Za
16 “Misamu mio nilutêlele ngatu lwalembo tâ kuba. 2 Bantu mbo balukuma ku sinagoge. Diangana ntangu yita kwiza, muntu ni muntu wuluhonda mbo kabanza ti Nzambi kasaririri tisalu tia santu. 3 Kâ mbo bayirika misamu mio mu bungu ti ka balongokele’â ko mu zaba Tata na meno. 4 Kâ, misamu mio nilutêlele ngatu bu miyilama lwabambuka ti mia nalutêla.
“Ka natoko’â lu têla misamu mio ku mbatukulu ko, mu bungu ti na beno ndieri. 5 Bwawu bu kwe Wô wakuntambika nita kwenda; kâ na kani muntu mu beno ta kundiula, ‘Kwe ta kwenda?’ 6 Kâ mu bungu ti misamu mio nilutêlele, mitima mieno mifulukiri mu tiari. 7 Wa matieleka nita lu têla ti, mu bungu dia bubote bweno nita kwenda. Mu bungu ti tala ti ka ndiele’â ko, tibakisi ka tikwiza ko kwe beno; kâ tala ti ndiele, mbo nilutambikila tio. 8 Mpe yandi bu kakwiza, mbo kahana kwe nza bidimbu bi balendi kwikila bitariri masumu, buderede na mfundusu: 9 tia ntete titariri masumu, mu bungu ti ka basarilaka timinu mu meno ko; 10 ha manima titariri buderede, mu bungu ti kwe Tata nita kwenda mpe ka luvutu’â ku mona ko; 11 mpe ku nsuka titariri mfundusu, mu bungu ti mfumu ya nza yi bamufundisi.
12 “Misamu miamingi mie nani mi nilutêla, kâ ka lubakula mio ko bwawu bu. 13 Kâ yandi* bu kakwiza, mpeve ya matieleka, mbo kalutwarisa mu matieleka mamansoni, mu bungu ti ka zonzela mu lutumu lwa yandi beni ko, kâ mio mi kawâ ni mio kalutêla, mpe mbo kaluzabikisa misamu mikwiza. 14 Yandi mbo kakunkembela, mu bungu ti mbo kabaka bima bi mvwiri mpe mbo kaluzabikisa bio. 15 Bima biabiansoni bia Tata bia meno mpe biena. Ntiangu ntêle ti mbo kabaka bima bi mvwiri mpe mbo kaluzabikisa bio. 16 Ntangu fioti ka luvutu’â ku mona ko, mpe ntangu fioti mbo luvutu ku mona.”
17 Ntiangu milongoki miakaka miatâ bawu na bawu: “Bwe kata zolo tâ bu kata tu têla, ‘Ntangu fioti ka luvutu’â ku mona ko, mpe ntangu fioti mbo luvutu ku mona,’ mpe, ‘mu bungu ti kwe Tata nita kwenda’?” 18 Buna ebu beri tâka: “Bwe kata zolo tâ bu kata tâ ‘ntangu fioti’? Ka tuta zaba misamu mi kata zonzela ko.” 19 Yezu wazaba ti weri nawu bamuyula, buna wabatêla: “Yulasana luta yulasana mu bungu ti ebu ntêle: ‘Ntangu fioti ka luvutu’â ku mona ko, mpe ntangu fioti mbo luvutu ku mona.’? 20 Nkatika matieleka nita lu têla, mbo ludila mpe mbo lunionga, kâ nza mbo yiyangalala; mbo lubâ mu tiari, kâ tiari tieno mbo tikwizi bâ nsayi. 21 Mukento bu wubutaka, mu tiari wubâka mu bungu ti ntangu’andi yifweni, kâ bu kameni buta mwana, ka vutu’â bambukilaka mpasi ko mu bungu dia nsayi ti mwana wubutukiri mu nza. 22 Buna beno mpe, mu tiari lwena bwawu bu; kâ mbo nivutu lu mona, mpe mitima mieno mbo miyangalala, mpe ka muntu’â ko lu katula nsayi’eno. 23 Mu tilumbu tiango ka lukundiula na kani tiyuvu ko. Nkatika matieleka nita lu têla, tala ti lulombele tima kwe Tata, mbo kaluhana tio mu nkumbu’ani. 24 Tii bwawu bu, ka lweka’eti lomba na kani tima mu nkumbu’ani ko. Lombeno mpe mbo lubaka, ngatu nsayi’eno yabâ ya lunga.
25 “Misamu mio nilutêlele mu bifwani. Ntangu ni yawu yo yi nilembo vutu lu zonzela mu bifwani, kâ mbo nitomo lu têla misamu mitariri Tata. 26 Mu tilumbu tio mbo lulomba bima kwe Tata mu nkumbu’ani; bu ntêle bo ka nita zolo tâ ko ti mbo nilomba mu bungu dia beno. 27 Mu bungu ti Tata Yandi beni luzolo lwe nandi mu beno, mu bungu ti lwakunzololo mpe lwakwikiri ti nayiza ntiana timonikisi tia Nzambi. 28 Nayiza ntiana timonikisi tia Tata mpe nayiza mu nza. Bwawu bu nza nita sisa mpe kwe Tata nita kwenda.”
29 Milongoki miandi miatâ: “Mweni! Bwawu bu bubote ta zonza, mpe kuta sarila bifwani ko. 30 Bwawu bu tuzebi ti misamu miamiansoni mia zebi, mpe ka wena na nsatu ko ti muntu kakuyula tiyuvu. Ntiangu tukwikiri ti kwe Nzambi watûka.” 31 Yezu wabavuturila: “Bwawu bu lukwikiri? 32 Tala! Ntangu ni yawu yo, mpe diangana yituriri, yi lumwangana, mpe mosi na mosi mu beno yi kadioka ku nzo’andi, mpe mbo lukunsisa meno kaka. Kâ ka ndiena meno kaka ko mu bungu ti Tata na meno kena. 33 Misamu mio nilutêlele ngatu mu nzila’ani lwabaka tidzunu. Mu nza mbo lubâ na mpasi, kâ bêno na butindi! Meno nungini nza.”