Matie

12 Mu ntangu yîna, Yezu wayôka ku musitu wa ble mu tilumbu tia Sabala. Milongoki miandi miayizi bâ na nsatu, mpe miabatika mu tia mbutu za ble na mu dia zo. 2 Bafarize bu bamona bo, batâ: “Tala! Milongoki miaku misamu mi balembo haninaka nzila mu tilumbu tia Sabala bata sa.” 3 Yandi wabatêla: “Ngano ka lwatanga misamu mia yirika Davide ko, mu ntangu yandi na bantu bandi yi babâ na nsatu? 4 Wakota mu nzo ya Nzambi mpe badia mampa ma mukayulu, tima ti bahanina kwa nswa kwe banganga-nzambi mu dia, kâ ka yandi’â ko na bantu bandi. 5 Peleko ka lwatanga mu Musiku ko ti mu bilumbu bia Sabala, banganga-nzambi basalaka ku tempelo ka bazitisaka Sabala ko, mpe ka babalandaka mambu ko? 6 Kâ wa nita lu têla, tima tie kû tiyôkele mfunu na tempelo. 7 Kâ, tala ti musamu ewu wa lwabakuri, ‘Tiari tia mutima nzololo ka mukayulu’â ko,’ ka luketi’â zengela mambu ko bantu balembolo zaba musamu. 8 Mu bungu ti Mwana muntu ni Mfumu ya Sabala.”

9 Bu kakatuka mbuka yo, wayenda mu sinagoge’awu, 10 mpe tala! bakala dimosi diabâ mô dieri na koko kwa yuma!* Buna bamuyula, “Ngano balendi buka muntu mu tilumbu tia Sabala?” Basila bo ngatu bamufunda. 11 Yandi wabavuturila: “Tala ti timeme tie neno, mpe timeme tiango tibwiri mu bulu mu tilumbu tia Sabala, ngano ka kwena muntu ko ha kati dieno kwe tia simba ngatu kamudukisa? 12 Muntu wuyôkele timeme mu ntalu, ntiangu twe na nswa wa yirika musamu wa mbote mu tilumbu tia Sabala.” 13 Ha manima watâ kwe bakala dio: “Lambula koko kwaku.” Yandi walambula ko mpe kwayizi wasa ntiana koko kwakaka. 14 Kâ, Bafarize baduka mpe batâ mfundu mu dinga mpila yi bamuhondela. 15 Yezu bu kayizi zaba musamu wo, wakatuka mu mbuka yo. Bantu babingi bamulanda mpe wabawasisa babansoni, 16 kâ wabayimina mu ngolo mu lembo mu zonzela kwe bantu, 17 ngatu misamu emi mia tâ mbikuri Izayi mialungana:

18 “Tala! tisari tiani ti nsolele, ti nzololo, yandi wu ntamburi!* Mbo nitûla mpeve’ani mu yandi, mpe mbo kabangurila makanda buderede ni nti. 19 Ka bakana na muntu ko, ka kawula ko, mpe ka kwena muntu ko wuwâ zu diandi mu nzila za zinene. 20 Ka tiamuna titîti tia rozo tia kondama ko, mpe ka honda tiya twa musinga wa mwinda ko wuta dinga mu fwa, na tii bu kalenda mu sikamasa buderede. 21 Diangana makanda mbo matûla tivuvu mu nkumbu’andi.”

22 Ha manima bamunatina bakala dimosi diabâ na demo, diafwa meso mpe diabâ baba, wamuwasisa mpe baba dialenda mu zonza na mu mona. 23 Pôka dia bantu diayituku mpe diabatika mu tâ: “Ngano ka yandi’â ko Mwana Davide?” 24 Bafarize bu bawâ bo, batâ: “Bakala di mu nzila ya Belzebube* kwa, mfumu ya bademo, kakuminaka bademo.” 25 Mu bungu ti wazaba mabanza mawu, wabatêla: “Timfumu ni timfumu tie na titantu mbo timwangana, mpe mumvuka ni mumvuka peleko nzo ni nzo ye na titantu ka yilendi’â yasikama ko. 26 Mpila mosi mpe, tala ti Satana kumini Satana, kotese titantu kwe yandi beni; buna bwe timfumu tiandi tilendi sikamana? 27 Buna, tala ti mu nzila ya Belzebube nikuminaka bademo, bala beno mu nzila ya nani babakuminaka? Ntiangu bawu bakwizi bâ mfundisi zeno. 28 Kâ, tala ti ni mu mpeve ya Nzambi nikuminaka bademo, buna Timfumu tia Nzambi tituriri kwe beno. 29 Peleko, bwe muntu wulendi kotela mu nzo ya muntu wê na ngolo mu bonga bimvwama biandi, tala ti ka tokolo’â mu kanga misinga ko? Ni buna kwa kalendela mu laba bima bia mu nzo’andi. 30 Wô lembolo ku lweka lwani, mutantu’ani wena, mpe wô lembo vukasaka na meno, mwangasa kamwangasaka.

