Za

15 “Meno ni muti wa vinu wa matieleka, mpe Tata’ani ni tisari tia musitu. 2 Bintala biabiansoni bie mu meno bilembo butaka mbutu kakatulaka, mpe bintala biabiansoni bibutaka mbutu katsemesaka, ngatu biabuta mbutu zazingi. 3 Beno lwatitsemene mu nzila ya misamu mi nalutêla. 4 Tatamaneno mu bâ mu bumosi na meno, mpe meno mbo nibâ mu bumosi na beno. Ntiana kwa tintala tilendi lembo buta mbutu tiawu beni tala ti ka tiena mu muti wa vinu ko, beno mpe ka lulenda ko tala ti ka lwena mu bumosi na meno ko. 5 Meno ni muti wa vinu mpe beno ni bintala. Wô tatamana mu bâ mu bumosi na meno, meno mbo nibâ mu bumosi na yandi, mpe yandi mbo kabuta mbutu zazingi; mu bungu ti tala ti meno kâni, ka lulendi’â lwayirika tima ko. 6 Tala ti muntu ka tatamane’â mu bâ mu bumosi na meno ko, ku mbazi bamutubaka ntiana tintala mpe yuma kayumaka. Bantu bintala bio batotaka, ku tiya batubaka bio mpe ya biyaka. 7 Tala ti lutatamane mu bâ mu bumosi na meno mpe misamu miani mitatamane mu bâ mu beno, lulendi lomba tima ni tima ti luzololo mpe mbo tiyilama mu bungu dia beno. 8 Tata’ani mukembo kabakaka tala ti lutatamane mu buta mbutu zazingi mpe lusongele ti milongoki miani lwena. 9 Ntiana kwa Tata bu kakunzolo, meno mpe ni bo naluzololo; tatamaneno mu bâ mu luzolo lwani. 10 Lwamana sarila ntumunu zani, mbo lutatamana mu bâ mu luzolo lwani, ntiana kwa bu nasarila ntumunu za Tata mpe nitatamanaka mu bâ mu luzolo lwandi.

11 “Misamu mio nilutêlele ngatu nsayi’ani yabâ mu beno mpe nsayi’eno yabâ ya lunga. 12 Yi ni ntumunu’ani: Yendeno zolosono beno na beno ntiana bu naluzolo. 13 Ka kwena muntu ko wê na luzolo luyôkele lwa muntu wuta hana luzingu* lwandi mu bungu dia ndiku zandi. 14 Beno ndiku zani zena tala ti luyirikiri misamu mi nita lu tuma. 15 Ka nita vutu lu tâ bangamba ko, mu bungu ti ngamba ka yizabaka misamu mi yirikaka mfumu’andi ko. Kâ ndiku nita lu tâ mu bungu ti misamu miamiansoni mi nawâ kwe Tata niluzabikisi. 16 Ka lwakunsôla ko, kâ meno nalusôla, mpe nanomene ngatu lwenda, lwatatamana mu buta mbutu mpe mbutu zeno zatatamana; ngatu mio miamiansoni mi lulomba kwe Tata mu nkumbu ya meno, kaluhana mio.

17 “Misamu mio nilutumini ngatu lwazolosono beno na beno. 18 Tala ti nza yiluyinini, luzebi ti meno yatoko yina ntete yaluyina. 19 Tala ti bantu ba nza lweri, nza mbo yaketi kangama mu bio bikavwiri. Mu bungu ti ka lwena bantu ba nza ko, kâ mu nza nalusôla, ntiangu nza yiluyinaka. 20 Bambukileno misamu mi nalutêla: Ngamba ka yôkele’â mfumu’andi ko. Tala ti meno bakwamisi mbo balukwamisa mpe; tala ti basariri zu diani, mbo basarila mpe dia beno. 21 Kâ mbo bayirika misamu mio miamiansoni kwe beno mu bungu dia nkumbu’ani, mu bungu ti ka bazebi’â Wô wakuntambika ko. 22 Tala ti ka nayiziri’â mu nza ko mpe ka nazonzele’â kwe bawu ko, ka baketi’â bâ na masumu ko. Kâ bwawu bu ka bena na musamu wu batâ ko mu bungu dia masumu mawu. 23 Wô kundina, yinini mpe Tata’ani. 24 Tala ti ka nasariri’â bisalu bialembo toko sa muntu wakaka ko ha kati diawu, ka baketi’â bâ na masumu ko. Kâ bwawu bu meno bamweni, mpe batuyinini, meno na Tata’ani. 25 Kâ wuyilamane ngatu musamu wu batsoneka mu Musiku’awu walungana: ‘Bakundinini kwa mpamba.’ 26 Tibakisi ti nilutambikila mu nzila ya Tata bu tikwiza, mpeve ya matieleka, yitûkiri kwe Tata, yandi mbo katâ timbangi mu meno; 27 mpe beno lufweti tâ timbangi, mu bungu ti na meno lwena tûka ku mbatukulu.