Matie
17 Bilumbu 6 ha manima, Yezu wanata Piere, Zaki na mpangi’andi Za ha zulu mongo wumosi wa wula, ha bawu kaka. 2 Mpe wasoba mu mpila’andi ya monekena ha matu mawu; tidiri tiandi ntiana ntangu tieri kengaka, mpe binkuti biandi bia zulu biabatika mu hezima* ntiana mutsamina. 3 Mpe tala! Mose na Eliya baduka mpe babatika mu zonza na yandi. 4 Buna Piere watâ kwe Yezu: “Mfumu, bubote bwena bu twe hâ, tala ti zololo, mbo nitelamasa bivula* bitatu, timosi tia nge, timosi tia Mose mpe timosi tia Eliya.” 5 Ka timanisina ko mu zonza, tala! tuti dieri na mutsamina diabayabama, mpe Zu diatûka ha tuti dio diatâ: “Wu ni Mwana’ani, wu ntomono zolo, wu ntamburi. Mu wirikileno.” 6 Bu bawâ bo, milongoki miafukama na bidiri bia kondama, mpe bunkuta bwabwingi bwabâ nawu. 7 Buna Yezu wapusana kwe bawu, wabasimba mpe watâ: “Telameno. Ka lubândi na bunkuta.” 8 Bu bavumbula bidiri, ka bavutu’â mona muntu ko, kâ Yezu kwa. 9 Bu beri kôkaka mongo, Yezu wabalomba: “Ka luzonzelandi timona-meso ti kwe muntu tii Mwana muntu bu kavumbuka kwe ba fwa.”
10 Kâ milongoki miamuyula tiyuvu eti: “Mu bungu dia nti bitsoniki bitêlaka ti Eliya fweti toko kwiza?” 11 Yandi wavutula: “Diangana Eliya ni yandi wo, mpe mbo kakarisa bima biabiansoni. 12 Kâ nilutêlele ti Eliya wayiza, ka bamuzaba ko, mpe bamuyirika misamu miamiansoni mi bazolo. Mpila mosi mpe mbo bamwisa Mwana muntu mpasi.” 13 Buna milongoki miabakula ti Za Tibatisi keri ba zonzelaka.
14 Bu batula pene-pene na pôka dia bantu, bakala dimosi diapusana kwe Yezu, diafukama ha matu mandi mpe diatâ: 15 “Mfumu, fwila mwana’ani wa bakala tiari, mu bungu ti nzieta kabwaka, mpe timbevo tie nandi. Ku tiya na mu mamba kavulu bwaka. 16 Namuneti kwe milongoki miaku, kâ balembane mu mu wasisa.” 17 Yezu wavutula: “Ô mbandu yikondolo timinu na ya tengama, tii ntia ntangu mfweti tatamana mu bâ na beno? Tii ntia ntangu mfweti lu korela? Mu nateno hâ he meno.” 18 Buna Yezu wabamina demo, demo yaduka mu mwana wo, mpe mu ntangu yo mwana wawasa. 19 Ha manima, milongoki miayenda kwe Yezu ha bawu kaka, mpe miatâ: “Mu bungu dia nti tulembolo lendela mu kuma yo?” 20 Wabatêla: “Ni mu bungu dia timinu tieno tia fioti. Wa matieleka nita lu têla, tala ti timinu tia tinene tie neno ntiana mbutu ya mutarde, mbo lutâ kwe mongo ewu, ‘Katuka hô, yenda hanê,’ mpe mbo wukatuka, buna ka kwena tima ko ti lulembana.” 21 ——
22 Ni mu ntangu yi bavukana ku Galile Yezu kabatêla: “Mwana muntu mbo bamuteka ha moko ma bantu, 23 mpe mbo bamuhonda, kâ tilumbu tia bitatu mbo kavumbuka kwe ba fwa.” Buna tiari tiatomo ba baka.
24 Ha manima bu batula ku Kafarnawome, bantu batotaka mpaku ya drakme* zole bapusana kwe Piere, mpe batâ: “Ngano mulongi’eno ka futaka mpaku ya drakme zole ko?” 25 Watâ: “Yee.” Kâ bu kakota mu nzo, Yezu watoko mu zonzesa mpe watâ: “Bwe ta banza Simo? Mitinu mia mutoto kwe banani balombaka mpaku? Kwe bala bawu peleko kwe banzenza?” 26 Bu katâ: “ Kwe banzenza,” Yezu wamutêla: “Wa matieleka, buna bala ka bafutaka mpaku ko. 27 Kâ ngatu talembo ba têsa kuba, yenda ku mubu, losa ndoba mpe bonga mbizi ya ntete yinaka; bu zibula munwa’andi, mbo mona mupata wumosi wa arza,* bonga wo mpe ba hana wo mu bungu dia nge na meno.”