31 “Ntiangu nita lu têla, masumu na bifingu biabiansoni balendi bia lemvokela kwe bantu, kâ wô finga mpeve santu ka balendi’â bamulemvokela ko. 32 Mu tifwani, wô zonzela bubi bwa Mwana muntu mbo bamulemvokela, kâ wô zonzela bubi bwa mpeve santu ka bamulemvokela ko, kâni ni bu wubâ mu nza yi* peleko mu yo yita kwiza.

33 “Seno ti muti wabâ wa mbote mpe mbutu zandi zabâ za mbote, peleko seno ti muti wabâ wa bola mpe mbutu zandi zabâ za bola, mu bungu ti mu mbutu zandi bazabilaka muti. 34 Bala ba mpiri, bu lwena bantu ba mbi bwe lulendi têla misamu mia mbote? Mu bungu ti mio mifulusaka mutima, munwa ni mio kadukisaka. 35 Muntu wa mbote misamu mia mbote kadukisaka, mu bungu ti mutima‘andi wa fuluka wena mu bima bia mbote, kâ muntu wa mbi misamu mia mbi kadukisaka, mu bungu ti mutima’andi wa fuluka wena mu misamu mia mbi. 36 Wa nita lu têla, mu tilumbu tia mfundusu, bantu mbo babafundisa mu bungu dia muna musamu wa buzoba wu badukisa; 37 mu bungu ti ni mu nzonzolo’aku bakutâ wa sungama peleko bakuzengela mambu.”

38 Ha manima, bitsoniki na Bafarize bamutêla: “Mulongi, tuzololo watusongela tidimbu.” 39 Yandi wabavuturila: “Mbandu ya mbi na ya bunsuza* tidimbu yita kwe dingi, kâ ka babahana tidimbu ko diambu’eti tidimbu tia mbikuri Yona. 40 Ntiana kwa Yona bu kayôkesa bilumbu bitatu na mpimpa zitatu mu moyo wa mbizi ya yinene, Mwana muntu mpe mbo kayôkesa bilumbu bitatu na mpimpa zitatu ku nsi’a mutoto. 41 Mu ntangu ya mfundusu bantu ba Ninive na ba ntangu yi mbo bavumbuka kwe ba fwa ha timosi, mpe bawu mbo babafundisa mu bungu ti basoba mabanza Yona bu kabasamunina. Kâ tala! muntu wê kû wuyôkele Yona. 42 Mu tilumbu tia mfundusu, mutinu wa mukento wa ku side na bantu ba mu ntangu yi mbo bavumbuka ha timosi kwe ba fwa, mpe yandi mbo kabafundisa, mu bungu ti watûka kûna kwa sukisina mutoto mu kwizi wâ ndwenga za Salomo. Kâ tala! muntu wê kû wuyôkele Salomo.

43 “Mpeve ya mbi bu yidukaka mu muntu, mu mbuka ze na mutoto wa yuma kakwe yakambe mu dinga mbuka yi kahumina, kâ ka bakaka yo ko. 44 Buna têle, ‘Mu nzo’ani yi natûkiri nikâla,’ bu kakwe kâri, wizi ya bwana ya mpamba, ya kombo, mpe ya kutama. 45 Buna, mbo kakwe dinga mpeve 7 zakaka zimuyôkele mu mbi mpe bu bamana kota, babêle mûna; dieka bo mpasi ziturila muntu wo mbo ziyôka zîna zatêkela. Musamu ni wo wuturila mbandu yi ya mbi.”

46 Bu keri zonzaka na pôka dia bantu, nguri’andi na mpangi zandi zatelama ha mbazi, yandi beri dingaka mu mu zonzesa. 47 Buna muntu wamutêla: “Tala! Nguri’aku na mpangi zaku ku mbazi batelamane, mpe wê nawu bazonza na nge.” 48 Buna yandi wamuvuturila: “Nani wê nguri’ani, mpe mpangi zani ni banani?” 49 Bu kasongela koko kwe milongoki miandi, yandi watâ: “Tala! Nguri’ani na mpangi zani! 50 Mu bungu ti wô sarilaka luzolo lwa Tata’ani die ku mazulu, ni yandi wê mpangi’ani ya bakala, tibusi tiani na nguri’ani.”