kwe Sezare. Ka wena ko ti kanda diani nita zolo funda. 20 Ntiangu ndombele mu lu mona na mu zonza na beno, mu bungu ti ni mu bungu dia tivuvu tia Israele bakunkengi chaine zi.” 21 Bamutêla: “Ka tabakiri’â mikanda ko miatûkiri ku Yude mu bungu dia nge, mpe ka kwena na kani mpangi ko yatûkiri kûna, watuheni nsangu peleko watêle misamu mia mbi mu bungu dia nge. 22 Kâ tubenzi ti musamu wa mbote wena mu wâ mabanza maku mu munwa wa nge beni, mu bungu ti kwakwansoni mu mpila ya mbi bazonzelaka tinzambi-nzambi ti.”
23 Bawu bawisana tilumbu ti baketi vutu monana, mpe bayiza ba nkatika babingi ku mbuka yi keri bêlaka. Mpe tûka pari tii nkokela watomo ba bangurila misamu, bu katomo tâ timbangi titariri Timfumu tia Nzambi, mu ba wisa mu musamu wutariri Yezu, bu kasarila Musiku wa Mose na Bambikuri. 24 Bakaka babatika mu kwikila misamu mi keri tâka; bakaka ka beri’â kwikilaka ko. 25 Buna mu bungu ti ka beri’â wisanaka ko bawu na bawu, babatika mu kwenda, mpe Paulo watâ musamu ewu:
“Mpeve santu mpemba yabâ nandi bu yatâ kwe nkaka zeno mu nzila ya mbikuri Izayi, 26 ‘Yenda watâ kwe kanda di: “Mbo luwâ, kâ ka lubakula ko; mbo lutala kâ ka lumona ko. 27 Mu bungu ti kanda di diayikiri na mutima ngolo, bawîri na makutu mawu, kâ basiri miela; bakengi meso mawu ngatu balembo mona na kani fioti, balembo wirikila na makutu mawu, balembo bakula mu mitima miawu ngatu balembo soba mabanza mpe nabawasisa.”’ 28 Buna zabeno ti nsangu zi za mvukulu zitûkiri kwe Nzambi, batambikiri zo kwe bantu ba makanda; ntembe kâni bawu mbo bawirikila zo.” 29* ——
30 Buna yandi wabâ kûna mvula zole za mukaka mu nzo yi keri futilaka, mpe na nsayi yayansoni keri bwanaka bô babansoni beri kwizi mu talaka, 31 bu keri ba samuninaka Timfumu tia Nzambi na bu keri ba longesaka misamu mitariri Mfumu Yezu Kristo na butindi bwabwansoni bwa zonzela, mpe ka muntu’â ko weri mu kabakasaka.